Isaya 10 - Baibuli I Leb Kumam 2013

¹ Itienu i can! Wun i cibunu iswilia kalikame poore, iwandikunu iswilia kame dio jo.

² Manono en epone kame igengunu kede jocan udo kop kame kongolo i ateni, kede likame kibedo kede twero gi. Manono en epone kame imaunu kede jamini me apuserun kede me idwe kic.

³ Nyo kame ibinunu timo i ceng kame Rubanga bino mino wu kede alola? Nyo kame ibinunu timo kame en ekelo can i komu ki piny abor? Ibinunu ringo but ngai pi konyo wu? Doko da ibinunu weko abar wu ne ngai?

⁴ Kobino mako wu kotero wu bala mabus arabo kobino neko wu. Pi magonogi dedede Rwot pwodi gero mere likame otiek, en pwodi erieo bade kamanono pi mino alola.

Abaka me Asiria en Ebela ka Rubanga

⁵ Rwot owaco be, “Asiria! Ango atio kede Asiria bala akuta me bungo jo kame ango adoko ger negi.

⁶ Ango acwae ot suro ateker kalikame wora; acwae ot suro jo kame ango adoko ger negi. En eoto di eko mano jo jame di eko yak, di eko nyonyono jo bala nyono apua me gudo.”

⁷ Do manoni likame obedo gikame Asiria oudo oikere pi timo, doko da likame etie i tam mere. Do i cunye, en etieko iikere pi muducaro atekerin atot.

⁸ Pien Asiria waco be, “Jodongo me isirikalen nango dedede obedo abakai!

⁹ Gin kimao bomban me Kalano, Kacemis, Kamat, kede Arapad, Samaria kede Damasiko.

¹⁰ Ango atieko bwono ajakanuto aworo caljwogi atot kalamo caljwogi me Yerusalem kede Samaria.

¹¹ Abino bwono Yerusalem kede caljwogi mege bala kame abwono kede Samaria kede caljwogi mege dedede.”

¹² Do ka Rwot otieko tic mere i wi moru me Sion kede i Yerusalem, en ebino mino abaka me Asiria alola pi ewaka kede tingere mere.

¹³ Piento abaka me Asiria waco be, “Ango atimo manoni kede teko na kede rieko na, pien ango atie kede niang. Bala twon ager ango atieko rereto jo kame oudo bedo i komini me ajakanuto, di ako mano lobere kede abar me atekerin.

¹⁴ Atekerin me wi lobo oudo cal na bala ot me winyo; coko abar gi oko bedo yoyot na bala kwanyo abeon kame winyo oringo oweko. Likame moro kikom gi opapuko na bwome arabo ngamo na doge akadi kok da.”

¹⁵ Do Rwot waco be, “Benyo, le twero wakere be en etek kalamo ngat kame tongo kede yen? Arabo benyo, musumeno twero tingere be pire tek kalamo ngat kame tio kede? Akuta likame riongo dano, do dano en ariongo akuta.”

¹⁶ Pi manono, Ngapug adwong, Rwot me jo yi bino cwano i kom jo yi mege isikit nogo tuwo ajonyo gi; i deyo kame kitie iye kom gi bino liel aliela bala mac.

¹⁷ Ngat Kacil, en lero me Isirael bino doko bala mac, di eko bino wango gin dedede i ceng acel kenekene, okuto kede ocokocok.

¹⁸ Abumiok mege me deyo kede lobo mere aceko cam kitek kobino dudubo atwal atwala, bala kame tuwo arac mio dano doko kede goro.

¹⁹ Yen kame bino dong i abumiok mege bino bedo nonok twatwal, mio akadi atin atina da twero maro gi.

Jo Anonok bino Dwogo

²⁰ Kare tie bino kame jo me Isirael odong mege, ikwae ka Yakobo obwot mege, likame bobo bino gengere kede i kom jo koudo obwono gi, do kibino do keto gen gi i ateni i kom Rwot, Ngat Kacil me Isirael.

²¹ Jo mogo anonok, ikwae ka Yakobo, bino dwogo but Rubanga Won Twer.

²² Bed bala jo me Isirael nan tot bala asinge me nam, do anonok kenekene en kame bino dwogo. Kotieko iiko amuducar cuto pi jo, manono en gikame poore negi.

²³ Rwot Rubanga me jo yi bino kelo amuducar i lobo noni bala kame en etieko waco kede be ebino timo.

Rwot bino Mino Asiria Alola

²⁴ Pi manono, Rwot Rubanga me jo yi waco ne jo mege abedo Sion be, “Okwe wun jo na, kur ibedunu kede lworo i kom jo me Asiria ka kibungo wu kede lilim, di kitingo ibelai i komu bala kame bin jo me Misiri oudo timo.

²⁵ Pien odong kare acecek di ango ako jiko mino wu alola, di do ango ako lokere muducaro gin.

²⁶ Ango Rwot me jo yi abino dano jo me Asiria kede ebela, bala kame bin abungo kede jo me Midian i moru me Oreb. Abino tic kede twer na kame bin atio kede i dier nam i Misiri.

²⁷ Kame kare nono otuno, kobino kwanyo ki epepet wu yec kame kimio wu, doko da kobino tuturo ayoko gi kame tie i ngutu.”

Ngakwor Otimo Asura

²⁸ Jokwor otieko tuno i bomba me Ai! Kibeo ki Migiron di kiko kano jame gi Mikimas.

²⁹ Kingolo loka di kiko ot buto Geba. Lworo omako jo me bomba me Rama; jo me Gibea da otieko ringo, en bomba ka Abaka Saulo.

³⁰ Lelemunu kitek wun jo me Galim! Winyunu wun jo me Laisa! Dwokunu kop wun jo me Anatot!

³¹ Jo me Mademena tie ringo, jo me Gebim da tie ringo pi laro kuo gi.

³² I ceng atin noni jokwor ber kong oyaro cungo Nob, di kiko lulungo cing gi ne moru me Sion, ne emukura me Yerusalem.

³³ Do nenunu, Ngapug adwong, en Rwot me jo yi bino tic kede twer mere akelo lworo pi rereto piny yen abocoboco nogo di eko bino tetelo ajange gi.

³⁴ Rwot bino totongo piny jokwor nogo bala kame kotongo kede yen ki dier abum kede le, di yen aboco me Lebanon nogo ko bino popoto.