Isaya 13 - Baibuli I Leb Kumam 2013

Rubanga bino Mino Babilon Alola

¹ Man en kop amako Babilon, kame Rubanga owaco ne Isaya wot ka Amos.

² Sipi imendera me yi i wi moru agereger. Lelemo ne isirikalen di iko kiarao badi malo bala gianyuta but gi pi gin cako suro irutei me jo kame koworo i Babilon.

³ Ango Rwot atieko ciko jo na kame atieko kwero, atieko lwongo jo na atek yi, jo na kame wakere di kingato angata, pi mino gero na cobo tic mere.

⁴ Winyunu ber woo atie i wi mori, iwinyo bala icelakin me twon jo atot! Ajakanuto kede atekerin tie cokere karacel! Rwot me jo yi tie coko isirikalen mege pi cako yi.

⁵ Gin kiwok ki lobo abor i ajikini me piny. Rwot tie bino kede jamini mege me yi pi dudubo lobo lung pi gero mere.

⁶ Wololonu koko, pien ceng ka Rwot otieko noko, ceng kame Won Twer bino kelo kede amuducar.

⁷ Cing jo dedede bino doko lojolojo, di lworo ko nyoto cuny gi.

⁸ Gin dedede kibino bedo kede lworo adwong kede twon lito, bala aramo me dako atie ramere me nywal. Kibino donyo ngire ken gi ken gi kede lworo di lewic opong i wi gi.

⁹ Nenunu, ceng ka Rwot tie bino, en ceng kame Rwot bino nyuto kede lilo kede twon gero mere, di eko bino weko wi lobo dong nono, kede eko muducaro jodubo dedede kame bedo iye.

¹⁰ Acer acelacel kede acerin kocokere atie malo likame bino rieny, ceng bino wok di eko dong di ecol acola, doko rieny me duwe da bino doko li.

¹¹ Rwot waco be, “Ango abino kelo can i wi lobo di ako mino jo areco alola pi dub gi. Abino jiko ewaka me jo atingere, kede kwarwang me jo ager.

¹² Udo jo odong bino bedo tek kalamo udo saabu.

¹³ Abino mino malo yangere, di wi lobo da ko yangere eko nyiko tenge ki kabedo mere, i ceng kame ango Rwot me jo yi abino nyuto kede gero na agwai.

¹⁴ “Ngat acelacel bino ringo dok but joe mege arabo i lobo me tur gi, bala atil kame jodwar tie riamo, amoto bala romini atie ken gi abongo ngatamoro acoko gi.

¹⁵ Ngat kame kobino mako kobino cocobo en kede epima tuno to.

¹⁶ Kobino nyonyoto idwe gi di gida kitie neno; kobino yako ude gi, kede kobino buto kede mon gi tetek.”

¹⁷ Rwot waco be, “Nenunu, ango atie supo cuny jo Mede pi ot suro Babilon, cuny gin likame paro pi siliba amoto saabu.

¹⁸ Kibino neko awobe kede emal; likame kibino bedo kede kisa i kom imukerun kede i kom idwe atino.

¹⁹ Babilon, ajakanut kame nataman tie kede deyo kalamo ajakanuto apat dedede, kame nataman obedo ewaka me jo Kaldea, ebino doko bala Sodoma kede Gomora i kare kame ango Rwot bin adudubo gi kede.

²⁰ Pi kare lung en likame doko jo bino bedo iye. Imuarabun aoto aota likame doko bino kudo kimere gi iye, akadi jokwat da likame bino mino romini gi urako iye.

²¹ Do leini me wi tim en kame bino bedo kunono kede winy me isirani; ekululu da bino bedo kunono, kede jwogi me wi tim acal kede diegi bino takaro kiye.

²² Idiekon bino kok i gedo aboco malo atie iye, kede ikween da bino kok i miere abeco me abaka. Ceng me dudubo Babilon otieko tuno, likame doko kobino medo ceng mege anyim.”