Gianyuta 15 - Baibuli I Leb Kumam 2013

Imalaikan kede Alola Kanyaare me Ajikini

¹ Di ako neno twon gianena me aura ace i malo. Aneno imalaikan kanyaare kame tie kede alola kanyaare, kame obedo alola me ajikini, pien gin en kame kibedo ajikini me lilo ka Rubanga.

² Di ako neno gikame oudo cal bala nam me gilasi kame onyalere kede mac. Aneno da jo kame bin obwono le nono karacel kede cal mere kede namba me nyinge, di kitie cungo i nget nam me gilasi, di kimako adungu ka Rubanga i cing gi.

³ Oudo gin kitie wero wer ka Musa ngatic ka Rubanga, kede wer me Katin Romo be, “In Rwot Rubanga Won Twer, tice ni dongodongo doko kibedo me aura. In Abaka me atekerin dedede, in itimo gi dedede i yore kopoore kede me ateni.

⁴ Rwot, ngai kalikame bino lworo nyingi kede mine deyo? Pien in keni en ngat kacil. Atekerin dedede bino bino di kiko wori, pien tice ni me ateni otieko nyutere.”

⁵ Ingei man, di ako neno tempulo kame tie i malo di oyabere, kame kima me eema me isikan tie iye.

⁶ Imalaikan kanyaare kame oudo tie kede alola kanyaare di oko wok ki tempulo. Oudo kingapo igoen acil kame meny, di kitweo ausin me saabu i kor gi.

⁷ Di acel kikom giacwea akuo ongwon oko mino imalaikan kanyaare nogo bakulin kanyaare kame kotimo kede saabu, kame opongo i yi gi lilo ka Rubanga, ngat kame bedo ikar kede ikar.

⁸ Yiro kame wok ki deyo ka Rubanga kede ki twer mere oko pong i yi tempulo, doko oudo likame tie ngatamoro kame karuno donyo iye tuno kede di alola kanyaare kame imalaikan kanyaare ka oudo okelo otiek.