Gianyuta 21 - Baibuli I Leb Kumam 2013

Malo Anyen kede Lobo Anyen

¹ Di ako neno malo anyen kede lobo anyen; malo me agege kede lobo me agege oudo otieko rwenyo, doko nam da do oudo li.

² Ako neno bomba kacil, Yerusalem anyen, di tie wok ki malo but Rubanga bino piny, di kotubuso en bala ateran kame kotubuso pi riamo kede cware.

³ Di ako winyo dwan amalo di eyamo ki kom me ajakanut be, “Neningo, paco ka Rubanga tie i diere me jo. En ebino bedo kede gi di gin kiko bino bedo jo mege. Rubanga kikome bino bedo kede gi.

⁴ En ebino weno pige wang gi dedede. To bino bedo li, akadi iturur, akadi koko, akadi aramo, pien udo gi me agege otieko kato.”

⁵ Di ngat kame oudo bedo i kom me ajakanut oko waco be, “Neningo, ango atie mino jame dedede doko nyen.” Doko da ewaco be, “Wandiko man, pien kope nogi genere doko kitie me ateni.”

⁶ Di en eko waco na be, “Kotieko timo gi! Ango en Alpa kede Omega, agege kede ajikini. Ngat kame orio oneko abino mine emato pi me atan me kuo abongo cul moro.

⁷ Jo kame bino lono bino udo gi nogi, di ango ako bino bedo Rubanga gi kede gida kiko bino bedo idwe na.

⁸ Do jo kame lwor, jo kame yei gi opoto, jo kame omunaun, jonek, jocaro, jojwogi, jo kame woro cal jwogi, kede joangalo dedede, kabedo gi bino bedo nam kame liel mac kede salupa, en to me are.”

Yerusalem Anyen

⁹ Di malaika acel kikom imalaikan kanyaare nogo, kame oudo tie kede bakulin kanyaare me egere me can kanyaare me ajikini, oko bino buta di eko waco na be, “Bia, abino nyuto ni Ateran, dako me Katin Romo.”

¹⁰ Twer me Tipo oko uma di malaika nono oko tera i wi moru abor. En eko nyuto na Yerusalem bomba kacil di tie bino piny wok ki malo but Rubanga,

¹¹ di erieny kede deyo ka Rubanga. Rieny mere oudo cal bala kidi me wel kalikame neeno atatai, bala kidi kame kolwongo be jesipa, di emilimili bala akako.

¹² Oudo etie kede twon apama kame bor malo, kame oudo tie kede irutei tomon kiwie are, kame imalaikan tomon kiwie are lo. Oudo kowandiko nying atekerin tomon kiwie are me jo me Isirael i wi irutei nogo;

¹³ tetu kide oudo tie iye irutei adek, tetu malo oudo tie iye irutei adek, tetu piny oudo tie iye irutei adek, kede tetu potoceng oudo tie iye irutei adek.

¹⁴ Apama me bomba nono oudo kogero i wi ingaroi tomon kiwie are me acakini me gedo, kame oudo kowandiko i kom gi nying joor tomon kiwie are me Katin Romo.

¹⁵ Malaika kame oyamo keda oudo tie kede lilim kame kotimo kede saabu me pimo boro, pi pimo kede bomba kede irutei mege, kede apamai mege.

¹⁶ Bad ongwon dedede me bomba nono oudo rorom; nyime oudo rom kede ngete. Malaika nono oko pimo bomba kede lilim mere me pim, en eko udo boro mere tie mairo tutumia acel kede tol kany; laco kede boro mere malo da rom kamanono.

¹⁷ En eko da pimo apama mere, di eko udo boro mere malo tie puti tol are kede tomon kiwie kanyape, manono oudo upere kede epone kame jo pimo kede.

¹⁸ Oudo kogero apama mere kede kidi kame kolwongo be jesipa, do bomba oudo kogero kede saabu kame milimili bala gilasi.

¹⁹ Kotubuso acakini me apama me bomba nono kede kide me wel amalo; me agege oudo obedo kidi kame kolwongo be jesipa, me are sapir, me adek agate, me ongwon emeradi,

²⁰ me kany mere onik, me kanyape karenelia, me kanyaare kirisolit, me kanyauni beril, me kanyangon topas, me tomon kirisopures, me tomon kiwie acel jasinti, me tomon kiwie are ametisit.

²¹ Irutei tomon kiwie are nogo oudo obedo kide tomon kiwie are me wel amalo. Erute acelacel kikom gi oudo kotimo kede kidi me wel amalo. Gudo me bomba nono oudo kotimo kede saabu kicararai bala gilasi.

²² Likame aneno tempulo moro i bomba nono, pien tempulo mere en Rwot Rubanga Won Twer kede Katin Romo.

²³ Doko rieny me ceng amoto duwe likame mitere i bomba nono, pien deyo ka Rubanga en obedo lero mere, kede etala mere en Katin Romo.

²⁴ Atekerin dedede bino bedo i lero mere, kede abakai me wi lobo bino tero deyo gi iye.

²⁵ Likame kobino cego irutei mege iceng, doko iwor likame bino bedo tie kuno.

²⁶ Jo bino tero iye deyo kede abar me atekerin.

²⁷ Do likame tie gi kalikame cil kame bino donyo iye, akadi ngatamoro kame timo tim me emuna arabo kame yamo kop me abe, do kenekene jo kame kowandiko nying gi i itabu me kuo, itabu me Katin Romo, en kame bino donyo iye.