Esekeri 47 - Baibuli I Leb Kumam 2013

Esamai Amol wok ki Tempulo

¹ Icuo nono oko tera odok i ekeko adonyo i tempulo. Pii oudo tie mol ki piny i dud ekeko me tempulo edok i bad tetu kide, bad nono en kame nyim tempulo oudo neno. Pii nono oudo mol wok ki piny i bad tetu piny me tempulo di eko beo ki bad tetu piny me alutari.

² En eko tera ooko me diakal me yie koluko tempulo di obeo ki erute me bad tetu malo, di oko ot owire paka tuno i erute me ooko aneno bad tetu kide. Pii oudo tie mol wok ooko ki bad tetu piny me erute nono.

³ En eko dok i bad tetu kide kakame pii nono mol dok iye di emako tol me pim i cinge, di eko pimo kakame boro mere tie mita tol kany (500) dok piny kunono. En eko tera opumo pii ot kunono; pii nono oudo jik i atitinyo.

⁴ En bobo eko pimo kakame boro mere tie mita tol kany (500), di eko tera opumo pii ot kunono; pii nono oudo jik i conga. En bobo eko pimo kakame boro mere tie mita tol kany (500), di eko tera opumo pii ot kunono; pii nono oudo oko tuno i piera.

⁵ En bobo eko medo pimo kakame boro mere tie mita tol kany (500), do kanono pii mere oko bedo tut likame oudo atwero ngole; likame oudo etwero ngolere kwanyo di dano osanyo asanya.

⁶ En eko penya be, “Wot ka dano, mam ineno manoni?” En eko dwoka obeo ki ooko oririo dog ecilet nono.

⁷ Kakame oudo atie dwogo kede, ako neno yen adongodongo atot di tie i dog ecilet tuni tuni.

⁸ En eko waco na be, “Pii noni mol dok i adul atie i bad tetu kide di eko donyo i Aditot me Yorodan di eko kato paka i Nam Oto. Kame edonyo i Nam Oto, en eloko pii amunyomunyo me nam nono doko pii aber.

⁹ Kabedo dedede kame pii noni mol iye, ikodeta me gi akuo atot bedo tie kanono, doko da aporogon atot bedo tie iye pien pii noni ka otuno kunono eloko pii amunyomunyo doko ber. Aso kabedo dedede kame pii noni mol iye gi dedede akuo bedo tie iye.

¹⁰ Jocik bino teere cungo i dog ecilet noni pi cik; cako ki Engedi tuno Enegilaim bino bedo tie iye karieno bwoini me cik. Bino bedo tie iye aporogon atot me egere apapat bala kame tie i nam adwong me Mediterania.

¹¹ Do isamai me Nam Oto atie i lake i lake likame pii gi bino doko ber; gin kibino dong me munyo.

¹² I bad tetuni kede tetuca me ecilet noni bino dongo iye yen me egere dedede anyako anyakini kame kocamo. Pote gin likame bino tuo, doko da likame gin kibino jiko nyako anyakini. Gin kibino nyak buli duwe, pien pii kame bido aliasin gin mol wok ki tempulo. Yen nogo kobino camo anyakini gi, do pote gi kobino tic kede gi me cango jo.”

Ikor me Lobo

¹³ Rwot Rubanga owaco be, “Magi en ikor kame ibinunu popoko kede lobo ne jo me ikekon tomon kiwie are me Isirael. Jo me ekeko ka Yosepu bino tero adulion are.

¹⁴ Ango bin akwongere but joakwari wu be abino mino gi lobo noni; aso nan pokenu di erorom.

¹⁵ “Man en ikor me lobo noni: ikor mere i bad tetu malo cakere ki nam adwong me Mediterania di eko dok i bad tetu kide, beo i bomba me Ketelon, tuno Lebo Kamat, tuno i bomba me Sedad,

¹⁶ tuno i bomban me Berota kede Sibiraim (gin kitie i dierediere me ikor me ajakanut me Damasiko kede ikor me ajakanut me Kamat), di eko tuno i bomba me Kasar Katikon (kame tie i ikor me adul me Kauran).

¹⁷ Aso ikor me bad tetu malo yai ki nam adwong me Mediterania di eko dok i bad tetu kide tuno i bomba me Enon, di ikor me Damasiko kede Kamat tie i bad tetu malo mere.

¹⁸ “Ikor mere me bad tetu kide yai ki dierediere me Kauran kede Damasiko di eko dok i bad tetu piny, di eko ririo ecilet me Yorodan, kobedo ikor me lobo me Isirael i bad tetu tim kede Gilead i bad tetu kide; ikor nono ko ot ape ape tuno Tamar i Nam Oto.

¹⁹ “Ikor me bad tetu piny yai ki Tamar tuno i pii me Kades Meriba; ki kanono eko dero aditot kobedo ikor me Misiri tuno i nam adwong me Mediterania.

²⁰ “I bad tetu tim nam adwong me Mediterania en kame bino bedo ikor di eko ot ape ape tuno kakame neeno kede Lebo Kamat.

²¹ “Aso, popokunu lobo noni di lubere kede ikekon me ateker me Isirael.

²² Ibinunu popoko en pi bedo meru me atwal. Jokumbor abedo i diere wu, kede jokumbor konywalo idwe kanoni da poore gida udo iner gi ka itienu popoko lobo. Ipoorenu tero gi bala jo kobedo anywali me Isirael di oko poko ne gida lobo karacel kede jo me ikekon me Isirael.

²³ Jokumbor abedo i diere wu ibinunu poko negi lobo karacel kede jo me ikekon kame gin kibedo i diere gi. Ango Rwot Rubanga en awaco.”