Esekeri 5 - Baibuli I Leb Kumam 2013

Esekeri Olielo Yer Wie

¹ Rwot oko waco be, “Wot ka dano, kwany epima abit di iko tic kede me lielo yer wii kede me tiki. Di iko pimo yer nogo i misani, iko popoko gi kabedere adek.

² Dul acel i kom adek me yer nogo in ibino wango i mac i bomba, ka kare me luko bomba otiek. Dul acel ace in ibino kwanyo di iko ngongolo en kede epima ni di irimaro bomba i ooko. Dul acel odong mere in ibino sasaro yamo ko tero gi, di ango ako bino riamo yor gi kede epima.

³ In ibino kwanyo yer mogo anonok kikom magonogo, di iko tweno gi ilak ekanso ni.

⁴ Di bobo kikom magonogo in iko kwanyo mogo, di iko uco gi i mac, iko weko gi kiwang. Mac bino cakere ki kanono di eko nyai ewang jo me Isirael dedede.”

⁵ Rwot Rubanga waco be, “Man en Yerusalem. Ango atieko cibe i diere me atekerin, di pinye oluke rimaro.

⁶ Do en etieko jemo edagi lubo cik na kede iswilia na, di tim mere oko doko rac kalamo me atekerin kede pinye koluke. Yerusalem odagi cik na, doko edagi lubo iswilia na.

⁷ Pi mano, ango Rwot Rubanga atie waco kaman: Piento in idagi lubo iswilia na akadi gwoko cik na, itieko doko ngaelol kalamo atekerin koluki. In ilubo itok me atekerin koluki nogo.

⁸ Manono en komio ango Rwot Rubanga atie waco ni be ango kikoma en ngakwor ni. Ango abino mini alola di atekerin dedede neno.

⁹ Ango abino mini alola pi tim ni kame cunya dagi nono, alola kame lem pwodi likame amio doko likame abino medo mino.

¹⁰ Jonywal bino camo idwe gi i diere wu, doko idwe da bino camo jonywal gi. Ango abino mini alola, doko jo ni kame bino bwot dong kuo, ango abino sasaro i bad tetu dedede.

¹¹ “Pi mano, ango Rwot Rubanga akwongere be, pien in imunao kabedo na kacil kede jamini kame cunya dagi karacel kede tim ni aneno rac, ango abino tongi piny abongo kisa.

¹² Dul acel i kom adek me jo ni tuwo kede kec bino neko i bomba; acel i kom adek kobino neko kede epima i ooko me bomba; di acel i kom adek ango ako bino sasaro i bad tetu dedede di ako riamo yor gi kede epima.

¹³ “Ango abino bwoto lilo na kede gero na lung i komi tuno ango neno be eromi do; di in iko bino ngeno be ango, Rwot, atieko yamo kedi kede gero.

¹⁴ Medo i kom manono, ango abino mino in Yerusalem idoko ameje kede gi me anyera i diere me atekerin koluki, kede i wang jo kame beo i ngeti.

¹⁵ “I kare kame ango abino lilo kede di ako doko ger ako mini alola alit, ibino doko gi me anyera kede me acae, gi me ikwenyar kede gikame neno rac kame kelo ne jo lworo, but atekerin koluki.

¹⁶ Abino cwano ne jo ni kec alit bala emal kame kogweo negi pi muducaro gi. Abino ruruco cwano kec i kom gi tuno cam gi tiek pitipit.

¹⁷ Abino cwano kec kede leini ager i komi, di gin kiko neneko idwe ni. Tuo me aumpuli kede nek bino beo i komi, doko abino kelo yi i komi. Ango Rwot atieko waco.”