Esekeri 9 - Baibuli I Leb Kumam 2013

Komio Yerusalem Alola

¹ Di do ango ako winyo Rubanga lelemo kede dwan amalo be, “Nyikinonu wun jo kame bino timo nek i bomba, ngat acelacel poore mak gi me yi mere.”

² Cuo kanyape oko wok ki tetu erute me bad tetu malo, ngat acelacel oudo mako gi me yi mere. Icuo moro kongapo igoen apwot di kimeny oudo tie kede gi, di emako jamini me iwandik. Gin dedede kiko donyo i diakal me ot ka Rwot di kiko cungo i nget alutari kame kotimo kede nyonyo buronsi.

³ Aso, deyo kame nyuto tie ka Rubanga me Isirael oudo oyai ki kom cerubim kakame oudo ebedo iye, di eko ot i dogola me tempulo. Rwot oko lwongo icuo nono kame oudo ngapo egoe apwot di emeny, icuo kame oudo mako jamini me iwandik,

⁴ en eko waco ne be, “Oti ibei i dier bomba me Yerusalem, di iko keto alama i tur nyim jo dedede kame tie kede cwercuny kede di kiramere pi gikareco kame kotie timo i bomba.”

⁵ Ango ako winyo di en ewaco ne cuo icegun ka be, “Wuda beunu i bomba ilubenu, di inenekunu jo. Kur iwekunu ngatamoro, doko kur ibedunu kede cuny me kisa but ngatamoro.

⁶ Nekunu cuo oti, awobe kede anyira, mon kede idwe atino, do kur imulunu ngatamoro kame tie kede alama i nyime. Cakunu i kabedo na kacil.” Aso, gin kiko cako kede joadongo kame oudo tie i nyim tempulo.

⁷ Rubanga oko waco negi be, “Munaununu tempulo. Miunu kom jo kame koneko rade i diakal mere. Otunu!” Aso, gin kiko ot di kiko neneko jo i bomba.

⁸ Di gin oudo kitie neneko jo, ango oudo adong kena. Ango ako poto piny ariebacuny di ako kok kede dwan amalo be, “Okwe Rwot Rubanga, benyo, in do itieko lilo kede Yerusalem kitek en komio itie neko jo dedede kodong i Isirael?”

⁹ Rubanga oko gamo be, “Raco kame jo me Isirael kede jo me Yuda otimo dwong twatwal. Nek dwong i lobo dedede, doko tim kalikame poore dwong i bomba. Gin kiwaco be, ‘Rwot otieko jalo lobo noni, doko likame eneno wa.’

¹⁰ Ango i tetu buta, likame abino weko ngatamoro, akadi bedo kede cuny me kisa but ngatamoro, do abino timo negi gikame gida kitieko timo ne jo icegun.”

¹¹ Di do icuo koudo ngapo igoen apwot ameny, di etie kede jamini me iwandik, oko dwogo dwoko kop but Rwot be, “Ango atieko timo bala kame in oudo iciko na.”