Isaya 11 - Baibuli I Leb Kumam 2013

Ajakanut Atie kede Anapakin

¹ Bala kame isiki lot kede, kamanono da abaka anyen bino wok ki ekeko ka Yese.

² Tipo ka Rwot bino bedo tie kede en, en tipo amio rieko kede niang, en tipo amio tam kede teko, en tipo amio ngec kede cuny me bedo kede wor but Rubanga.

³ En cunye bino bedo yom bedo kede wor but Rubanga. Likame en ebino ngolo kop di egengere i gikame wange oneno, arabo i gikame yite owinyo;

⁴ do en ebino ngolo ne jocan kop i yore me ateni, doko ebino ngolo kop kakare ne jo amwol me wi lobo. Kop kame wok ki doge bino bedo bala ebela me pugo lobo, kede kame bino neko jo areco.

⁵ Ebino bedo kede tim kopoore kede genere bala rakoba kame engapo i piere.

⁶ Epee bino nywako bedo karacel kede atin oromo, erisa bino buto karacel kede atin diel. Roya kede atin me engu bino cam karacel, di atin atitidi en adaro gi.

⁷ Diang bino cam karacel kede edubu, idwe gi bino urako karacel; doko da engu bino donyo camo arienge bala twon.

⁸ Atin mukeru bino tuko i dog ot me ipom, doko da atin koweko dot bino cwano cinge i kabuto me emosoga abongo gimoro time.

⁹ Likame tie awanon arabo gimoro arac kame bino timere i wi moru ka Rubanga. Lobo bino pong kede ngec i kom Rwot bala kame pii pongo kede nam.

Jo kame Komako tie Obukui bino Dwogo

¹⁰ Kare tie bino kame abaka kowok ki ekeko ka Yese bino cungo kede bala imendera ne atekerin apat. Gin kibino penyo tam kibute, di kabedo mere ko bino bedo kede deyo.

¹¹ Kame kare nono otuno, Rwot bino bobo medo tic kede twer mere pi dwoko jo mege kodong anonok ki Asiria, ki Misiri, ki Paturos, ki Abisinia, ki Elam, ki Sinar, ki Kamat, kede ki lobo atie i dog nam adwong.

¹² En ebino sipo ne atekerin imendera, pi bedo gianyuta me en coko karacel jo kosasarun me Isirael kede Yuda, di eko dwoko gin dedede ki bad ongwon me wi lobo.

¹³ Isirael likame bobo bino bedo kede nyeko i kom Yuda, doko da Yuda likame bino bedo kede gero i kom Isirael.

¹⁴ Do gin kibino mwomere karacel suro jo me Pilistia i bad tetu tim, di kiko yako jo kame bedo i bad tetu kide. Gin kibino bwono jo me Edom kede Moab, kede jo me Amon bino yei lubo kop gi.

¹⁵ Rwot bino mino jang wi Nam Akwar tuo i nget Misiri, di eko mino yamo aliet buko paka mino ecilet me Eupurate dwono, di eko dong kede itaun atitino kanyaare kame pii mol lubo, tetekeny dano twero ngole kede tiene.

¹⁶ Aso, yongayo adwong bino bedo tie kame wok ki Asiria, ne jo mege anonok kodong, bala kame oudo bin obedo tie ne kede joakwari gi i kare kame kiyai kede ki Misiri.