Esekeri 4 - Baibuli I Leb Kumam 2013

Esekeri Oporo Epone kame kobino Luko kede Yerusalem

¹ Rubanga oko waco na be, “Wot ka dano, kwany matapali di iko kete i nyimi. Goi cal me bomba me Yerusalem iye.

² Pi nyuto be koluko bomba, tim cal me lobo kame kokumemo me yito i wi apama me bomba, kede kakame kotoro kame koturo kede apama nono. Tim da cal me kimere me isirikalen atie sure, di iko cicibo gi me tuturo apama nono rimaro en.

³ Kwany itatany me nyonyo di iko cibe bala apama i dierediere nin kede cal me bomba kame in igo nono. Cung di nyimi oneno bomba, di iko mine ebed bala jokwor oluke, di in en inonono kame itie luke. Manoni en anen me gikame bino timere i kom ateker me Isirael.

^4-5 “Di do in iko bino buto piny kede ngeti tetu ngodal, di ango ako bino mini ikanyo alola kame koto oudo amio jo me Isirael. In ibino buto kunono pi ceng tol adek kede ot kanyangon (390) di itie kanyo alola nono. Ango atieko ngolo nin kop me kanyo alola gin, ceng acel pi mwaka acelacel kame alola gin bino tero.

⁶ Ka itieko gi, ibino bobo buto piny kede ngeti tetu cam, di iko kanyo alola pi jo me Yuda pi ceng ot ongwon; buli ceng acel pi mwaka acel me alola gin.

⁷ “Mi nyimi nen bomba me Yerusalem kame jokwor otieko luko nono, di iko murao kop i kome di badi tie nono.

⁸ Neningo, ango abino tweni kede tol di likame iko karuno lokere tetu moroni tuno di kare kame koluko kede bomba otiek.

⁹ “Aso, kwany engano kede mawele, muranga kede kao, kal kede bel. Nyal gi i sepula acel di iko tedo mugati. Manono en gikame in ibino camo i kare me ceng tol adek kede ot kanyangon (390) kame in ibino tieko di ibuto kede ngeti tetu ngodal.

¹⁰ Cam kame in ibino camo kobino pimo apima, mugati kame peko mere tie guram tol are kede ot adek (230) tien acel buli ceng i esawa kame komoko.

¹¹ Pii kame ibino mato da kobino pimo apima, ikopon are buli ceng i esawa kame komoko.

¹² Ibino moko mac kede cet me jo, di iko tedo mugati me mawele iye di jo dedede neno, di iko came.”

¹³ Rwot oko waco be, “Manono en ekite kame jo me Isirael bino camo kede cam kalikame iswil yei negi camo, i diere me atekerin kame ango abino riamo gi iye.”

¹⁴ Di ango ako gamo be, “Likame kamano Rwot Rubanga! Ango lem pwodi likame apwokere. Cako di pwodi ango atitidi ango pwodi likame acamo gi oto atoa arabo kame le moro en oneko. Likame pwodi tie ringo moro me gi kopwokere kotieko tuno i doga.”

¹⁵ Di Rubanga oko waco na be, “Neningo, ango abino mini do itedo mugati ni kede woyo akaka cet me jo.”

¹⁶ Di eko meede waco na be, “Wot ka dano, ango ayaro mino mugati rwenyo ki Yerusalem. Jo me Yerusalem bino camo mugati kame kopimo apima di kitie kede lworo; doko kibino mato pii da kame kopimo apima di cuny gi popoto.

¹⁷ Mugati kede pii bino tiek negi, di gin kiko donyo neeno ken gi ken gi di cuny gi onyote, doko kibino jony pi dub gi.”