Iburanian 8 - Baibuli I Leb Kumam 2013

Yesu en Ngatel wa me Josaseredoti

¹ Gikame pire tek i kop kame wan otie waco en ine be, wan otienu kede Ngatel Josaseredoti kame cal kamano, kame tie bedo i bad tetu cam me kom me ajakanut ka Rubanga i malo.

² En etimo tic mere i kabedo kacil kede i taberenakol me ateni, kame Rwot en kogero do weko dano.

³ Pien Ngatel Josaseredoti acelacel koyere pi mino giamia kede giayala but Rubanga, en komio ngasaseredoti noni da poore bedo kede gikame emio but Rubanga.

⁴ Aso, ka koto oudo en etie i lobo kan, koto likame ebedo ngasaseredoti atwal atwala, pien tie josaseredoti kame mio giamia bala kame Iswil mito.

⁵ Gin kitimo tic i kabedo kacil kame obedo apor kede cal me kabedo kacil me i malo; pien bin di oudo Musa mito gero taberenakol, Rubanga oko waco ne be, “Nen be itimo gi dedede di cal bala kame konyuto ni i wi moru.”

⁶ Do nan Yesu tie kede tic kame ber kalamo mergin, bala kame isikan kame en ecungo pire i dierediere ka Rubanga kede jo en kame ber twatwal, pien isikan nono cungo i cikere me gikame beco kato.

⁷ Pien ka koto di isikan me agege oudo li kede raco moro, koto oudo likame emitere pi mono isikan me are mere.

⁸ Do Rubanga udo raco i kom jo mege, en omio ewaco be: “Rwot owaco be, ceng tie bino, kame ango abino timo kede isikan kanyen kede jo me Isirael karacel kede jo me Yuda.

⁹ Likame ebino bedo cal bala isikan kame bin atimo kede joakwari gi, i ceng kame ango oudo amako kede cing gi di ako telo gi wok ki piny me Misiri. Gin bin likame kiko bedo jo kame genere i gwoko isikan kame ango atimo kede gi nono, omio ango likame ako paro pirgi.

¹⁰ Rwot owaco be, isikan kame ango abino timo kede jo me Isirael i kare kame bino bino en ine: Ango abino keto iswilia na i tam gi kede ako wandiko gi i cuny gi, di ango ako bino bedo Rubanga gi, kede gida kiko bino bedo jo na.

¹¹ Di likame tie ngatamoro kame ko bobo bino pwonyo dano ngawote, arabo pwonyo omin mere di ewaco ne be, ‘Ida ngei Rwot.’ Pien gin dedede kibino ngena, cako kibut jo me ruom apiny tuno kede but jo me ruom amalo.

¹² Pien abino bedo kede cuny me kisa but gi pi gikareco gi; di ako bino mino wia wil kede dub gi.”

¹³ Pi kite kame eyamo kede kop i kom isikan kanyen, Rubanga otero isikan kasek bala gikame kare mere do okato. Doko gikame kare mere okato di etie ti udo eyapuno do rwenyo.