Esekeri 7 - Baibuli I Leb Kumam 2013

Ajikini Iyapiyapi ne Isirael

¹ Rwot oko yamo keda.

² En ewaco be, “Wot ka dano, manoni en gikame ango Rwot Rubanga atie waco ne lobo me Isirael: Ajikini otieko tuno! Ajikini me lobo lung!

³ “Isirael, ajikini otieko tuno nin. Ango abino bwoto gero na i komi; abino ngolo kop i komi di alubo yote me kuo ni. Ango abino mini alola pi tim areco dedede kame in itimo.

⁴ Ango likame abino weki aweka arabo timi kisa. Ango abino mini alola pi tim areco kame in itieko timo. Di do in iko bino ngeno be ango en Rwot.”

⁵ Rwot Rubanga tie waco be, “Can tie bino i komi di kilubere aluba.

⁶ Ajikini otieko bino, etieko tuno. Neni, etie bino nin!

⁷ Can otieko poto ne wu, Okwe wun jo kame bedo i lobo noni. Kare me atotolun otieko tuno, edoko iyapiyapi, likame bobo ilelem me kilel bino bedo tie i wi mori.

⁸ “Nataman ango ayapuno bwoto lilo na i komu. Ango abino ngolo kop i komu di lubere kede yote me kuo wu, di ako mino wu alola pi tim wu areco dedede.

⁹ Ango likame abino weko wu aweka arabo bedo kede cuny me kisa butu. Ango abino mino wu alola pi tim areco dedede kame wun itiekunu timo. Di do wun ikounu bino ngeno be ango Rwot en kame amio wu alola.”

¹⁰ Neningo, ceng nono tie bino. Can otieko tuno ne jo Isirael. Tim me gero oyitiriro. Ewaka otieko doko dwong.

¹¹ Tim me gero otieko doko bala ebela me mino jo alola pi gikareco. Likame tie ngatamoro kikom gi kame bino dong, akadi jamini gi arabo abar gi.

¹² Kare otieko tuno, ceng otieko doko iyapiyapi. Ngat kame wilo jamini kur leli, akadi ngacat da kur tururo, pien lilo ka Rubanga bino poto i kom jo dedede.

¹³ Pien jocat likame bobo bino dwoko gikame gin kitieko cato, akadi di pwodi gin kikuo. Pien lilo ka Rubanga mako jo dedede, doko likame ebino dok cen. Pi dub gi, gin likame kikaruno gwoko kuo gi.

¹⁴ Kotieko kuto agwara di oko iiko jamini dedede me yi. Do likame tie ngatamoro kame yai di eko ot i yi, pien lilo ka Rubanga tie i kom jo dedede.

Alola but Jo Isirael pi Dub gi

¹⁵ Yi tie ooko me bomba, tuwo me aumpuli kede kec tie i bomba. Jo kame tie obar bino to i yi; jo kame tie i bomba kec kede tuwo me aumpuli bino neko gi.

¹⁶ Ka jo mogo obwot, kobino udo gi i wi mori bala aweleko me aditoto, di gin dedede kitie koko pi dub gi.

¹⁷ Bad jo dedede bino doko lojolojo, di cong gi ko bino doko goro.

¹⁸ Gin kibino ngapo ipukoi pi cwercuny di kitie kede lworo atek. Kobino lielo wi gi di lewic ko mako gi.

¹⁹ Gin kibino kwikwito siliba gi i dier gudi bala gikame kony gi li, doko saabu da gin kibino tero bala gi kopwokere, pien akadi siliba arabo saabu likame karuno lako gi i ceng me lilo ka Rwot. Likame kikaruno tic kede gi ka kec oneko gi arabo camo gi di kiko yeng kede gi. Saabu kede siliba en kobedo mino gin timo dub.

²⁰ Gin oudo kibedo wakere pi mwolere gi acil, do kiko lokere tic kede gi me timo caljwogi. Manono en komio Rwot omio abar gi olokere odoko gikame rac negi.

²¹ Rwot waco be “Ango abino mino jokumbor yako gi, jo kame ikiteso gi reco me wi lobo; gin kibino yako abar gi di kiko munao en.

²² Ango abino jalo jo nogo munao kabedo na kame pire tek. Jogero nogo bino donyo iye, di gin kiko munao en.

²³ “Timunu irikoi! Pien tim me nek opong i lobo, doko tim me gero dwong i bomba.

²⁴ Ango abino kelo atekerin kame ikiteso gi reco kalamo atekerin apat di gin kiko gamo ude wu. Ango abino jiko ewaka me jo atek, di kabedere wu kacil oko bino munao.

²⁵ Ka kare me peko otuno, ibinunu mono mulem do likame ibinunu ude.

²⁶ Can bino bedo lubere aluba, rwonge arac da bino ruruco bino. Ibinunu bedo mono gianyuta moro kibut enabi do likame ibinunu udo. Ngasaseredoti da likame bino bedo tie kede kop moro kame epoore pwonyo jo, akadi joadongo da likame bino bedo tie kede tam moro kame kipoore mino.

²⁷ Abaka bino tururo, ngapug gen mere bino tiek, di kom jo miel amiela pi lworo. Ango abino keto can i komu di lubere kede yote me kuo wu, doko abino timo ne wu gikame wuda ibedunu timo ne jo apat. Manono bino mino wun ingeunu be ango en Rwot.”