Gianyuta 9 - Baibuli I Leb Kumam 2013

¹ Di malaika me kany oko kuto agwara mere, di ako neno acer kame oudo opoto ki malo, di oko mine sumilito me dog bur atut wiriwir.

² Acer nono oko yabo dog bur atut wiriwir nono, di yiro kame cal bala yiro kame wok kiye epipa adwong me calaro mwola oko duny kiye, kame oko umo wang ceng kede malo dedede.

³ Di obonyo oko wok ki yiro nono bino i lobo, di oko mino gi twer acal bala me ekiliton.

⁴ Oudo koyamo ne gi be kur kidudubo lum me lobo arabo gikame tui amoto yen, do kenekene kimi jo kalikame tie kede alama ka Rubanga i tur nyim gi lito.

⁵ Oudo likame koyei ne gi neko jo, do oudo koyei ne gi mino gi lito pi dwete kany. Lito kame kimio jo oudo cal bala lito kame ekiliton mio kame ekao dano.

⁶ I kare nono jo bino mono to, do likame kibino ude; kibino mito be koto kitoi, do to bino ringo tenge kibut gi.

⁷ Obonyo nogo oudo cal bala asigiran kame kotieko iiko pi ot yi. Gikame cal bala ocoro me angosibib kame otimo kede saabu oudo tie i wi gi, kede nyim gi oudo cal bala nyim jo.

⁸ Yer me wi gi oudo cal bala yer me wi mon, kede lak gi oudo cal bala lak engu.

⁹ Abokoya me kom gi oudo cal bala ebuku me nyonyo kame jo ngapo i kor gi, kede mor me bwom gi oudo winyere bala mor me cabalan atot me yi, kame asigiran tie wano ringo kede i yi.

¹⁰ Oudo gin kitie kede yib gi kame lak gi me kakao jo tie iye bala ekiliton. Twer gi me kakao jo pi dwete kany oudo tie i yib gi.

¹¹ Malaika kame lo bur atut wiriwir en kame oudo obedo abaka gi. Nyinge i leb Eburania en Abadon, do i leb Gurik kolwonge be Apoliyon.

¹² Can me agege otieko kato, do nenunu, can are pwodi odong tie bino.

¹³ Di malaika me kanyape oko kuto agwara mere, di ako winyo dwan moro wok ki isondana ongwon kame cal bala tung le, isondana me alutari kame kotimo kede saabu, alutari kame tie i nyim Rubanga.

¹⁴ Dwan nono oudo waco ne malaika me kanyape kame oudo tie kede agwara be, “Gony imalaikan ongwon kame kotweo i ecilet adwong me Eupurate.”

¹⁵ Aso, di oko gonyo imalaikan ongwon nogo, gin oudo kotieko iiko gi cuto kitie daro esawa nono, ceng nono, duwe nono kede mwaka nono, pi neko acel i kom adek me jo dedede.

¹⁶ Ango ako winyo wel me isirikalen kame oudo wanano asigiran oudo tie milion tol are.

¹⁷ Epone kame ango oudo aneno kede asigiran nogo i gianyuta en ine: jo kame wanano gi oudo ongapo i kor gi ibukui kame kwar bala mac, kame tie ebululu ebululu bala sapir, kede kame tie bisali bisali bala salupa. Wi asigiran nogo oudo cal bala wi inguon, di mac kede yiro kede salupa wok ki dog gi.

¹⁸ Can adek nogi me mac, yiro kede salupa kame oudo wok ki dog gi oko neko acel i kom adek me jo dedede.

¹⁹ Pien twer me asigiran nogo tie i dog gi kede i yib gi. Yib gi cal bala twole, di kitie kede wi gi kame kimio kede jo awanon.

²⁰ Jo icegun dedede kame can nogi likame oneko, likame oko swilaro ki gikame cing gi otimo, amoto weko woro jwogi, cal jwogi kame kotimo kede saabu, siliba, nyonyo burons, kidi kede yat kame kopao, gi kalikame neno piny amoto winyo kop arabo twero ot.

²¹ Doko da likame gin kiko swilaro ki nek, ki tim gi me jwok, ki caro kede ki tim gi me kuwo.