Esera 10 - Baibuli I Leb Kumam 2013

Iik me Jiko Nyom kede Atekerin Apat

¹ I kare kame Esera oudo tie ilega kede i nyim tempulo di etuco dub nogo, di ekok akoka kede pigewange, kede di epopoto piny, twon ekodet me jo Isirael oko cokere bute, cuo, mon, kede idwe, di kikok kitek.

² Di Sekania wot ka Yekiel, akwar Elam, oko waco ne Esera be, “Wan otiekunu turo cik ka Rubanga wa i yore me nyomo mon me atekerin apat kame tie bedo i lobo noni, do akadi kamanono da gen pwodi tie pi jo Isirael.

³ Aso, nataman wan miero otimunu isikan kede Rubanga wa, be wan obinunu riamo tenge mon nogi dedede kede idwe gi, di lubere kede tam kame in kede jo kame woro cik ka Rubanga mio wa. Wan obino timo gikame Iswil ka Rubanga mito.

⁴ Cak in timo tic, pien manono obedo tic nin. Wan otieko iikere pi tic karacel kedi. Bed tek di iko time.”

⁵ Aso, Esera oko yai eko cungo di eko mino jotel me josaseredoti, jotel me Jolebi, kede jotel dedede me Isirael okwongere be gin kibino timo bala kame Sekania owaco.

⁶ Di Esera oko yai ki nyim tempulo di eko ot i agola ka Yekokanan wot ka Eliasib kakame eko runo piny iye. En likame bin ecamo gimoro akadi mato pii, pien oudo etie iturur pi kite kalikame jo kodwogo ki obukui obedo kede genere but Rwot.

⁷ Gin bin kiko cwano kop Yuda kede Yerusalem lung, but jo kodwogo ki obukui pi gin dedede cokere Yerusalem.

⁸ Manono en cik kame jotel me Isirael oudo omio. Ka ngatamoro oudo likame oko bino i kare me ceng adek kame bin komio, oudo miero mae jamini mege dedede, di oko riame tenge kikom jo kodwogo ki obukui.

⁹ Di jo dedede me Yuda kede Benjamin oko cokere Yerusalem i ceng adek nogo. I buto duwe ot are me duwe me kanyangon en kame bin jo dedede oko cokere kede kakaler i nyim tempulo, di kom gi miel amiela pi kop noni, kede da pi kot oudo tie cwei kitek.

¹⁰ Ngasaseredoti Esera oko yai di eko cungo eko waco negi be, “Wun itimunu dub pien inyomunu mon me atekerin apat, di manono oko medo raco me jo Isirael.

¹¹ Aso, nataman tucunu dub wu but Rwot Rubanga ka joakwari wu, di ikounu timo gikame en emito. Pokerenu tenge kikom jo me piny noni kede kikom mon nogi me atekerin apat.”

¹² Di ekodet kocokere lung oko lelemo be, “Manono tie kakare; wan miero otim bala kame in itieko waco.

¹³ Do jo tot twatwal, doko kot tie cwei kitek; wan likame otwero cungo ooko kakaler kaman. Akadi tic noni da likame obedo tic me ceng acel arabo ceng are, pien jo atot kikom wa otieko timo dub noni.

¹⁴ Wek jotel wan dong Yerusalem di gin kiko cungo pi ekodet lung i kop noni. Di oko bino ciko ne jo dedede me bomban wan konyomo mon me atekerin apat kare kame gin poore kibin iye, karacel kede joadongo kede jongolkop me bomban gin, tuno di lilo atek ka Rubanga wa pi kop noni otiek.”

¹⁵ Likame bin tie dano moro ace kame oko piem kede tam noni kwanyo kenekene Jonasan wot ka Asakel kede Yakaseya wot ka Tikiba, di Mesulam kede Sabetai Ngalebi oko gango gi.

¹⁶ Di jo kame bin odwogo ki obukui oko timo kamanono. Ngasaseredoti Esera oko yero cuo kikom jotel me ikekon di eko wandiko nying gi. I buto duwe acel me duwe me tomon gin bin kiko bedo piny pi ngingico kop nono.

¹⁷ I buto duwe acel me duwe me acel me mwaka anyen en kame gin kiko tieko kede ngingico kop me cuo koudo onyomo mon me atekerin apat.

Cuo Konyomo Mon me Atekerin Apat

¹⁸ Magi en nying josaseredoti kame bin onyomo mon me atekerin apat: Ki ot ka Yesua wot ka Yekosadoki kede imiegu mege: Maseya, Elieser, Yarib, kede Gedalia.

¹⁹ Gin kiko cikere pi riamo mon gi, di kiko mino emerekek bala giayala but Rubanga pi dub gi.

²⁰ Ki ot ka Imer: Kanani kede Sebadia

²¹ Ki ot ka Karim: Maseya, Elia, Semaya, Yekiel, kede Usia

²² Ki ot ka Pasikur: Elioenai, Maseya, Isimael, Netanel, Yosabad, kede Elasa.

²³ Kikom Jolebi, jo kame bin onyomo mon me atekerin apat gin en, Yosabad, Simei, Kelaya (kame nyinge ace en Kelita), Petakia, Yuda, kede Elieser.

²⁴ Kikom jower, Eliasib kene en koudo onyomo dako me ateker apat. Kikom jodar irutei, jo kame bin onyomo mon me atekerin apat gin en, Salum, Telem, kede Uri.

²⁵ Jo apat me Isirael kame bin onyomo mon me atekerin apat: Ki ot ka Paros: Ramia, Isia, Malikija, Mijamin, Eleasar, Malikija, kede Benaya

²⁶ Ki ot ka Elam: Matania, Sakaria, Yekiel, Abidi, Yeremot, kede Elia

²⁷ Ki ot ka Satu: Elioenai, Eliasib, Matania, Yeremot, Sabad, kede Asisa

²⁸ Ki ot ka Bebai: Yekokanan, Kanania, Sabai, kede Atalai

²⁹ Ki ot ka Bani: Mesulam, Maluk, Adaya, Yasub, Seal, kede Yeremot

³⁰ Ki ot ka Pakat Moab: Adana, Kelal, Benaya, Maseya, Matania, Besalel, Binui, kede Manase

^31-32 Ki ot ka Karim: Elieser, Isija, Malikija, Semaya, Simeon, Benjamin, Maluk, kede Semaria

³³ Ki ot ka Kasum: Matenai, Matata, Sabad, Elipelet, Yeremai, Manase, kede Simei

^34-37 Ki ot ka Bani: Madai, Amuram, Uwel, Benaya, Bedeya, Keluki, Bania, Meremot, Eliasib, Matania, Matenai, kede Jasu

^38-42 Ki ot ka Binui: Simei, Selemia, Natan, Adaya, Makanadebai, Sasai, Sarai, Asarel, Selemia, Semaria, Salum, Amaria, kede Yosepu

⁴³ Ki ot ka Nebo: Yeyel, Matitia, Sabad, Sebina, Yadai, Yoweri, kede Benaya.

⁴⁴ Cuo nogi dedede bin onyomo mon me atekerin apat. Gin kiko riamo gi karacel kede idwe gi.