Isaya 17 - Baibuli I Leb Kumam 2013

Rubanga bino Mino Siria kede Isirael Alola

¹ Man en kop kame Rwot owaco i kom Damasiko. En ewaco be, “Nenunu, Damasiko likame bino pwodi dong di etie bomba kamanono; en ebino do doko atukit me ameje.

² Jo bino weko bomban me Siria atwal. Gin kibino doko kakame romini kede dok camo iye di kiko buto piny urako abongo ngatamoro lolo gi.

³ Apama atek kame gwoko Isirael kibut jokwor bino doko li, doko da Damasiko likame bino bedo kede ajakanut; jo me Siria kodong mege can gi bino bedo rom aroma kede me jo me Isirael; ango Rwot me jo yi en awaco.”

⁴ Rwot waco be, “Kame kare nono otuno, kobino dwoko deyo me Isirael piny; cwe kame nataman etie kede no bino arutor di kome ko ridingingo.

⁵ Isirael bino bedo cal bala poto kame konyaro kiye engano; ebino dong kene bala poto me engano me aditot me Repaim, kame jonyar onyaro kiye engano di oko nyogao depo kiye wit engano kodong pitipit.

⁶ Jo anonok kenekene en kame bino dong; Isirael bino bedo cal bala yat olibeti kame kotengo anyakini mege kede ebela, di anyakini are amoto adek mogo en ako dong i wie malo, arabo anyakini ongwon amoto kany mogo en ako dong i jange me pipiny; ango Rwot Rubanga me Isirael en awaco.”

⁷ Kame kare nono otuno, jo bino lokere keto gen gi but Ngacwec gi; gin kibino ciko wang gi i kom Ngat Kacil kobedo Rubanga ka jo me Isirael.

⁸ Likame doko kibino tamo pi alutarin kame gin kitimo kede cing gi, akadi geno epir kobedo cal me rubanga adako anyinge Asera, amoto alutarin me dunyo ne odok angwe kur.

⁹ I ceng nono, bomban gin atek jo bino ringo tenge weko gi kidong nono, bala bin bomban kame jo Kibi kede jo Amor oringo oweko pi ringo jo me Isirael; gin kibino doko amejeko.

¹⁰ Pien in Isirael wi otieko wil kede Rubanga ngat kame laki kede kame tie bala lela kame in iringo ot gwokere iye. Wun ipurunu poti me woro rubanga me kumbor.

¹¹ Do akadi bed bala gikame ipurunu tui di kiko tuuro odiko me ceng kame ipitunu gi kede, do kac kame iudunu kony mere bino bedo li butu i ceng kame ibinunu bedo kede cwercuny kede aramo kalikame jik.

Kobwono Atekerin me Jokwor

¹² Otukui, dwan jo atot tie woo, kiwoo kitek iwinyo bala mor me nam! Otukui, atekerin tie woo, woo gi iwinyo bala twomere me twon pii.

¹³ Atekerin tie woo bala ebuka me twon pii, do Rubanga bino redo negi di kiko awilun ringo dok kakabor. Dok gi cen bino bedo bala cucung kame yamo buko ngolo kede mori, amoto bala apua kame yamo me apipiru tie tero.

¹⁴ Wang otieno gin kibino timo asura di kiko kelo ne jo twon lworo, do tuno odiko udo kotieko muducaro gi. Manoni en gikame bino timere ne jo kame yako wa.