Esekeri 43 - Baibuli I Leb Kumam 2013

Rwot Odwogo i Tempulo

¹ Icuo nono oko tera i erute kame neno bad tetu kide.

² Ki kanono ako neno rieny me deyo ka Rwot di tie bino ki bad tetu kide. Mor mere oudo winyere bala mor me twon pii, di wi lobo lung oko rieny kede deyo mere.

³ Gianyuta noni oudo cal bala gianyuta koudo aneno kakame Rubanga oudo obino dudubo kede bomba me Yerusalem, kede da gianyuta koudo aneno i ecilet me Kebar. Ango ako poto ariebacuny.

⁴ Kakame deyo ka Rwot oudo tie donyo kede i tempulo ki erute me bad tetu kide,

⁵ tipo ka Rwot oko tinga di eko tera i diakal me yie, di deyo ka Rwot oko pongo yi tempulo dedede.

⁶ Di oudo icuo nono tie cungo i ngeta, ako winyo dwan kame yamo na ki tempulo be,

⁷ “Wot ka dano, kanoni en kom na me pug, kakame acibo iye tiena. Ango abino bedo kanoni i diere me jo me Isirael pi kare dedede. Jo me Isirael, akadi abakai gi da, likame doko bino munao nyinga kacil i yore me woro rubangan ace amoto yiko liele me abakai gi kanoni.

⁸ Abakai me Isirael ogero paco gi me abaka di ekeko me erute mere tie i dog ekeko me erute me tempulo na, omio apama kenekene en oudo poka kede gi. Gin kimunao nyinga kede tice areco kame gin kitimo, manono oko mina amuducaro gi pi gero kame oudo atie kede.

⁹ Nan poore gin kijik woro caljwogi di kiko kwanyo tenge liele me abakai gi, di ango ako bino bedo i diere gi pi kare dedede.”

¹⁰ Rwot oko meede be, “Wot ka dano, tatamo ne jo me Isirael cal me tempulo noni; poore kibed kede ngec i kom ekite me cal kame kogere iye. Mi lewic mak gi pi tice gi areco.

¹¹ Kame lewic otieko mako gi pi gikame kitimo, tatamo negi cal me ekite kame kogero kede tempulo noni, cal mere lung, kadonyo kede kawok, kite kame koketo kede gi dedede atie iye, kede iswilia amake. Wandiko negi gi nogi dedede tetekeny kikaruno ngeno cal me ekite kame kogere kede, di kiko lubo iswilia mege.

¹² Man en iswil amako tempulo noni: kakoluke dedede i wi moru obedo kabedo kacil.”

Alutari

¹³ Man en laco kede boro me alutari, di otio kede gipim kame kopimo kede tempulo. Piny me alutari oudo tie iye puleju rimaro, kame tut mere oudo tie sentimita ot kany, kede laco mere da kamanono. Puleju nono oudo kotoko lake kede gikame boro mere malo tie sentimita ot are kiwie kany.

¹⁴ Dul kopetere me dude piny oudo bor mere malo tie mita acel. Dul kopetere alubo mere me kore oudo komie edonyo i yie kede sentimita ot kany rimaro, di boro mere malo oudo tie mita are. Dul kopetere me wie malo oudo da komio odonyo i yie kede sentimita ot kany rimaro.

¹⁵ Dul kopetere me malo noni, kakame oudo kowango iye giayala, boro mere malo oudo tie mita are. Isondana mege oudo tie kede iswongen kokiar malo kalamo cunye.

¹⁶ Dul kopetere me malo noni oudo tie mita kanyape ki bad dedede.

¹⁷ Dul kopetere me diere da oudo rorom ki bad dedede, buli bad mita kanyaare, di kotweo lake me ooko rimaro kede gikame boro mere malo tie sentimita ot are kiwie kany. (Puleju mere oudo laco mere tie sentimita ot kany.) Kakame kogero me yito i alutari nono oudo tie i bad tetu kide.

Mino Alutari but Rubanga

¹⁸ Di Rwot Rubanga oko waco na be, “Wot ka dano, magi en iswilia amako alutari: kame kotieko gero alutari, pi mine buta kopoore wango giayala i wie di oko kikiro remo me giayala nono i kome.

¹⁹ Josaseredoti me ekeko ka Lebi, kobedo ikwae ka Sadoki kenekene en kame bino tuno i nyima pi timo na tic, ango Rwot Rubanga en aciko manoni. Aso ipoore mino gi twon pi gin yalo bala giayala me kwanyo dub.

²⁰ In ibino kwanyo remo mogo me le nono di iko keto i iswongen atie i isondana me wi alutari, kede i isondana me dul kopetere me diere, kede i gikame kotoko kede lake dedede rimaro. Iepone noni in ibino lonyo alutari di iko mine ebedo gi kopoore me mino giayala buta.

²¹ Ibino kwanyo twon nono kobedo giayala me kwanyo dub di iko wango kome kabedo kame koiko i kakame tempulo cungo iye, do i ooko me kakacil koluke.

²² I ceng me are ibino kwanyo ekoroi kalikame tie kede peko moro i kome di iko yale bala giayala me kwanyo dub; di oko lonyo alutari kede remo mere bala kame oudo kotimo kede remo me twon.

²³ Ka itieko timo kamanono, ibino kwanyo atin twon kede atin emerekek, gin dedede di kili kede peko moro i kom gi,

²⁴ di iko kelo gi i nyima. Josaseredoti bino kikiro munyo i kom gi di kiko wango gi bala giayala buta.

²⁵ Buli ceng pi ceng kanyaare ibino yalo diel, twon kede emerekek bala giayala me kwanyo dub, gin dedede kipoore bedo abongo peko moro i kom gi.

²⁶ Josaseredoti bino lonyo alutari pi ceng kanyaare nogo tetekeny ango atwero game di eko bedo gikame koromo cako tic kede.

²⁷ Kame ceng nogo okato, josaseredoti bino do donyo yalo i wi alutari nono giayala kame jo kwanyo me kwanyo dub kede me nywak. Di do cunya ko bino bedo yom i kom wun dedede.”