Isaya 15 - Baibuli I Leb Kumam 2013

Rubanga bino Dudubo Moab

¹ Man en kop kame kowaco i kom Moab. Kodudubo bomban me Ar kede Kir iwor acel kenekene, manono omio Moab kop mere otiek.

² Jo me Dibon oyito malo i wi emukura pi ot koko i abila gi. Jo me Dibon tie koko kede cwercuny pi bomban me Nebo kede Medeba; kilielo wi gi kede tik gi pi cwercuny.

³ Jo kame tie i yote me bomba ngapo ipukoi pi nyuto iturur; jo kame tie kacokere me bomba kede i wi ude gi kok kitek di pigewang gi mol.

⁴ Jo me Kesibon kede Eleale tie kok, koko gi winyere ki kakabor i Yakas. Pi manono, kom isirikalen me Moab tie miel amiela di cuny gi opong kede lworo.

⁵ Cunya cwer pi Moab; jo mege tie ringo Soar kede Egelat Selisiya. Mogo kikom gi yito lubo egudo akiar ot Lukit di kikok, apat mege lubo egudo aoto Koronaim di kiboroboro koko.

⁶ Pii me Nimirim otieko dwono; lum da otieko tuo, likame ineno gimoro atie lot.

⁷ Pi manono, gin kitero jamini dedede kame oudo lem kiudo, kede apat kame oudo kikano, di kiko ngolo kede gi aditot me Wilo.

⁸ Pien koko tie winyere i kabedo dedede me Moab; koko tuno kiton i bomban me Egelaim kede Berelim.

⁹ Pii me Dibon otieko doko remo, do Rwot pwodi bino kelo i Dibon can arac kalamo mano, pien jo anonok me Moab kame bino bwot di kiko ringo bino riamo kede engu.