Gianyuta 19 - Baibuli I Leb Kumam 2013

¹ Ingei man, ango di ako winyo gikame oudo winyere bala wo me dwan ekodet me jo i malo, di kiwaco be, “Aleluya! Alako, deyo kede twer obedo me ka Rubanga wa.

² Piento en engolo kop i ateni kede kakare. En etieko ngolo kop ne twon malaya kame oudo odubo lobo kede tim mege me caro. Rubanga otieko culo kwor i kome pi remo me jotic mege.”

³ Gin bobo kiko medo waco be, “Aleluya! Yiro me wang mere duny malo ikar kede ikar.”

⁴ Di joadongo ot are kiwie ongwon kede giacwea ongwon kame kuo, oko riebere piny di kiko woro Rubanga ngat kame oudo tie bedo i kom me ajakanut, di kiwaco be, “Amen. Aleluya!”

Ebaga me Nyom me Katin Romo

⁵ Di dwan oko wok ki kom me ajakanut di waco be, “Pakunu Rubanga wa, wun jotic mege dedede, wun jo kame itienu kede wor bute, jo me ruom apiny kede me ruom amalo.”

⁶ Di ako winyo gikame oudo winyere bala dwan jo atot, bala mor me pii atot kame mol di ony, kede bala mor me kot, di waco be, “Aleluya! Pien Rwot Rubanga wa Won Twer tie i loc.

⁷ Mito obedunu kede kilel kede yomcuny di okounu mine deyo, pien kare me nyom me Katin Romo otieko tuno. Doko ateran mere otieko iikere,

⁸ kotieko mine egoe acil kame meny pi ngapo.” (Egoe ameny nono en tim kopoore me jokacil.)

⁹ Di malaika nono oko waco na be, “Wandiko kop ni be: kitie kede winyo gin jo kame kolwongo gi i ebaga me nyom me Katin Romo.” Doko en eko waco na be, “Magi obedo kope me ateni kame owok kibut Rubanga.”

¹⁰ Di ango ako riebere piny i tiene pi wore, do en eko waco na be, “Kur itim kamano! Ango atie ngatic bala in karacel kede imiegu kede amiegu kame lubo ijura kame Yesu omio. Wor Rubanga.” Pien ijura kame Yesu omio en mio inabin murao.

Ngat kame Wanano Asigira Atar

¹¹ Di ako neno malo oyabere, ako neno asigira atar di tie iye. Ngat kame oudo tie wanano asigira nono oudo kolwongo be Egenere, kede Ateni; en engolo kop doko eyi i yore kopoore.

¹² Wange cal bala leb mac, di etie kede icoron atot me angosibib i wie. Doko oudo etie kede nying kame kowandiko i kome, kalikame ngatamoro ngeo do kwanyo en kenekene.

¹³ Oudo engapo ekanso kame korwako i remo, kede nying kame kolwonge kede en “Kop ka Rubanga”.

¹⁴ Di isirikalen me malo, kame oudo ngapo igoen ameny, atar di cil, oudo lube di kiwanano asigiran atar.

¹⁵ Epima abit oudo opelao ooko ki doge, kame en ebino bwono kede atekerin. En ebino pugo gi kede ebela me lilim, doko ebino nyonyono olok kame tie i bur kame obio kede bwini me lilo ka Rubanga Won Twer.

¹⁶ I ekanso mere kede i amuro mere oudo kowandiko iye nying be, “Abaka me abakai kede Rwot me rwode.”

¹⁷ Di ako neno malaika moro di tie cungo i wi ceng, di eko lwongo winy dedede kame por i wi yamo malo kede dwan amalo be, “Bianu, cokerenu pi ebaga adwong ka Rubanga,

¹⁸ pi camo ringokom abakai, me kom jodongo me isirikalen, me kom joatek yi, me kom asigiran kede me jo kame wanano gi, ringokom jo dedede, jo kalikame ipasoi kede ipasoi, jo me ruom apiny kede me ruom amalo.”

¹⁹ Di ako neno le kede abakai me wi lobo karacel kede isirikalen gi, di kicokere pi yi kede ngat kame oudo bedo i wi asigira kede isirikalen mege.

²⁰ Di oko mako le nono di oko tere bala mabus, karacel kede enabi me angalo kame oudo otimo gianena i nyime, kame engalo kede jo kame oudo tie kede alama me le nono, kede jo kame oudo oworo cal mere. Di oko uco gin are nogi di kikuo i nam me salupa kame liel.

²¹ Di oko neko jo apat kede epima me ngat kame bedo ingei asigira, epima kame oudo opelao ki doge. Di winy dedede oko pece kede ringokom gi.