Gianyuta 3 - Baibuli I Leb Kumam 2013

Kop kame Kocwao Saradisi

¹ “Wandiko but malaika me ekodet me jokirisito kame tie Saradisi be: “Magi en kop me ngat kame tie kede loc i kom tipere kanyaare ka Rubanga, kede kame tie kede acerin kanyaare. Ango angeo tice wu; wun itienu kede nying kame nyuto bala ikuounu, bed bala itounu.

² Ceunu, di ikounu medo teko i gikame pwodi odong, kame nan do iyapiyapi to, pien ango likame audo tice wu tie kakare i nyim Rubanga na.

³ Yutununu gikame oudo kopwonyo wu, kede kame iwinyunu; lubunu gi, kede ikounu swilaro. Aso ka likame iceunu, ango ayaro bino bala ngakuwo, likame ibinunu ngeno esawa kame ango ayaro bino kede butu.

⁴ Do pwodi tie jo mogo anonok Saradisi, jo kalikame opwoko igoen gi; gin kibedo jo kame poore ot karacel kede ango di kingapo igoen atar.

⁵ Ngat kame lo, kobino ngapo ne igoen atar kamanono da, doko ango likame abino weno nyinge tenge kiye itabu me kuo. Ango abino tuco nyinge i nyim Papa na kede i nyim imalaikan mege, be en mera.

⁶ “Ngat kame tie kede yite, wek ewinyi gikame Tipo tie waco ne ikodeta me jokirisito.

Kop kame Kocwao Piladelpia

⁷ “Wandiko but malaika me ekodet me jokirisito kame tie Piladelpia be: “Magi kop me ngat kacil, ngat kame tie kede ateni, kame tie kede sumilito ka Daudi. Ka en eyabo ekeko, likame tie ngatamoro kame karuno cego; doko ka en ecego, likame tie ngatamoro kame karuno yabo.

⁸ Ango angeo tice wu. Nenunu, ango atieko yabo ne wu ekeko tie twolo, kalikame tie ngatamoro kame karuno cego. Ango angeo be akadi bed bala itienu kede teko anonok, do wun ibedunu lubo kop na, doko likame ikounu daga.

⁹ Nenunu, ango ayaro mino jo kame obedo jo me sinagoga ka Sitani, jo kame ngalo be gin Iyudayan do di li, ango abino mino gi kibino di kiko riondiko piny i tienu, di kiko bino ngeno be ango amaro wu.

¹⁰ Pi kite kame ilubunu kede kop na me dire kanyakino, ango abino gwoko wu i kare me atama kame oyaro bino i piny lung, pi tamo jo kame bedo i wi lobo.

¹¹ Ango atie bino i kare kiyapiyapi; makunu kitek gikame itienu kede, tetekeny kur ngatamoro mai giamia me pwoc kame komio wu pien ilounu.

¹² Ngat kame bino lono, ango abino mine ebedo epir i tempulo ka Rubanga na, doko likame ebino yai kiye. Ango abino wandiko nying Rubanga na i kome, kede da nying bomba ka Rubanga na, en Yerusalem kanyen kame bino bino piny yai ki malo kibut Rubanga na. Doko abino da wandiko nyinga anyen i kome.

¹³ “Ngat kame tie kede yite, wek ewinyi gikame Tipo tie waco ne ikodeta me jokirisito.

Kop kame Kocwao but Jo me Laodikia

¹⁴ “Wandiko but malaika me ekodet me jokirisito kame tie Laodikia be: “Magi en kop kowok kibut Amen, mujura me ateni kame genere, ngat kame gi dedede kame Rubanga ocweo ocakere kibute.

¹⁵ Ango angeo tice wu; wun likame ibedunu jo angic amoto aliet. Oudo cunya mito be koto ibedunu jo angic amoto aliet!

¹⁶ Do pien wun ibedunu jo kame momor, jo kalikame ngic amoto liet, abino ngulo wu tenge ki doga.

¹⁷ Pien wun iyamunu be, ango abaro, atieko lony, doko likame tie gimoro kame ango pwodi amito. Do likame ingeunu be wun iliunu kede yomcuny. Itienu jo kame jo poore bedo kede kisa i kom gi, ibedunu jocan, itienu imuduka, doko itienu nono abongo giangapa.

¹⁸ Pi mano, ango atie mino wu tam me wilo kibuta saabu kame kojililo kede mac, tetekeny ibarunu. Doko da iwilunu igoen atar me angapa, me wek iumunu komu ikounu bedo abongo lewic me ot nono. Wilunu da yat me wang pi keto i wangu, tetekeny inenunu piny.

¹⁹ Ango abunano jo kame amaro, doko abitaro gi; pi mano, miero iketunu cunyu di ikounu swilaro.

²⁰ Nenunu, ango atie cungo i dog ekeko di akukungo; ka ngatamoro owinyo dwana di eko yabo ekeko, ango abino donyo i ode di ako cam kede en, di eda eko cam keda.

²¹ Ngat kame bino lono, ango abino mine ebedo keda i kom na me ajakanut, bala kame ango da alo kede di ako bedo kede Papa na i kom me ajakanut mere.

²² “Ngat kame tie kede yite, wek ewinyi gikame Tipo tie waco ne ikodeta me jokirisito.”