Esekeri 38 - Baibuli I Leb Kumam 2013

Gog tie bala Ebela me Yi ka Rubanga

¹ Rwot oko waco na be,

² “Wot ka dano, bunano Gog, en ngapug adwong me Mesek kede Tubal, i lobo me Magog. Bunano en

³ di iwaco ne be ango Rwot atie waco be: ango atieko doko ngakwor ni, in Gog, ngapug adwong me Mesek kede Tubal.

⁴ Abino loki iwire, di ako kodo itinyo ni kede golu di ako ware kedi karacel kede twon ekodet adwong me isirikalen ni. Magonogo bino ribo asigiran, jo kame ringo kede asigiran, di gin dedede di kingapere kede jamini me yi, di kimako ibukui kede ipimai i cing gi.

⁵ Isirikalen ni ribo jo me Pasia, Abisinia kede Libiya, di gin dedede kitie kede ibukui kede icoron atek me gwoko wic;

⁶ jo yi me Gomer kede me Bet Togarama atie i bad tetu malo tie kedi, jo atot adikinicel en kame tie kedi.

⁷ “Bed di i iikere, in karacel kede isirikalen dedede kocokere luki kame tie i amuri nin.

⁸ Pien ingei mwakini anonok, ango abino ciki pi ot suro lobo kame yi oudo odudubo. Oudo jo oweke pi kare alac, do nataman oko dwoko jo mege nogo ki lobere me obukui kakame oudo bin kibedo iye. Gin nan kibedo i mulem abongo lworo moro i wi mori me lobo gi.

⁹ In kede isirikalen ni karacel kede atekerin ace kame tie kedi ibinunu ot suro gi bala yamo ager me kot, di ikounu umo lobo gi bala edou.

¹⁰ “I ceng nono tam bino bino i wii di iko timo iik arac.

¹¹ Ibino waco be, ‘Ango amito ot suro lobo me jo kame bedo i bomban ali kede cel kede irutei, kede gi me cego irutei, jo kame bedo i mulem abongo lworo moro.’

¹² Ibino yako jamini di iko tero; ibino suro jo kame nan bedo i bomban kame bin oudo otieko doko amejeko, jo kame kocoko ki kom atekerin apat. Nataman gin kipong kede doke kede jamini, di kibedo i kabedo kame pire tek i wi lobo lung.

¹³ Jo me Seba kede Dedan kede jocat wil me Tarusi kede isirikalen mege acal bala inguon bino penyi be, ‘Icoko isirikalen ni pi bino yako jamini? Benyo, ibino pi tero siliba kede saabu kede doke kede jamini ace apat?’

¹⁴ Pi manono, wot ka dano, wac ne Gog be ango Rwot Rubanga atie waco kaman: i ceng nono ka jo na me Isirael tie bedo i mulem in ibino yai

¹⁵ ki kabedo ni atie wiriwir i bad tetu malo, in karacel kede jo atot, gin dedede di kitie ringo kede asigiran, twon ekodet me isirikalen atek.

¹⁶ Ibino suro jo na me Isirael bala kame edou me kot me yamo umo kede wi lobo. Abino cwani suro lobo na tetekeny atekerin ko bino ngena, ka ango anyuto negi be ango abedo ngat kacil i gikame ango abino timo kibuti in Gog.

¹⁷ In en ngat kame ango bin sek awaco kop i kome ki dog jotic na inabin me Isirael be, i kare me anyim ango oudo abino kelo dano moro suro Isirael.” Rwot Rubanga en owaco.

Alola kame Rubanga Omio Gog

¹⁸ Rwot Rubanga owaco be, “I ceng nono kame Gog osuro Isirael, ango abino doko ger.

¹⁹ Atie waco kede nyeko kede gero be: i ceng nono lobo me Isirael bino yangere adikinicel.

²⁰ Aporogon me nam kede winy dedede, leini dedede me obar kede gikame liao alia i wi lobo, kede jo dedede kame bedo i wi lobo kom gi bino miel pien udo kitie kede lworo i tie nango; di mori kede apamai aboco malo me lelai ko bino popoto, kede apamai me gedo dedede da bino popoto.

²¹ Abino cwano ipimai dedede me wi mori na i kom Gog; jo mege bino lokere nekere ken gi ken gi kede ipimai.

²² Abino mine alola me aumpuli kede nek. Kot aony kitek kede akako, karacel kede mac kede salupa bino cwei i kome kede i kom isirikalen mege kede jo dedede kame tie kede en.

²³ Iepone noni ango abino nyuto ne atekerin dedede dwongo na, kede da be ango abedo ngat kacil. Gin kiko bino ngeno be ango abedo Rwot.”