Isaya 14 - Baibuli I Leb Kumam 2013

Jo Bino Dwogo ki Obukui

¹ Do Rwot bino bedo kede kisa i kom ikwae ka Yakobo di doko eko yero gi pi bedo jo mege. En ebino dwoko gi i lobo gi amako gi di jokumbor ko bino donyo bedo kede gi.

² Atekerin apat bino dwoko jo me Isirael i lobo gi amako gi, di jo me Isirael ko bino mino gi kidoko ipasoi kede apasoi i lobo ka Rwot. Jo me Isirael bino lokere mako pi bedo mabus jo kame oudo bin omako gi, di kiko donyo pugo jo kame oudo tero gi kirac.

Abaka me Babilon i Piny me Jo Oto

³ Rwot bino mino wun jo me Isirael wei ki lito kede ki peko, kede ki tic atek kame kodio wu timo.

⁴ Kame manoni otimere, ibinunu nywaro abaka me Babilon di iwerunu ne be: “Ngat alem tero wa kirac otieko robere piny, kwar wange otieko jik!

⁵ Rwot otieko tuturo teko me abakai areco,

⁶ gin jo kame kibedo tojo jo me atekerin apat kede gero, jo kobedo pugo atekerin apat di kitidilo gi abongo kisa.

⁷ Nan do wi lobo lung okwei etie kede anapakin, jo dedede tie wer kede kilel.

⁸ Yen saipuras kede seda me Lebanon tie kilel i wi abaka di kiwaco be, ‘Cako i ceng kame koreto kede apugan ni, likame tie ngatamoro adoko oko bino tongo wan piny.’

⁹ “Kabedo me jo oto tie iikere pi riamo kede abaka me Babilon ka eoto kunono; etie ruruko tipere me jo oto pi game, gin jo kame oudo bin kibedo jotel me wi lobo. Etie mino tipere me abakai kotieko to yai ki komini gi me ajakanut.

¹⁰ Gin dedede kibino waco ne be, ‘Ida nan itieko doko goro bala wada!

¹¹ Deyo ni kede arigirigi kame oudo kogoo ni otieko jik kanoni i kabedo me jo oto. Idwe me kudilinge en gibuto ni, kede kudilinge adongo en esuka ni me um.’ ”

¹² Abaka me Babilon, kite kame imukere kede ki malo di iko poto piny, in acer me odiko! Ida nan kotieko reti piny, in ngat kame oudo ibedo rereto atekerin apat.

¹³ In oudo iwaco i cunyi be, “Abino yito tuno malo, abino cibo kom na me pug i wi acerin. Abino bedo i wi moru atie kakawiriwir i bad tetu malo kakame rubangan cokere iye.

¹⁴ Abino yito paka i wi edou malo, di ako doko bala Rubanga Ngamalo Twal.”

¹⁵ Do akaka manono, nan kotieko mini idonyo piny i kabedo me jo oto, kakatut wiriwir.

¹⁶ Jo oto kame bino neni bino ngamo wang gi i komi di kiurere i komi be, “Kom ateteni man en icuo koudo omio wi lobo oyangere, di eko mino kom atekerin omiel?

¹⁷ Benyo, kom ateteni manoni en icuo komao bomban di eko mino wi lobo odoko bala wi tim? Benyo, kom icuo koudo dagi yei ne mabus dok i miere gi inononi?”

¹⁸ Abakai dedede me wi lobo koyiko gi i atesin me deyo,

¹⁹ do in ili kede ates, kouco komi bala abwogini kame jo dagi; kokumemo iye kom isirikalen kame koneko kede epima, kame kouco i bur atut di oko donyo nyonyono.

²⁰ Likame kobino yiki bala abakai apat, pien in i dudubo lobo nin, ineko jo nin. Koto nying ikwae me jo atimo tim areco rweny atwal.

²¹ Poore nek cakere! Awobe ka abaka noni kobino neko pi raco ka joakwari gi. Likame tie moro kikom gi kame bino pugo lobo amoto gero iye bomban.

Rubanga bino Dudubo Babilon

²² Rwot me jo yi waco be, “Ango abino suro Babilon di ako neko jo dedede kame tie iye, tetekeny kur doko nying ngatamoro dong iye. Likame tie ngatamoro kame bino dong iye akadi idwe amoto ikwae.

²³ Ango abino weno jo ki Babilon kede oweco, di ako loke edoko kabedo me icocia kede ataparin me pii.”

Rubanga bino Muducaro Jo me Asiria

²⁴ Rwot me jo yi okwongere be, “Gikame ango atieko iiko bino timere kamanono; gikame ango atieko moko timo bino cobere.

²⁵ Ango abino muducaro jo me Asiria ki lobo na, di ako nyonyono gi ki wi moru na. Abino gonyo jo me Isirael ki ayoko me jo me Asiria, di ako kwanyo yec ki epepet gi.

²⁶ Manoni en iik na pi wi lobo lung; doko da arieo cinga i kom atekerin pi mino gi alola.”

²⁷ Rwot me jo yi otieko timo iik noni, ngai kame karuno genge? En etieko rieno cinge, ngai kame karuno dole?

Rubanga bino Muducaro Jo me Pilistia

²⁸ Man en kop kame bin kowaco i mwaka kame Abaka Akas oto iye.

²⁹ Wun jo me Pilistia kur ilelunu be ebela me bungo wu otieko tur. Pien kame twol oto, twol akalamo en kede gero en kame lunyo wange, kede ace kiyiliyili di epor apora.

³⁰ Rwot bino bedo ngakwat me jocan bala romini atie camo lum, di eko mino jo kame piny oloo urako abongo peko moro poto negi; do wun ibinunu to kec, kede apat kodong kobino neko aneka.

³¹ Goi duru, in erute me bomba. Koki, in bomba. Pien yiro tie duny wok ki bad tetu malo, manono obedo isirikalen katie bino abongo ngatamoro atarasar kikom gi.

³² Kame joor obino ki ateker moro me kakabor, obino waco negi benyo? Obino waco ne gi be Rwot otieko sipakino Sion, doko da jo kame tie neno can bino gwokere kunono.