Esera 4 - Baibuli I Leb Kumam 2013

Jo kame oko Dagi Iik me Temuno Gero Tempulo

¹ Kakame jokwor me Yuda kede Benjamin owinyo kede be jo kodwogo ki obukui oudo tie gero ne Rwot tempulo, en Rubanga me Isirael,

² gin kiko ot but Serubabel kede jotel me miere apapat di kiko waco negi be, “Yeunu ne wada ribere kede wu pi gero tempulo, pien wada oworo Rubanga acel kame wuda iworunu nono, doko da wan lem obedo mine giayala cako i kare kame Esarakadon abaka me Asiria okelo wa kede bedo kanoni.”

³ Do Serubabel, Yosua, kede jo ace apat kobedo jotel me miere i Isirael oko waco negi be, “Wan likame obino yei ne wu konyo wa gero ne Rubanga wa tempulo; do wan kikom wa en kame obino gero ne Rwot Rubanga me Isirael ot, bala kame Abaka Sairas me Pasia otieko ciko ne wa.”

⁴ Di do jo koudo bedo i lobo nono oko tamo dubo cuny Iyudayan di kimio gi lworo tetekeny kiwek gedo.

⁵ Doko da kiko donyo wilo jotel me apugan me Pasia pi totolo kop me gedo nono. Kibedo timo kamanoni pi kare lung kame Sairas oudo tie kede i apugan, paka tuno i kare me apugan ka Darias da.

Jo kame oko Dagi Iik me Temuno Gero Yerusalem

⁶ I agege me apugan ka Sereses bala abaka, jokwor ka jo me Yuda kede Yerusalem oko wandiko kop kame pido gi.

⁷ Bobo i kare me apugan ka Aretasereses bala abaka me Pasia, Bisilam, Miteredat, Tabel, kede jowot gi ace oko wandiko baluwa but abaka. Oudo kowandiko baluwa nono i leb Aramaik, pi manono oudo kopoore tako dwong mere ka kotie some.

⁸ Doko da Rekum, ngat kame lubo tien abaka, kede Simisai kalani me adul oko wandiko ne Aretasereses baluwa kame waco kaman:

⁹ “Baluwa kowok kibut Rekum ngapug me adul, kede Simisai ngat kobedo kalani, kibut jo kame mio gi tam, kede jongolkop; kede kibut jotel ace apat dedede, gin jo me Erek, Babilon, kede Susa i lobo me Elam;

¹⁰ karacel kede jo ace apat kame Asurubanipal, en abaka adwong di tek, bin okwanyo gi ki miere gi di oko tero gi ot bedo i bomba me Samaria kede i kabedere ace kame tie i bad tetu tim me ecilet me Eupurate.”

¹¹ Kop kame tie i baluwa nono waco be: “Baluwa but Abaka Aretasereses, baluwa kowok kibut jotic mege, jo me bad tetu tim me ecilet me Eupurate.

¹² “Adwong wan omito ingei be Iyudayan kobino kan ki adulion ace kame in ipugo nan odonyo bedo Yerusalem, doko da kitie medo gero bomba arac angajemo nono. Nan kitieko cako gero apamai mege kiyapuno tieko, kede da kitie temuno gero acakini me apamai mege.

¹³ Abaka me awora, kame kotieko medo gero bomba noni di oko iiko apamai mege, jo bino jiko culo esolo me egere dedede buti, di do sente kame in iudo ki cul me esolo ko bino dok piny.

¹⁴ Aso, bala kame wan obedo jo kame poore timo gikame in imito, likame wan omito neno di manoni tie timere. Pi manono nan wan otie kede tam be

¹⁵ koto in ber kong imio komoo iwandik kasek kame bin joakwari ni obedo gwoko. Ka in itimo kamanono ibino udo be bomba noni oudo ngajemo, oudo etie peko but abakai kede but jopug me adulion. En ebedo bomba kame jemo tie iye cako i kare kasek. Manono en komio bin oko dudubo en.

¹⁶ Wan otie mini in abaka ngeno be, kame komedo gero bomba noni di oko temuno apamai mege, adwong, likame in doko ibino twero pugo adul kame tie i bad tetu tim me ecilet me Eupurate.”

¹⁷ Abaka oko dwoko kop kaman: “Baluwa but Rekum, ngapug me adul, kede but Simisai, en kalani me adul, kede but jo ace kame mio wu tam kame bedo Samaria kede i kabedere ace kame tie i bad tetu tim me ecilet me Eupurate, amoto wun dedede.

¹⁸ “Baluwa kame icwaunu buta kotieko loko leb mere di oko somo na.

¹⁹ Ango ako mino cik be ngingico kop nono kame ebedo kop me ateni, ateteni oko udo be cako sek Yerusalem obedo jemo ne abakai, doko da en ebedo kabedo kame jemo tie iye, kede da yamo me supo jo i kom apugan.

²⁰ Abakai atek otieko pugo kunono di kiko pugo adul kame tie i bad tetu tim me ecilet me Eupurate, di kiraro esolo me egere dedede.

²¹ Pi manono, miunu cik but jo nogo kijik gero bomba tuno di ango amio gi akarunikin.

²² Timunu kamanono oyotoyot tetekeny kur kimeede kede kelo atotolun i mit na.”

²³ Cucuto kakame kosomo kede baluwa kowok kibut Aretasereses but Rekum, Simisai kede jo kame mio gi tam, gin kiko onyaro ot Yerusalem di kiko mino Iyudayan ojiko tic me gero bomba.

Kocako bobo Tic me Gedo me Tempulo

²⁴ Cako i kare nono bin oko jiko tic me gedo me tempulo paka tuno i mwaka me are me apugan ka Darias bala abaka me Pasia.