Esera 6 - Baibuli I Leb Kumam 2013

Koudo Cik kame Abaka Sairas oudo Omio

¹ Di Abaka Darias oko mino cik be moi iwandik kasek amako abakai, kame oudo kobedo gwoko i Babilon.

² Do bomba me Ekabatana en kame oko udo iye iwandik kame waco be,

³ “I mwaka me agege me apugan mere, Abaka Sairas oko mino cik be kopoore temuno gero tempulo i Yerusalem, pi en bedo kakame jo mio kede wango kiye giayala. Tempulo nono boro mere malo poore bedo mita ot are kiwie kanyaare, kede laco mere da mita ot are kiwie kanyaare.

⁴ Apama mere kopoore gero buli eroto acel me ebao i wi irotin adek me kide. Sente dedede amitere me gedo kobino kwanyo ki dero kano lim me abaka.

⁵ Doko da jamini kame kocweo kede saabu kede siliba kame Abaka Nebukadunesa oudo okelo Babilon ki tempulo me Yerusalem kopoore dwoko gi kargi i tempulo me Yerusalem.”

Darias Omio cik be Tic me Gedo Poore Meede

⁶ Darias oko dwoko baluwa kame waco be, “But Tatenai, ngapug me bad tetu tim me Eupurate, kede Setar Bosenai, kede jotic wadu me bad tetu tim me Eupurate. “Irwaunu tenge ki kakame kotie gero iye tempulo

⁷ doko da kur itotolunu tic mere. Poore ngapug me Yuda kede jotel me Iyudayan temuno gero tempulo ka Rubanga i wange kame oudo bin ecungo iye sek.

⁸ Medo i wi manono, nan ango amio wu cik be poore imiunu joadongo me Iyudayan kony me lim amitere me gero tempulo; kopoore culo gi garama me gedo nono dedede abongo gal, di sente nono kopoore kwanyo ki dero kano lim me abaka i bad tetu tim me Eupurate, tetekeny gedo nono kur doko cungi.

⁹ Gi dedede kame mitere buli ceng ne josaseredoti i Yerusalem ipoorenu mino gi abongo koso: itobai, imerekekin, idwe romini kame koyalo bala giayala awanga but Rubanga me Malo, engano, munyo, bwini, kede mo me olibeti.

¹⁰ Ango amito negi mino giayala kame Rubanga me Malo twero gamo, di kiko lego nango kede ne awobe na winyo.

¹¹ Doko medo i wi manono, ango atie mino cik kaman: ka ngatamoro odagi lubo gikame ango awaco, kobino puto epir me yat ki ode, di oko wiwito tetucel, di oko cobo kede kome pelepel. Di oko bino loko ode doko atukit me yugi.

¹² Ango akwao Rubanga ngat koyero Yerusalem pi bedo kakame kowore kiye pi reto abaka moroni arabo ajakanut moroni kame bino loko gikame ango awaco, arabo kame bino mito dudubo tempulo atie Yerusalem nono. Ango Darias amio cik noni, kopoore lube odocon.”

Kokwero Tempulo but Rubanga

¹³ Di lubere kede baluwa kame Abaka Darias oudo ocwao, Tatenai ngapug me adul atie loka me ecilet me Eupurate, kede Setar Bosenai, karacel kede jowot gi oko tic kede teko gi dedede pi neno be gikame Abaka Darias owaco otimere.

¹⁴ Aso, joadongo me Iyudayan oko meede kede gedo, di tic oko ot anyim kiber, di inabin Kagai kede Sakaria en asupo cuny gi kede imurai. Gin kiko tieko gero tempulo di lubere kede cik kame Rubanga me Isirael omio gi, kede cik kame Sairas, Darias, kede Abaka Aretasereses me Pasia oudo omio.

¹⁵ Di do kiko tieko gedo me tempulo i duwe me Adar me mwaka me kanyape me apugan ka Darias bala abaka.

¹⁶ Di do jo dedede me Isirael, josaseredoti kede Jolebi, kede jo apat koudo odwogo ki obukui, oko kwero ot noni but Rwot kede twon kilel.

¹⁷ Pi kwero ot noni but Rwot, gin kiko yalo twonin tol acel (100), imerekekin tol are (200), romini apwodi bwong tol ongwon (400), kede ikoroi tomon kiwie are pi bedo giayala me kwanyo dub, buli ekoroi pi jo me buli ekeko me ateker me Isirael.

¹⁸ Di do oko mino josaseredoti kede Jolebi tice gi amako gi i tempulo i Yerusalem, di lubere kede iswilia kame Musa oudo owandiko.

Ebaga me Kalamo

¹⁹ I ceng me tomon kiwie ongwon me duwe me agege me mwaka kolubo, jo kodwogo ki obukui oko tedo Ebaga me Kalamo.

²⁰ Josaseredoti kede Jolebi dedede oudo olonyere di kiko doko cil. Di do mogo kikom gi oko neneko leini kobedo giayala me Ebaga me Kalamo, pi jo dedede koudo odwogo ki obukui, kede pi josaseredoti jowot gi, kede pirgi.

²¹ Jo kame oko camo giayala nogo obedo jo Isirael koudo odwogo ki obukui, kede jo dedede koudo oweko lubo itok me idinin me atekerin ace di gin kiko donyo woro Rwot Rubanga me Isirael.

²² Gin kiko camo Ebaga me Mugati ali kede Arup pi ceng kanyaare di kipong kede yomcuny. Cuny gi oudo yom piento Rwot oudo oloko cuny abaka me Asiria but gi, omio eko konyo gi kede tic me nyogao gero tempulo ka Rubanga me Isirael.