Iburanian 2 - Baibuli I Leb Kumam 2013

Alako me Aura

¹ Pi mano, wan miero oketunu tam wa kitek i kom gikame otiekunu winyo, tetekeny kur oparaunu tenge kiye.

² Pien ka kop kame bin imalaikan otuco oudo tie me ateni, di jo kame bin odagi winye oko udo alola kame poore ne gi,

³ wan do obinunu bwot benyo benyo ka odagunu twon alako kame cal kamano? Rwot en kame bin ogeo tuco kop me alako noni, di jo kame bin owinyo kibute oko moko ne wa be en gi me ateni.

⁴ Rubanga da di oko mino ijura mere ki gianena kede ki gi me isuur kede ki giaura apapat kede ki giamia me Tipo Kacil, kame bin en epopoko di lubere kede mit mere.

Ngat kame Mio wa Oudunu Alako

⁵ Pien likame Rubanga oketo piny anyen kame oyaro bino i loc me imalaikan, piny kame wan otie yamo kop i kome.

⁶ Do ngatamoro omoko i iwandik kacil be, “Dano obedo nyo en kame mio in iparo pire; kom dano adana en kame in iparo pire?

⁷ In imie ruom kame tie piny me ruom me imalaikan pi kare moro acecek; in ingape kede deyo kede wor,

⁸ di iko keto jame dedede i loc mere.” Nan do kite kame Rubanga oketo kede jame dedede i loc ka dano, likame tie gimoro kame eweko ooko me loc nono. Bala kame nataman etie kede, likame pwodi wan oneno gi dedede di tie i loc ka dano.

⁹ Do wan oneno Yesu, ngat kame oudo komio ruom apiny me imalaikan pi kare moro acecek, nataman komie deyo kede wor pi can me to kame ebeo iye, tetekeny pi kisa ka Rubanga, en ebil to pi jo dedede.

¹⁰ Pien oudo etie gikame opoore pi Rubanga, ngat kame ocweo jame dedede, kede kame jame dedede tie pire, pi mino ngat kame ocako alako beno i can me to, kame oko mine edoko ngat kame oudo epoore bedo. Rubanga otimo kaman tetekeny emi jo atot nywak deyo mere.

¹¹ Pien ngat kame lonyo jo, kede jo kame kotieko lonyo, gin dedede kitie kede Papa gi acel. Manoni en komio lewic likame mako Yesu pi lwongo gi be imiegu kede amiegu mege.

¹² Pien ewaco ne Rubanga be, “Ango abino tuco nyingi but imiegu kede amiegu na; abino paki i dier ekodet me jo kocokere.”

¹³ Bobo ewaco be, “Ango abino keto gen na i kome.” Kede bobo be, “Neni, ango ine kede jo kame Rubanga omia.”

¹⁴ Bala kame jo obedo giacwea kame tie kede remo kede ringo, Yesu da kikome oko nywako cal gi nono, tetekeny pi to mere wek eloi Sitani ngat kame tie kede twer me kelo to,

¹⁵ di eko gonyo jo dedede kame oudo tie ipasoi pi kare me kuo gi lung pi lworo to.

¹⁶ Pien ateteni en likame etie paro pi imalaikan, do en etie paro pi ikwae ka Aburaam.

¹⁷ Pi mano, en miero oudo edok cal bala imiegu kede amiegu mege i yore dedede, tetekeny ebed Ngatel Josaseredoti, kame ngakisa kede kame genere i tic ka Rubanga, me wek ebed giayala kame kwanyo dub me jo.

¹⁸ Pien bala kame eda kikome eneno kede can doko ebeo i aomacuny, en ekaruno konyo jo kame beo i aomacuny.