Esekeri 33 - Baibuli I Leb Kumam 2013

Rwot Omio Esekeri Obedo bala Ngakino Piny

¹ Rwot oko waco na be,

² “Wot ka dano, wac ne jo ni gikame timere ka ango akelo yi i lobo. Jo me lobo nono yero dano acel kikom gi di kiko kete ebedo ngakino piny.

³ Kame ngakino piny oneno di jokwor tie bino i lobo nono, en ekuto agwara me kwenyaro jo.

⁴ Kame ngatamoro oko winyo agwara nono di en likame eko paro pire, di do jokwor oko bino di kiko neke, raco me to mere dong i wie.

⁵ Raco me to mere dong i wie piento en ewinyo koko me agwara do likame eko paro pi ikwenyar nono. Do ka koto oudo eparo pi ikwenyar nono, oudo koto elako kuo mere.

⁶ Do ka ngakino piny oneno di jokwor tie bino di likame eko kuto agwara pi kwenyaro jo, di do jokwor oko bino di kiko neneko jodubo nogo, to gi ango abino maro raco mere i wi ngakino piny.

⁷ “Aso, in wot ka dano, nan ango atie keti pi bedo bala ngakino piny pi ateker me Isirael. In ipoore mino gi ikwenyar kame ango abino mini.

⁸ Kame ango awaco ne jo areco be ateteni kibino to, do di in iko dagi kwenyaro gi pi weko yote gi areco, jo areco nogo bino to i dub gi, do raco me to gin ango abino maro i wi in.

⁹ Do ka in ikwenyaro jo areco pi weko yote gi areco, do gin kiko dagi lokere tenge ki yote nogo, jo areco nogo bino to i dub gi, do udo in ilako kuo ni.”

Gikame Dano Acelacel poore Timo

¹⁰ Rwot oko waco na be, “Nyogao waco ne jo me Isirael gikame gin kitie waco be, ‘Dub wa kede gikareco kame otimo okelo ne wa peko; manono omio wa ojony do. Benyo benyo kame wan obino twero kuo kede?’

¹¹ Wac negi be ateteni ango Rwot Rubanga akuo akwongere be ango likame atie kede yomcuny i kom to me jodubo, do cunyango mito neno di jodubo weko yote gi areco di kiko bedo kuo. Lokerenu, lokerenu tenge ki yote wu areco; kara pinyo komio imitunu to, wun jo me Isirael?

¹² “Aso, in wot ka dano, nan wac ne jo me Isirael be, ka dano moro aber odubo, bero kame en oudo ebedo timo likame lake. Ka ngat arac oweko yote mege areco, likame komie alola; doko da ka ngat aber ocako timo dub, likame kuo mere bino bwot.

¹³ Akadi bed bala ango acikere pi mino kuo but jo abeco, do ka gin kiko cako paro be bero gin me kare kokato twero lako gi, di do kiko cako timo dub, ango likame abino yutuno bero kame gin kitimo, do gin kibino to pi dub kame gin kitimo.

¹⁴ Doko da bed bala ango atieko waco ne jo areco be, ‘Ateteni ibinunu to,’ do ka dano moro arac oko weko dub di eko donyo timo gikaber kame iswil mito,

¹⁵ opor bala be, ka dano arac moro odwoko gikame osingao ne pi banya, arabo ka edwoko gikame ekwalo ne wone, ka en eko do donyo lubo iswilia kame mio kuo, en ateteni ebino kuo, likame ebino to.

¹⁶ Ango abino sasiro dub dedede kame en etimo, en ebino kuo piento en etimo gi kopoore kame iswil mito.

¹⁷ “Do jo nin waco be, ‘Rwot timo gi kalikame opoore,’ do di yote gin en kalikame opoore.

¹⁸ Ka dano kopoore oweko yote mege kopoore di eko timo dub, en ebino to.

¹⁹ Ka dano moro arac oweko yote mege areco di eko donyo timo gi kopoore kame iswil mito, en ebino kuo pi manono.

²⁰ Do wun jo me Isirael iwacunu be, ‘Rwot timo gi kalikame opoore.’ Ango abino ngolo ne wu kop di lubere kede tice wu.”

Rwonge me Yerusalem Poto

²¹ I ceng me kany me duwe me tomon me mwaka me tomon kiwie are me wan bedo i lobo me obukui, ngatamoro koudo obwot ki Yerusalem oko bino buta di eko waco na be, “Bomba otieko poto.”

²² Otieno aru ceng kame icuo kobwot nono obino kede buta, twer ka Rwot oudo odonyo i kuo na. Kakame en do eko tuno kede buta odiko, oudo Rwot otieko mino doga bobo twero yamo.

Dub kame Jo Otimo

²³ Rwot oko waco na be,

²⁴ “Wot ka dano, jo kame bedo i bomban kame kodudubo me Isirael tie waco be, ‘Aburaam oudo obedo icuo acel do oko mine lobo noni dedede. Do bala kame nataman wan ototunu kede, ateteni kotieko mino wan lobo noni.’

²⁵ “Pi manono wac negi be ango Rwot Rubanga atie waco kaman: wun icamunu ringo di pwodi remo tie iye; iworunu caljwogi; inekunu jo. Iparunu be magonogi twero mino lobo noni doko meru?

²⁶ Epima obedo gikame wun do iketunu iye gen wu; itimunu tim ingorijij; itimunu tim me adote. Iparunu be magonogi twero mino lobo noni doko meru?

²⁷ “Wac negi be ango Rwot Rubanga akuo akwongere but gi be, ateteni jo kame bedo i bomban kame kodudubo kobino neneko gi, do jo kame tie obar abino mino leini me obar en acamo gi; jo kame tie gwokere kakatek kede i abo aumpuli en kame bino neneko gi.

²⁸ Abino mino lobo gi doko kakame kodudubo, kame kony mere li, di teko kame kiwakere pire ko tiek. Mori me Isirael da bino dong nono di lworo ko donyo mako jo beo kugonogo.

²⁹ Ango abino mino jo alola pi dub gi di ako mino lobo gi doko kabedo kame kony mere li, di gin kiko bino ngeno be ango en Rwot.”

Adwogini me Kop ka Enabi

³⁰ Rwot oko waco na be, “Wot ka dano, jo ni tie yamo i komi ka kiriamo i diere me apamai me bomba kede i nyim ikekon me ude gi. Gin kiyamo ken gi ken gi be, ‘Bianu ootunu owinyunu kop kowok kibut Rwot.’

³¹ Aso, gin kiko bino buti di kiko bedo i nyimi bala jo na pi winyo kop ni, do gin likame kiko timo gikame in iwaco negi. Kope kame wok ki dog gi winyo mit, do cuny gi tie i timo aram.

³² Kibut gin in ical bala ngawer kame yomo cuny jo kede were amit me amara di ego adungu. Gin kiciko yit gi winyo kope nin dedede do likame kilubo akadi acel kikom gi.

³³ Do ka kope nin ocobere, doko da kibino cobere, gin kibino ngeno be enabi oudo tie i diere gin.”