Esita 8 - Baibuli I Leb Kumam 2013

Owaco ne Iyudayan Yi kede Jo Asuro gi

¹ Cenge nono Abaka Sereses oko mino Esita jame ka Kaman, ngakwor me Iyudayan. Di Modekai oko ot but abaka, pien Esita oudo owaco ne abaka be Modekai obedo wad kede en.

² Di abaka oko woto epeta mere kame alama tie iye, kame en oudo egamo kibut Kaman, di eko mino Modekai. Esita oko keto Modekai obedo ngadwong kame lo jame ka Kaman.

³ Di Esita bobo oko yamo kede abaka. En eriebere piny i tiene di ekok di engangao en pi gengo iik arac kame Kaman, akwar Agag oudo otimo me neko Iyudayan.

⁴ Abaka oko rieno ebela mere me pug kame kotimo kede saabu but Esita,

⁵ di Esita oko yai malo di eko cungo i nyim abaka. En eko waco ne be, “Ka manoni yomo cuny abaka, kede ka imara, doko ka gi noni poore i nyimi, di in iyei kop na, ango akwai iwandiko cik kame turo kop me baluwan kame Kaman wot ka Kamedata akwar Agag oudo owandiko, di emio cik me neko Iyudayan kame tie i adulion kame in ipugo dedede.

⁶ Pien benyo benyo kame ango akaruno dino kede cunya di atie neno can tie bino i kom jo na? Arabo benyo benyo kame ango akaruno dino kede cunya di aneno kotie muducaro joawade na?”

⁷ Di abaka Sereses oko waco ne dako mere Esita kede Modekai Eyudayat be, “Neningo, ango atieko mino Esita jame ka Kaman, doko kotieko dene pien oudo etimo iik arac me neko Iyudayan.

⁸ Aso, in wandiko kop kame cunyi mito di iko cwano ne Iyudayan i nying abaka. Wace gi gimoroni kenekene kame in imito, di iko dongo iye alama ka abaka. Do poore iyutuno be gimoroni kenekene kame kowandiko i nying abaka di oko dongo iye alama mere likame kokaruno loko.”

⁹ Man bin otimere i buto duwe ot are kiwie adek me duwe me adek, en duwe me Siban. Modekai oko lwongo ikalanin ka abaka di en eko bedo waco ne gin kop di gin kiwandiko i baluwan pi cwano ne Iyudayan, jopug, kede jotel me adulion dedede cako ki India tuno Abisinia, gin dedede adulion tol acel kede ot are kiwie kanyaare (127). Baluwan nogo bin kowandiko but adul acelacel kede leb kame koyamo i adul nono kede i epone kame jo wandiko kede i adul nono; but Iyudayan da gin kitimo kamanono.

¹⁰ Modekai omio kowandiko baluwan i nying Abaka Sereses, di en eko dongo i kom gi alama ka abaka. En eko cwano baluwan nogo kede jo kame ringo kede asigiran adwir kame kokwanyo kikom me ka abaka.

¹¹ Baluwan nogo oudo tie kede kop kame waco be abaka otieko yei ne Iyudayan kame tie i bomban dedede pi ribere di kiko yi pi gwoko kuo gi. Gin oudo koyei negi neko di kiko tieko pitipit jo me ateker moroni kenekene arabo jo me adul moro kame bino suro gi, idwe gi arabo mon gi, di kiko yako jamini gi.

¹² Cik noni oudo miero cakere i adulion dedede kame Abaka Sereses pugo, i buto duwe tomon kiwie adek i duwe me tomon kiwie are, en duwe me Adar.

¹³ Baluwan me cik noni oudo miero cwai i adul acelacel pi bedo iswil kame ngere but jo dedede, tetekeny Iyudayan bed di kiikere i ceng nono pi timo onyanga i kom jokwor gi.

¹⁴ Joor kame bin tero baluwan nogo oko yito ingei asigiran gi adwir kame kokwanyo kikom me abaka, di kiko ringo kede teko di kilubo cik ka abaka. Cik nono da bin oko mine ongere but jo i Susa, en bomba adwong.

¹⁵ Modekai oko yai kibut abaka di engapo ikanson me ajakanut me erangi ebululu ebululu kede atar, ekoti akwakwar kame kotimo kede egoe ameny di epwot, kede twon ocoro me ajakanut kame kotimo kede saabu. Di jo me bomba me Susa oko kilel di kilelemo.

¹⁶ Iyudayan oko bedo kede ilel, kweicuny, kede yomcuny, kede jo oko mino gi wor.

¹⁷ I adulion kede i bomban dedede, kabedere dedede kame cik ka abaka oko tuno iye, Iyudayan obedo kede yomcuny kede ilel, di kiko tedo ebaga kede kiko bedo kede ceng me wei. Manoni oko mino jo atot me atekerin me piny nono oko donyo waco be gida kibedo Iyudayan, pien gin oudo do kitie kede lworo i kom Iyudayan.