Esera 3 - Baibuli I Leb Kumam 2013

Jo Ocako Bobo Woro Rubanga

¹ Di bin duwe me kanyaare otuno, jo dedede me Isirael oudo do otieko sipakin i bomban gi. Gin dedede bin kiko cokere Yerusalem,

² di Yosua wot ka Yekosadoki, karacel kede josaseredoti ace jowote, kede da Serubabel wot ka Selatiel karacel kede wade mege, oko temuno gero alutari ka Rubanga me Isirael, tetekeny kiwang giayala i wie di lubere kede cik kame kowandiko i Iswil ka Musa, en dano ka Rubanga.

³ Gin bin kiko gero alutari kawange kasek, bed bala oudo kitie kede lworo i kom jo kame oudo tie cuto bedo i lobo nono. Gin bobo kiko cako wango giayala me ceng dedede kame kowango odiko kede otieno but Rwot.

⁴ Gin kiko timo Ebaga me Kimere di kilubo iswilia mege; buli ceng gin oudo kiyalo giayala amitere pi ceng nono.

⁵ Medo i wi manono, gin oudo kiko donyo mino giayala me nakanaka kame kowango dedede, kede giayala me Ebaga me Por Duwe, kede giayala kame komio i ceng adongo ace kame jo woro iye Rwot, kede da giayala kame jo dedede mio i mit gi ken gi but Rwot.

⁶ Bed bala oudo jo pwodi likame ocako temuno gero tempulo, gin oudo kiko cako mino giayala awanga but Rwot i ceng me agege me duwe me kanyaare.

Temuno Gero Tempulo

⁷ Jo bin oko kwanyo sente me culo jo kame gero apama kede jo kame guro ibaon; doko da kiko kwanyo cam, giamata, mo me olibeti pi cwano i bomban me Taya kede Sidon, pi seso kede yen seda me Lebanon, kame oudo kopoore mino mol beo i nam adwong tuno Jopa. Oudo kitimo manoni di lubere kede akarunikin kame Sairas, abaka me Pasia omio.

⁸ I duwe me are me mwaka me are di gin kitieko dwogo kitie kakame tempulo bin oudo cungo iye i Yerusalem, Serubabel wot ka Selatiel, kede Yosua wot ka Yekosadoki, kede josaseredoti, Jolebi, kede jo dedede koudo odwogo oko cako tic me gero tempulo. Jolebi dedede me mwakini me dongo gi oudo tie ot are ot malo en kame oko mino gi telo tic me gedo.

⁹ Ngalebi anyinge Yosua kede awobe mege kede wade mege, kede Kadamiel kede awobe mege (gin jo me ot ka Kodabia) oko ribere telo tic me gedo me tempulo. (Jolebi me ot ka Kenadad en oudo konyo gi.)

¹⁰ Kakame jogedo ocako kede napo kide me acakini me apama me tempulo, josaseredoti oko ngapo ikanson gi di kiko ot kargi di kiko donyo kuto agwarai pi pako Rwot, di Jolebi kobedo ikwae ka Asap tie cungo di kigoo suanin abatal me goc. Gin oudo kitie pako Rwot di lubere kede cik kame Abaka Daudi bin omio.

¹¹ Gin oudo kitie wero wer me pako Rwot kede me mine pwoc be, “Rwot ber, amara mere kalikame lokere but jo me Isirael bedo nakanaka.” Jo dedede oko donyo wer di kilelemo kitek di kipako Rwot, pien oudo kocako napo kide me dud apama me tempulo.

¹² Jo atot i kom josaseredoti kede Jolebi kede jotel me miere, idongia koudo bin oneno tempulo me agege koudo tie kanono, oko kok twatwal kakame kineno kede di kotie cibo acakini me apama me tempulo anyen noni, bed bala jo atot apat oudo tie ilelem pi yomcuny.

¹³ Likame ngatamoro oudo twero mino apokapoka i dierediere me ilelem me koko kede ilelem me yomcuny, pien jo oudo tie ilelem kitek, ilelem gi oudo winyere ki kakabor.