Gianyuta 16 - Baibuli I Leb Kumam 2013

Bakulin me Lilo ka Rubanga

¹ Di ango ako winyo dwan amalo kame owok ki tempulo di waco ne imalaikan kanyaare nogo be, “Otunu ionyunu lilo ka Rubanga kame tie i bakulin kanyaare go i wi lobo.”

² Malaika me agege oko ot di eko onyo gikame oudo tie i bakuli mere i wi lobo, di tuo arac me buge alit oko mako jo kame oudo tie kede alama me le, kede jo kame oudo oworo cal mere.

³ Malaika me are oko onyo gikame oudo tie i bakuli mere i nam adwong, di pii me nam oko lokere odoko cal bala remo me dano oto, di gi dedede kame kuo i nam oko to.

⁴ Malaika me adek oko onyo gikame oudo tie i bakuli mere i icileta kede i ataneko me pii, di gin dedede kiko doko cal bala remo.

⁵ Di ako winyo malaika kame lo pii di waco be, “In itimo gikame poore pi cwano alola nogi, in Ngat Kacil, ngat kame tie nataman kede kame oudo tie sek.

⁶ Pien jo oonyo remo me jokacil kede me inabin, di in nan iko mino gi remo pi mato. Manono poore kede gi!”

⁷ Di ako winyo alutari di waco be, “Ebo, Rwot Rubanga Won Twer, ngolo kop kame in imio tie me ateni doko etie kakare!”

⁸ Malaika me ongwon oko onyo gikame oudo tie i bakuli mere i kom ceng, di oko yei ne ceng wango jo kede lieto mere kame rom kede me mac.

⁹ Lieto kodop me ceng oko wango jo, di gin kiko bedo kede acae i nying Rubanga ngat kame oudo tie kede twer i kom alola nogi, doko likame kiko swilaro ki dub gi, akadi mine deyo.

¹⁰ Malaika me kany oko onyo gikame oudo tie i bakuli mere i wi kom me ajakanut me le nono, di piny kame en oudo epugo oko doko col. Jo oko kakao leb gi pi lito,

¹¹ di kicao Rubanga me malo pi aramo kede buge gi, do likame kiko swilaro ki tice gi areco.

¹² Malaika me kanyape oko onyo gikame oudo tie i bakuli mere i ecilet adwong me Eupurate. Ecilet nono oko tuo pi iiko yongayo ne abakai kame wok ki tetu kide.

¹³ Di ako neno tipere areco adek, kame cal bala igwalogwalon, di kitie wok ki dog twol kiyiliyili, ki dog le noca, kede ki dog enabi me angalo.

¹⁴ Gin tipere kame obedo jwogi, kame timo gianena; gin kioto but abakai dedede me piny lung pi coko gi karacel pi yi i Ceng adwong ka Rubanga Won Twer.

¹⁵ “Nenunu, ango atie bino bala ngakuwo! Etie kede winyo ngat kame bedo di eneeno, ngat kame ongapo igoen mege tetekeny kur eot nono di lewic ko make.”

¹⁶ Di tipere nogo oko coko abakai karacel i kabedo kame kolwongo i leb Eburania be Amagedon.

¹⁷ Malaika me kanyaare oko do onyo gikame oudo tie i bakuli mere i wi yamo, di dwan amalo oko wok ki kom me ajakanut kame tie i tempulo di waco be, “Kotieko time!”

¹⁸ Di asara me meny kame cal bala me kot, icelakin, amwocumwocun kede yangere atek me piny, kame lem pwodi likame otimere cako jo bedo i wi lobo oko timere. Yangere me piny nono oudo rac adikinicel.

¹⁹ Bomba kame dwong nono oko barere kidek, di bomban me pinye dedede oko popoto piny. Di Rubanga oko yutuno Babilon adwong, di eko mine mato bwini ki ikopo mere, bwini kame obedo lilo mere.

²⁰ Cula dedede oko rwenyo, doko likame tie moru moro kame oko dong.

²¹ Akako adongodongo, kame peko gi romo kilo ot kany oko popoto ki malo i kom jo, di jo oko bedo kede acae i kom Rubanga pi alola me akako noni, pien oudo ebedo alola kame rac adikinicel.