Esera 9 - Baibuli I Leb Kumam 2013

Esera Ongeo be Jo Isirael Onyomere kede Atekerin Apat

¹ I ngei timo gi nogi dedede, jotel mogo me jo Isirael oko bino buta di kiko waco na be jo me Isirael, josaseredoti, kede Jolebi likame opokere kede jo me pinye apat kame tie bedo i lobo nono. Gin oudo kitieko donyo timo jamini me kwer me jo Kanan, jo Kiti, jo Perisi, jo Yebu, jo Amon, jo Moab, jo Misiri, kede jo Amor.

² Jo me Isirael oudo odonyo nyomere kede jo nogo. Manono omio jo kacil ka Rubanga oudo onyalare kede jo me lobere nogo. Jotel kede jotic en kame bin ocako timo dub noni.

³ Kakame ango awinyo kede kop noni, ako nyinyilo igoen me koma pi cwercuny, apuputo yer me wia kede me tika, di ako bedo piny di teko otiek i koma.

⁴ Di do jo dedede kame bin tie kede lworo pi kop kame Rubanga me Isirael oudo owaco i kom dub me jo kame oudo odwogo ki obukui, oko cokere buta di kiko bedo keda kanono tuno esawa me mino giayala me otieno.

⁵ Kakame esawa me mino giayala me otieno oromo kede, ango ako yai ki kakame oudo atie tururo iye, di angapo igoen na konyinyilun nogo, di ako riondiko piny, ako tingo cinga malo but Rubanga na,

⁶ di ako lego be, “Okwe Rubanga na, ango lewic omaka kitek omio likame aromo tingo wanga malo buti. Dub wan meede ameda, kimukurukin kalamo wi wa, kituno malo i edou.

⁷ Cako i kare ka joakwari wa tuno tin wan obedo timo dub kamanono. Dub wa nono en komio wan jo Isirael kede abakai wa, kede josaseredoti wa, obedo poto i cing abakai me pinye apat, di oko neneko wa, omako wa di oko tero wa bala mabus, koyako wa, kede komio wa twon lewic, kiton tuno tin.

⁸ Do nataman pi kare moro katitidi, Okwe Rwot Rubanga wa, in itimo wan kisa di iko mino mogo kikom wa obwot ki ipasun, di oko donyo bedo kabedo nin kacil noni. In ilako wan ki ipasun di iko mino wa kuo anyen.

⁹ Wan oudo obedo ipasoi, do in Rubanga wa likame iko jalo wa i ipasun. In inyuto ne wan amara nin kalikame lokere di iko mino abakai me Pasia otimo ne wan bero; imio wan kuo anyen di oko gero tempulo nin kame oudo odoko ameje, kede iko gwoko wa i Yuda kanoni kede i Yerusalem.

¹⁰ “Do nataman, Okwe Rubanga wa, kop nyo kame wan otwero waco ingei magonogi dedede timere? Wan bobo oturo cik nin

¹¹ kame inabin jotic ni omio wa. Gin oudo kiwaco ne wa be lobo kame otie ot donyo iye pi doko merwa nono obedo lobo kopwokere pi tim me kwer me jo me piny nono. Jo kame bedo kanono lung omunaun kede tim areco.

¹² Gin oudo kiwaco ne wa be kur onyomere kede gi, kede be kur otim gimoro pi konyo gi udo mulem arabo lonyo, tetekeny wan obed tek di oko camo mulem me lobo nono, di oko weko ne ikwae wa lunye atwal.

¹³ Ingei gi dedede kobedo timere ne wa pi dub wa kede raco wa, wan otieko ngeno be in, Rubanga wa, imio wa alola atitidi twatwal kalikame poore kede dub wa di iko mino jo mogo kikom wa odong kuo.

¹⁴ Pinyo komio wan bobo oko lokere turo kede cik nin di oko donyo nyomere kede jo kame timo jamini me kwer kacal kamano? Manono koto twero mini ililo di iko muducaro wa pitipit.

¹⁵ Okwe Rwot, Rubanga me Isirael, in ingolo kop kede ateni, do nataman in iko mino wan obwot oko dong kuo. Wan ocungo i nyimi kede raco wa, bed bala likame tie dano moro kame twero cungo i nyimi di etie iekite noni.”