Esita 6 - Baibuli I Leb Kumam 2013

Abaka Omio Wor but Modekai

¹ Iwor nono abaka likame oko karuno nino, omio eko mino cik be kel itabu kame kowandiko iye kop me itatam amako ajakanut mere di oko somo ne.

² I itabu nono bin oko udo kakame kowandiko iye epone kame Modekai otuco kede iik kame Bigitana kede Teresi oudo otimo pi koto neko abaka, gin abwocin me paco ka abaka kame bin daro agolai ka abaka.

³ Abaka oko penyo jo be, “Wor nyo arabo ruom mene kame oko mino Modekai pi gikame en eko timo noni?” Jotic mege kame gwoke oko gamo be, “Likame tie gimoro kame kotimo ne.”

⁴ Abaka oko penyere be, “Ngai kame tie i diakal?” Esawa nono Kaman oudo pwodi otuno atuna i diakal me ooko me paco ka abaka. En oudo etie ot pi yamo ne abaka kop me deno Modekai kakame en oudo etieko iiko ne.

⁵ Aso, jotic ka abaka bin oko waco ne be, “Kaman ica tie cungo i diakal.” Abaka oko waco be, “Mie edonyi i ot.”

⁶ Aso, Kaman bin oko donyo i ot di abaka oko penye be, “Nyo kame kobino timo ne dano kame cuny abaka mito mino wor?” Kaman oko waco i cunye kene be, “Ngai kame cuny abaka romo mito mino wor apat kede ango?”

⁷ Aso Kaman oko waco ne abaka be, “Ka abaka cunye mito mino dano moro wor,

⁸ mito kel ikanson me ajakanut, kame abaka kikome lem ngapo, kede asigira kame lem abaka ringo kede di ongapo ne i wie engape me ajakanut.

⁹ Di oko bino mino ikanson nogo kede asigira nono but ngat acel kikom jopug ka abaka kame en emio dwongo kalamo jo icegun, di en eko ngapo ne ngat kame abaka cunye mito mino wor nono ikanson nogo, di en eko tele ebeo kede i dier kacokere me bomba di dano nono bedo i ngei asigira ka abaka. Ngat kame telo dano nono bino lelemo di gin kitie ot be, ‘Manoni en gikame kobino timo ne ngat kame abaka cunye mito mino wor.’ ”

¹⁰ Di do abaka oko waco ne Kaman be, “Tim awakawaka, kwany ikanson kede asigira bala kame in itieko waco, di iko timo kamanono ne Modekai Eyudayat kame bedo i erute me paco na. Kur iwek gimoro kikom gikame in iwaco.”

¹¹ Aso, Kaman oko kwanyo ikanson kede asigira, di en eko ngapo ne Modekai ikanson di eko tele ebeo kede kacokere me bomba di elelemo be, “Manoni en gikame kobino timo ne ngat kame abaka cunye mito mino wor.”

¹² Di do Modekai oko dok i erute me paco ka abaka, do Kaman oko onyaro eoto ture kede twon lewic.

¹³ Kaman oko waco ne dako mere Seresi kede adiereson mege dedede gikame oudo oko timere ne. Di dako mere kede jo kame bin mie tam oko waco ne be, “Ka Modekai obedo Eyudayat, manoni obedo acakini me peko kame in ibino udo, doko likame in ibino bwone, do ateteni ibino udo peko.”

Koneko Kaman

¹⁴ Di pwodi gin oudo kitie yamo, abwocin me paco ka abaka di tuno di kiko tero Kaman awakawaka i ebaga kame Esita oudo oiko.