Iburanian 10 - Baibuli I Leb Kumam 2013

¹ Bala kame iswil obedo kede cal me gikame beco kame bino bino, do weko ginogo kikokome, likame etwero temuno jo kame bino but Rubanga pi giamia kame koyalo bute mwaka i mwaka nogo.

² Pien ka koto tie kamanono, mam koto do kotieko jiko yalo gi? Pien ka koto di oudo kotieko lonyo jo kame woro Rubanga tien acel atwal, koto likame bobo gin kimeede ngeno i cuny gi be gin kidubo.

³ Do bala kame etie kede, giayala nogi poo wi jo i kom dub gi mwaka acelacel.

⁴ Pien remo me twonin kede me diegi likame twero kwanyo dub.

⁵ Pi mano, kakame Kirisito obino kede i piny, en eko waco be, “In likame imito giayala kede giamia, do in iketo na koma.

⁶ Giamia me awanga kede giamia pi dub likame yomo cunyi.

⁷ Di do ango ako waco be, ‘Neningo, Rubanga, ango atieko bino pi timo mit nin, bala kame kowandiko kede kop i koma i itabu me Iswil.’ ”

⁸ Me agege en ewaco i malo kano be, “In likame cunyi mito giayala, kede giamia, kede giawanga, kede giamia pi dub, doko likame kiyomo cunyi” (magi dedede komio but Rubanga bala kame Iswil mito).

⁹ Di en eko meede be, “Neningo ango atieko bino pi timo mit nin.” Pi mano, en ekwanyo tenge giayala me agege, di eko lunyo gi kede me are.

¹⁰ Doko pi mit mere nono, wan kotieko lonyo wa pi giamia me kom Yesu Kirisito kame kotieko yalo tien acel atwal.

¹¹ Ngasaseredoti acelacel cungo timo tic mere ceng acelacel di eruruco mino giayala acel nono kalikame twero kwanyo dub.

¹² Do kakame Kirisito otieko mino kede giayala acel kenekene pi dub tien acel atwal, en eko bedo i bad tetu cam ka Rubanga.

¹³ Cako i kare nono, en etie daro Rubanga pi mine nyono jokwor mege i tiene bala abanya me teno tien.

¹⁴ Piento en emio giayala kicel kenekene di eko temuno pi kare lung jo kame kotieko lonyo.

¹⁵ Doko Tipo Kacil da mio wa ijura i kom kop noni, pien me agege en ewaco be,

¹⁶ “Man en isikan kame ango abino timo kede gi kame kare nono otuno, Rwot en owaco: Ango abino keto iswilia na i cuny gi, di ako wandiko gi i tam gi.”

¹⁷ Doko en eko medo be, “Likame bobo abino yutuno dub gi kede tim gi areco.”

¹⁸ Aso, kame kotieko sasiro dub nogi, likame bobo pwodi komio giayala moro pi dub.

Poore Onyikunu but Rubanga

¹⁹ Pi mano, imiegu kede amiegu na, bala kame otienu kede gen atek me donyo i Kabedo Kacil Kalamo pi remo ka Yesu,

²⁰ piento en etieko yabo ne wa yongayo anyen kakuo, kame pelao egoe kame poko isenge, manono en kome;

²¹ kede bala kame otienu kede ngasaseredoti kame pire dwong, kame lo ot ka Rubanga,

²² wek do onyikunu but Rubanga kede cuny me ateni kede yei kame genere, di otienu kede cuny kotieko lonyere ki ngec me timo gikarac kede di kotieko lwoko kom wa kede pii acil.

²³ Poore olidunu kitek gen kame otucunu abongo riarianga; pien Rubanga ngat kame ocikere genere.

²⁴ Doko poore omounu epone me mino ngat acelacel bedo kede amara kede tice abeco,

²⁵ di likame owekunu ariamakin karacel, bala kame jo mogo onao timo. Do poore idiunu cuny ngat acelacel, twatwal mere pi kite kame nan inenunu kede Ceng nono tie do noko.

²⁶ Pien ka wan omeedenu timo dub akaa ingei wan ngeno ateni, likame tie giayala moro kame odong kame bino kwanyo dub wa,

²⁷ do gikame odong do en lworo me ngolo kop kede mac ager kame bino wango jo kame dagi Rubanga.

²⁸ Ngatamoro kame turo Iswil ka Musa, koneke abongo kisa, ka jo are arabo adek omio ijura be etimo kamanono.

²⁹ Iparunu be ngat kame cao Wot ka Rubanga, kede kame pwoko remo me isikan kame kolonye kede, doko kame yeto Tipo me kisa, alola mere bino do bedo dwong benyo?

³⁰ Pien wan ongeo ngat kame bin owaco be, “Tic me culo kwor en mera; ango abino culo”; kede doko be, “Rwot bino ngolo ne jo mege kop.”

³¹ Etie gi me lworo pi poto i cing Rubanga kakuo.

³² Yutununu kong kare kokato, i kare kame bin iutenu kede can di ikanyakinunu, ingei wun bedo kede lero ka Rubanga.

³³ I kare mogo oudo koyeyeto wu di kotidilo wu i nyim jo; kede i kare mogo inywakunu can kede jo kame kotimo ne gi kamanoni.

³⁴ Pien wun oudo itienu kede cuny me isasir i kom jo kame oudo kotweo i otkol, doko kede yomcuny iyeunu koyako jame wu, pien wun oudo ingeunu be wun kikomu oudo itienu kede gimoro kame ber kalamo, kame bedo nakanaka.

³⁵ Pi mano, kur iucunu tenge gen atek kame itienu kede, kame tie giamia me pwoc adwong.

³⁶ Pien emitere ne wu pi kanyakino, tetekeny itwerunu timo gikame Rubanga mito di ikounu udo gikame ecikere pi mino.

³⁷ Pien iwandik kacil waco be, “Odong kare acecek di ngat koyaro bino ko bino bino; en likame ebino gal.

³⁸ Do jo na kopoore bino bedo kede yei di kiko kuo; do ka ngatamoro kikom gi yei mere odok cen, cunya likame bino bedo yom i kome.”

³⁹ Wan likame obedunu jo kame dok cen di kiko rwenyo atwal, do wan obedunu jo kame kotieko lako pi yei.