Esekeri 34 - Baibuli I Leb Kumam 2013

Jokwat me Isirael

¹ Rwot oko waco na be,

² “Wot ka dano, ronkino jokwat me Isirael, gin en jopug mege. Bunano jokwat nogo di iwaco negi be ango Rwot Rubanga atie waco kaman: itienu i can wun jokwat me Isirael. Wun ibedunu pito komu di ikounu weko gwoko romini.

³ Imatunu cak gi, ingapunu igoen me yer gi, ingolunu kocwe mege, do likame igwokunu gi.

⁴ Likame igwokunu agoro mege, likame imuketunu atuwo mege, koudo awanon mege iwekunu likame itwetweunu aporeso gi, koparao likame ilekunu gi pi dwoko gi, kede da likame imounu korwenyo mege. Do akaka manono wun ibedunu kede gero but gi.

⁵ Aso, manono oko mino gin kisarakin, pien oudo kili kede ngakwat, di do leini me obar oko camo gi.

⁶ Romini na oko sasarun; kibedo rimo piny i wi mori kede imukuran dedede; romini na osasarun i wi lobo dedede abongo ngatamoro kame tie mono gi.

⁷ “Pi manono, wun jokwat winyunu gikame ango Rwot atie waco ne wu:

⁸ Ango Rwot Rubanga akuo atie waco be, romini na odoko cam me leini me obar pien kili kede ngakwat. Doko da jokwat na likame obedo mono romini korwenyo, do gin girgi kilokere pito kuo gi di kiweko pito romini na.

⁹ Pi manono, wun jokwat winyunu gikame ango Rwot atie waco.

¹⁰ Ango Rwot Rubanga atie waco be, ango atieko doko ngakwor wu. Ango abino kwanyo romini na ki cingu di ako gengo wu bedo jo kame gwoko gi. Likame doko ibininunu donyo pito komu. Abino lako romini na ki cingu tetekeny likame doko ibinunu donyo camo gi.”

Ngakwat Aber

¹¹ Rwot oko waco be, “Ango kikoma abino mono romini na di ako donyo gwoko gi.

¹² Bala kame jokwat mo kede romini kosasarun di kiko coko gi, kamanono ada abino mono romini na korwenyo. Ango abino dwoko gi ki kabedere dedede kame oudo kisasarun iye i ceng me colo kede me peko.

¹³ Abino dwoko gi kibut atekerin, abino coko gi ki pinye me kumbor di ako dwoko gi i lobo gi amako gi. Abino kwano gi kicamo lum atie i wi mori me Isirael, kede i isamai kede i kabedere dedede kame lum okolomo iye.

¹⁴ Abino mino gi kicamo lum abeco atie i wi mori me Isirael; gin kibino urako kunono i kakwat aber di kicamo lum okolomo i wi mori.

¹⁵ Ango kikoma abino bedo ngakwat me romini na; abino mino gi kiurako. Ango Rwot Rubanga en awaco.

¹⁶ “Abino mono korwenyo mege, di ako dwoko koparao; kowanere abino twetweo aporeso gi di ako mino agoro doko tek; do ocwe kede atek mege abino neneko. Ango abino timo negi gikame poore.

¹⁷ “Aso, nan wun romini kede diegi na, wun jo na me Isirael, ango Rwot Rubanga atie waco ne wu kaman: ango abino ngolo kop ne ngat acelacel kibutu di ako poko diegi kikom romini, jo abeco kikom jo areco.

¹⁸ Mogo kikom wu camo lum okolomo di kiko lokere nyonyono lum ace kodong kede tien gi; mogo kikom wu mato pii opiei di kiko lokere guro pii kodong kede tien gi.

¹⁹ Manono mio romini na ace camo lum kame konyonyono piny, di kiko mato pii korubere kede cwoto.

²⁰ “Pi manono, ango Rwot Rubanga atie waco ne wu kaman: ango abino ngolo kop i dierediere me romini kocwe kede kojony.

²¹ Wun romini atek icwalunu romini agoro tenge di ikounu donyo twotwomo gi kede tung wu paka tuno sarakino gi kakabor.

²² Ango abino lako romini na di likame doko oko donyo tidilo gi. Ango abino ngolo kop i diere wu di ako poko abeco kede areco.

²³ Ango abino mino gi abaka acal bala ngatic na Daudi, di en eko bino donyo gwoko gi; en ebino donyo gwoko gi di eko bedo ngakwat gi.

²⁴ Ango Rwot abino bedo Rubanga gi, di abaka acal bala ngatic na Daudi ko bedo ngapug gi. Ango Rwot en awaco.

²⁵ Ango abino timo kede gin isikan me mulem, di ako riamo tenge leini ager ki lobo nono, tetekeny kikaruno bedo i itela kede buto i abum abongo gimoro timo gi.

²⁶ “Ango abino mino gi kibedo i nget moru na kacil di ako mino gi winyo di acwao negi kot i kare kame mitere.

²⁷ Yen bino nyak, poti bino ceko cam, doko dano acelacel ko bino bedo i lobo mere amake abongo lworo moro. Ango abino lako gi ki cing jo komio gi kibedo ipasoi, di gin kiko bino ngeno be ango en Rwot.

²⁸ Likame doko atekerin me kumbor bino donyo yako gi, akadi leini ager da likame doko bino donyo neko gi di camo gi. Gin kibino bedo i mulem abongo ngatamoro mino gi lwori.

²⁹ Ango abino mino cam dongo negi di kec ko jik i lobo gi. Atekerin apat doko likame bino donyo yeyeto gi.

³⁰ Gin kibino ngeno be ango Rwot Rubanga gi atie kede gi, kede be gin jo me Isirael kibedo jo na. Ango Rwot Rubanga en awaco.

³¹ “Wun ibedunu romini na, romini kame ango akwao, doko ango abedo Rubanga wu,” Rwot Rubanga en owaco.