Iburanian 6 - Baibuli I Leb Kumam 2013

¹ Pi mano, omeedenu anyim pi bedo jo kocato, do weko dong i kom pwony me agege kenekene kame mako Kirisito. Kur bobo odokunu nyogao pwony me agege kame mako iswilar ki tice kame kony gi li, kede kame mako bedo kede yei i kom Rubanga;

² i kom kop kame mako batisimu, dokakino bad, iyarun me jo oto kede ngolo kop kame bedo nakanaka.

³ Ka Rubanga oyei, obinunu timo manoni.

⁴ Pien dwoko jo opoto ki yei gi pi mino gi swilaro tek, jo kame oudo kong otieko bedo i lero, jo kame obilo udo giamia kame wok ki malo kede jo kame bin oudo Tipo Kacil.

⁵ Gin jo kame bin obilo bero me kop ka Rubanga kede twer me kare kame bino bino.

⁶ Dwoko gi bobo pi mino gi swilaro tek pien gin kitie guro Wot ka Rubanga i kom musalaba di kimie lewic i nyim jo.

⁷ Pien Rubanga mio winyo i lobo kame mato kot kacwei iye nakanaka, di en eko ceko giapita kame tie kede kony but jo kame kotie pure pirgi.

⁸ Do ka okuto kede ocokocok en kame maro tui iye, kony mere udo li, doko udo Rubanga oyapuno lame; ajikini mere en wange kede mac.

⁹ Jo na kame amaro, akadi bed bala wan oyamo kaman, do ki tetu butu, wan ongeo kiber be wun itienu kede gikame beco kalamo, gikame makere kede alako wu.

¹⁰ Pien Rubanga timo gi dedede i yore me ateni; man bino mino likame wie wil kede tic kede amara kame wun inyutunu pire, i tic me konyo jo mege, bala kame pwodi itienu timo.

¹¹ Wan cuny wa mito be ngat acelacel kikom wu poore meede keto cunye iepone noni tuno i ajikini, tetekeny iudunu gikame iketunu iye gen wu.

¹² Man bino mino likame ibedunu kede wackom, do ibinunu bedo jo kame lubo ekite me jo kame udo gikame Rubanga ocikere mino pi yei kede pi dire gi.

Cikere me Ateni me ka Rubanga

¹³ Kakame bin Rubanga omio kede cikere mere but Aburaam, kite kame oudo eli kede ngat kame dwong kalamo en kame koto oudo ekwongere i nyinge, omio en eko kwongere kene

¹⁴ di ewaco be, “Ateteni ango abino mini winyo, di ako mini ikwae atot.”

¹⁵ Kikano, Aburaam oko bedo kede dire di eko udo gikame Rubanga oudo ocikere pi mine.

¹⁶ Jo kwongere di kilwongo nying ngat kame pire tek kalamo gin, doko ikwong gi tie gikame moko kop, kede kame jiko piem dedede.

¹⁷ Iepone nono da, kakame bin Rubanga mito nyuto kede kiber ne jo kame oudo poore udo gikame en ecikere iye be, likame en oudo ebino loko iik mere, omio en eko moko cikere mere kede ikwong,

¹⁸ tetekeny i jamini are kalikame lokere, kede kalikame Rubanga romo bedo kede angalo iye, en cikere kede ikwong mere, wek oudunu nwangcuny, wanunu jo kame otiekunu ringo bute gwokere iye.

¹⁹ Wan otienu kede gen noni bala gikame gwoko kuo wa. En etie gen me ateni doko likame eyangere, en gen kame pororo kalamo egoe kame poko yi tempulo di eko tuno kabedo kacil,

²⁰ kakame Yesu otieko ot iye bala ngat kame otelo ne wa yongayo, di en eko doko Ngatel Josaseredoti me ikar kede ikar, kame lunyo wang Melkisedeki i tic mere me ngasaseredoti.