Esekeri 36 - Baibuli I Leb Kumam 2013

Winyo ka Rubanga but Jo me Isirael

¹ Rwot oko waco na be, “Wot ka dano, wac ne mori me Isirael be

² ango Rwot Rubanga atie waco kaman: jokwor me Isirael waco be, ‘Ebo, mori me anakacia go otieko doko megwa.’

³ “Wac negi kop kame ango Rwot Rubanga atie waco be: ateteni jokwor nogo omio wu idongunu nono, di kiko nyonyoto wu ki bad dedede, di atekerin apat oko mamako wu di kiko donyo kwoto wu di kiyamo kope areco i komu.

⁴ Pi manono, winyunu kop kame ango Rwot Rubanga atie waco ne wun mori kede imukuran, wun isamai kede aditoto, wun kabedere kame oudo kodudubo kede bomban kame jo oyai kiye, kame oudo koyako di ikounu doko gi me anyera i diere me atekerin koluko wu.

⁵ “Ango Rwot Rubanga atie yamo di atie kede twon gero i kom atekerin apat, twatwal mere i kom Edom. Di kitie kede yomcuny kede acae gin kimao lobo na odoko mergi pi lum kame tie iye.

⁶ “Aso, wac ne lobo me Isirael, wac ne mori, imukuran, isamai kede aditoto gikame ango Rwot Rubanga atie yamo kede twon gero, pi ekite kame atekerin apat obedo yeyeto gi kede.

⁷ Ango Rwot Rubanga akwongere be, atekerin koluko gi rimaro kobino yeyeto gida.

⁸ Do i wi mori nin Isirael yen bino lot di kiko nyako anyakini ne jo na me Isirael, pien gin kibino dwogo oyotoyot.

⁹ Ango atie i bad nin; ango abino lokere buti, di oko bino puri di oko pito kodere.

¹⁰ Ango abino mino wel me jo nin nyai, jo dedede me Isirael; jo bino dok bedo i bomban di oko bino temuno gero kabedere kame oudo kodudubo.

¹¹ Abino mino wel me jo kede me leini nin meede. Gin kibino nywal di kiko nyai. Ango abino mino jo dok bedo i lobo nin bala bin sek, di ako timo ni bero kalikame lem pwodi atimo ni. Di do in iko bino ngeno be ango en Rwot.

¹² Abino dwoko jo na me Isirael bedo i lobo nin, di lobo nono ko doko mergi. Likame bobo in ibino mino gi kikei idwe gi.

¹³ “Ango Rwot Rubanga atie yamo kaman: ateteni jo tie yamo be in itie tieko jo, doko da itie mino ateker kei idwe gi.

¹⁴ Do cako nan likame doko in ibino meede tieko jo, doko da likame ibino mino ateker ni kei idwe mege; ango Rwot Rubanga en awaco.

¹⁵ Likame doko abino mini iwinyo ayet awok kibut atekerin; likame doko kibino bedo kede acae i komi. Likame doko in ibino mino ateker ni gete; ango Rwot Rubanga en awaco.”

Isirael i Kuo Kanyen

¹⁶ Rwot oko waco na be,

¹⁷ “Wot ka dano, kakame jo me Isirael oudo tie bedo kede i lobo gi, yote me kuo gi kede tice gi oko mino lobo nono opwokere. Kibuta yote me kuo gi oudo cal bala pwokere me dako atie kede tuwo duwe.

¹⁸ Aso, ango ako jalakino gero na i kom gi pi remo kame oudo kionyo i lobo nono, kede pi caljwogi kame gin kimunao kede lobo nono.

¹⁹ Ango ako sasaro gi i diere me atekerin, di kiko sasarun i pinye apapat. Ango oudo angolo negi kop di lubere kede ekite me kuo gi kede tice gi.

²⁰ Do i diere me atekerin, kabedere dedede kame gin oudo kibeo iye oudo gin kipwoko nyinga kacil, pien jo oudo waco kop i kom gi be, ‘Magi obedo jo ka Rwot, do gin kiyai kiweko lobo mere.’

²¹ Do ango oudo aparo pi nyinga koudo jo me Isirael opwoko i diere me atekerin koudo gin kioto iye.

²² “Pi manono, nan wac ne jo me Isirael be ango Rwot Rubanga atie waco kaman: likame piru en komio nataman ango ayapuno timo gikame abino timo, do pi nyinga kacil kame wun itiekunu pwoko i diere me atekerin kame wun iotunu iye.

²³ Ango abino lonyo nyinga adwong, nying kotieko pwokere i diere me atekerin, di atekerin ko bino ngeno be ango en Rwot. Manono bino timere kame ango anyuto negi kibutu be ango abedo ngat kacil.

²⁴ Ango abino kwanyo wu ki diere me atekerin, abino coko wu ki pinye dedede di ako dwoko wu i lobo wu amako wu.

²⁵ Abino kikiro pii acil i komu di ako bino lonyo wu ki pwokere wu kede ki caljwogi wu.

²⁶ Ango abino mino wu cuny anyen kede tam anyen; abino kwanyo ki butu cuny me epali di ako lunyo mino wu cuny awor.

²⁷ Ango abino keto tipo na i kuo wu di ako mino wu ilubunu iswilia na di ikounu gwoko cik na.

²⁸ Di do ikounu bino donyo bedo i lobo kame oudo ango bin amio joakwari wu; di wun ikounu bino bedo jo na, di ango ako bedo Rubanga wu.

²⁹ Ango abino lako wu ki gi dedede kame pwoko wu; abino mino cik di kac ko bedo tot tetekeny kec likame doko bino mako wu.

³⁰ Abino mino yen nyak kitek, di poti wu da ko ceko cam atot, tetekeny kur doko lewic me bedo kec kec bed tie ne wu i diere me atekerin.

³¹ Di ikounu bino yutuno yote wu areco kede tice wu kalikame ber, di cunyu ko bino wang kenu pi gikareco kame itimunu.

³² Wun jo me Isirael ango amito ingeunu be likame ango abino timo manoni piru. Poore lewic maku pi gikame ibedunu timo; ango Rwot en awaco.

³³ “I ceng kame ango abino lonyo wu kede ki dub wu dedede, abino mino wu icakunu doko bedo i bomban wu, di ikounu medo gero ude kopopoto.

³⁴ Ibinunu puro lobo kame kony mere oudo odoko li, di likame doko eko bedo lobo kame kony mere li bala kame jo kame oudo beo kanono neno kede.

³⁵ Gin kiko bino donyo yamo be, ‘Lobo kame kony mere oudo li noni odoko cal bala poto me Eden; doko da bomban kame kony gi oudo odoko li di kitieko popoto nan do jo bedo i yi gi, doko da kocelo gi.’

³⁶ Di do atekerin kodong kio kede wu ko bino ngeno be, ango Rwot atieko medo gero kabedere koudo opopoto, di ako medo pito kodere i poti kame kony gi oudo otieko doko li. Ango Rwot en awaco kop noni, doko da abino time.”

³⁷ Rwot Rubanga waco be, “Abino da mino jo me Isirael penya pi timo negi kaman: pi mino wel gi meede bala me romini.

³⁸ Di do jo ko bino pong i bomban kame nataman opopoto, bala kame bin Yerusalem opong kede romini kame oudo kopoore yalo i kare me ibagai. Di do gin kiko bino ngeno be ango en Rwot.”