Esekeri 45 - Baibuli I Leb Kumam 2013

Lobo kame Kopoko ne Rwot

¹ Kame kotie popoko lobo me Isirael ne jo me ikekon apapat, kopoore poko dul moro oko mino Rwot pi bedo adul kacil. Boro mere bino bedo kilomita tomon kiwie are kede dul, kede laco mere kilomita tomon. Dul nono dedede bino bedo lobo kacil.

² I dul noni poore bedo iye dul moro atitidi kame laco kede boro mere tie mita tol are kede ot kany; kanono en kame kobino gero iye tempulo. Kakatwolo kame laco mere tie mita ot are kiwie kany poore luke diere.

³ Dul noni, lobo kame boro mere tie kilomita tomon kiwie are kede dul, kede laco mere kilomita kany, kopoore pimo di oko poko, en kanono en kame kobino gero iye tempulo, kabedo kacil kalamo.

⁴ En ebino bedo dul kacil me lobo nono. Ebino bedo pi josaseredoti kame timo ne Rwot tic i tempulo mere. Kobino gero iye ude gi kede tempulo da.

⁵ Dul ace kodong me lobo nono bino bedo pi Jolebi kame timo tic i tempulo; kanono kobino gero iye bomban kame gin kibedo iye.

⁶ I nget adul kacil nono kopoore poko iye lobo moro kame boro mere tie kilomita tomon kiwie are kede dul, kede laco mere kilomita are kede dul, kanono en kame kobino gero iye bomba kame ngatamoroni kenekene me Isirael twero bedo iye.

Lobo me Ngapug

⁷ Kopoore poko lobo moro ne ngapug da. Ki ikor me bad tetu tim me adul kacil ebino ot paka tuno i bad tetu tim ape tuno i nam adwong me Mediterania; kede ki ikor me bad tetu kide me adul kacil epoore ot paka tuno i ikor me bad tetu kide me lobo me Isirael, tetekeny boro mere bed rom aroma kede adulion kame kopopoko ne jo me ikekon apapat me Isirael.

⁸ Adul me lobo noni bino bedo iner kame ngapug bino bedo kede i lobo me Isirael, tetekeny likame doko ebino bedo kede adiadia but jo, do ebino weko jo me ekeko acelacel me Isirael tero lobo gi kame kopoko negi.

Iswilia amako Jopug

⁹ Rwot Rubanga owaco be, “Eromo do, wun jopug me Isirael! Jikunu tim me gero kede me tero jo kirac, di ikounu donyo timo gi kopoore kede atie kakare. Jikunu riamo jo tenge ki lobere gi, ango Rwot Rubanga en awaco.

¹⁰ “Jo dedede poore tic kede gipim atie kakare; epa kede bat atie kakare.

¹¹ “Epa bino bedo gipim me gi otuo, kede bat bino bedo gipim me gi aliu. Gin kibino bedo rorom kame koporo gi kede gipim kame kolwongo be komer. Komer acel bino bedo rom kede epa tomon, doko da ebino bedo rom kede bat da tomon.

¹² Kide wu me pimo jamini bino bedo kaman: sekel acel bino bedo rom kede gera ot are; sekel ot kanyape rom kede mina acel.

^13-15 “Ibinunu mino giamia wu kaman: Engano: acel i kom ot kanyape me kac Mawele: acel i kom ot kanyape me kac Mo me olibeti: acel me tomon me bat acel ki buli kor acelacel. (Kor acel, bala komer, rom kede bat tomon.) Romini: oromo acel i kom romini tol are me anok me romini me Isirael. Magonogi bino bedo giayala me alos, giayala awanga, kede giayala me nywak, tetekeny asasiro dub wu, ango Rwot Rubanga en awaco.

¹⁶ “Jo dedede me Isirael poore ter giamia nogi but ngapug me Isirael.

¹⁷ Manono bino bedo tic meren pi neno be ekwanyo leini me awanga, giayala me alos, kede giayala amata pi ateker dedede me Isirael i kare me Ebaga me Por Duwe, i ceng Sabato, kede i ceng me ibagai ace. En epoore kwanyo giayala me kwanyo dub, giayala me alos, giayala kame kowango alutu, kede giayala me nywak, pi kwanyo dub me jo me Isirael.”

Ceng Adongo me Ibagai

¹⁸ Rwot Rubanga owaco be, “I ceng me agege me duwe me agege ibino tero twon etobait kalikame tie kede peko moro i kome di iko tic kede me lonyo tempulo.

¹⁹ Ngasaseredoti bino kwanyo remo mogo me giayala noni me kwanyo dub di eko puco i kor ipirin me ekeko me tempulo, kede i wi iswongen ongwon me alutari, kede i kor ipirin me ikekon me irutei adonyo i diakal me yie.

²⁰ Ibino da timo kamanoni i ceng me kanyaare me duwe pi jo kame timo dub, amoto pi kwina piny, do likame akaa. Epone noni en kame in ibino mino kede tempulo doko kede kabedo kacil.

²¹ “I duwe me agege i ceng me tomon kiwie ongwon me duwe, ibinunu tedo Ebaga me Kalamo. Jo dedede bino camo mugati kame kotimo abongo arup pi ceng kanyaare.

²² I ceng me agege me ebaga ngat kame tie i pug bino kwanyo twon kame koyalo pi kwanyo dub mege kede me jo dedede.

²³ Buli ceng pi ceng kanyaare me ebaga en ebino kwanyo pi bedo giayala buta, itobai kanyaare kede imerekekin da kanyaare kame li kede peko moro i kom gi. Ebino da kwanyo ekoroi buli ceng acelacel pi bedo giayala me kwanyo dub.

²⁴ Ebino da kwanyo alos kilo kanyangon kede lita adek me mo me olibeti pi yalo karacel kede buli twon acelacel kede emerekek acelacel.

²⁵ “I Ebaga me Kimere kame cakere i ceng me tomon kiwie kany me duwe me kanyaare, ngat atie i pug bino kwanyo epone me leini nogo, di wel gi da rom kanono, pi bedo giayala me kwanyo dub, kede giayala kame kowango alutu; doko da ebino kwanyo giayala me alos kede me mo me olibeti iepone acel nono.”