Iburanian 3 - Baibuli I Leb Kumam 2013

Yesu Pire Dwong kalamo Musa

¹ Pi mano, imiegu kede amiegu na, wun jokacil kame nywako lwongo ka Rubanga, tamunu ber kong i kom Yesu, ngaor kede Ngatel Josaseredoti me yei kame wan otuco.

² En oudo egenere but ngat kame oyere, bala kame Musa da oudo genere kede i ot ka Rubanga.

³ Aso di Yesu poore bedo kede deyo kame kalamo me ka Musa, bala kite kame ngager ot udo kede wor kame kalamo ot kikome.

⁴ (Pien ot acelacel ngatamoro en kame gero, do Rubanga en kame gero jame dedede.)

⁵ Aso Musa oudo genere i ot ka Rubanga bala ngatic, pi mino ijura i kom kop kame oudo Rubanga bino yamo i kare me anyim.

⁶ Do Kirisito genere i tic me lono ot ka Rubanga bala Wode. Wan otienu ode ka omokunu kitek i kom nwangcuny kede i kom ngec aber i kom gen wa.

Jo ka Rubanga bino Wei

⁷ Pi mano, bala kame Tipo Kacil waco kede be, “Kame iwinyunu dwan Rubanga tin,

⁸ kur ibedunu kede tekwic bala kame bin joakwari wu ojemo kede, i ceng kame kitama kede i tim.

⁹ Gin kitama ki kuno, bed bala oudo kineno tice kame ango abedo timo pi mwakini ot ongwon.

¹⁰ Pi mano, lwak nono oko wango cunya di ako waco be, ‘Gin nakanaka tam gi parao tenge kibuta, gin kidagi lubo yote na.’

¹¹ Ango oudo alilo ako kwongere be, ‘Gin likame kibino donyo i wei na.’ ”

¹² Imiegu kede amiegu na, gwokerenu tetekeny kur ngatamoro kikom wu bed kede cuny arac, cuny kalikame yei, kame parao tenge kibut Rubanga kakuo.

¹³ Do konyerenu kenu kenu ceng dedede, tek ka kolwonge be “Tin”, tetekeny kur ngatamoro kikom wu bed ngaepali pi angalo me dub.

¹⁴ Pien wan dedede onywakunu kede Kirisito ka omokunu kitek tuno i ajikini i kom gen atek kame bin otienu kede i agege.

¹⁵ Pien iwandik kacil waco be, “Ka iwinyunu dwan Rubanga tin, kur ibedunu kede tekwic bala kame bin joakwari wu ojemo kede.”

¹⁶ Aso, alu igonogo kame bin owinyo dwan Rubanga di kiko jemo ne? Mam gin oudo kibedo jo kame bin oyai ki Misiri di Musa en kame telo gi?

¹⁷ Do alu en kame bin owango cunye pi mwakini ot ongwon? Mam jo kame bin odubo igonogo, kame oko to i tim?

¹⁸ Doko alu en kame bin Rubanga okwongere i kom gi be likame kibino donyo i wei mere? Mam jo kame bin odagi winyo kop mere igonogo?

¹⁹ Aso wan oneno be gin likame kiko twero donyo i piny nono pien oudo likame kiyei.