Esekeri 32 - Baibuli I Leb Kumam 2013

Koporo Abaka me Misiri kede Nyang

¹ I ceng me agege me duwe me tomon kiwie are me mwaka me tomon kiwie are kame wan oudo otie kede obukui, Rwot oko waco na be,

² “Wot ka dano, cak wer me koko pi Parao abaka me Misiri di iko waco ne kaman: in iparo be in ibedo engu i diere me atekerin, do kom in ical acala bala nyang kame tie i ecilet. In isanyo i pii di tieni ko guro pii di pii ko doko cwoto.

³ Kame atekerin atot ocokere, ango abino maki kede bwoi na di gin kiko wani kede bwoi nono ooko.

⁴ Abino kwiti obar di ako mino winy me obar cami; abino mino leini me wi lobo dedede rangrango cami.

⁵ Abino kikiro ringo komi i wi mori, di ako culo aditoto kede ringo komi nono.

⁶ Abino mino remo ni mol paka diako lobo tuno i wi mori, di eko pongo isamai.

⁷ Kakame ango abino muducaro in kede, abino umo malo, abino mino acerin doko col; abino umo wang ceng kede edou di duwe da ko jiko rieny.

⁸ Abino mino jamini arieny dedede atie malo doko col, di colo ko bino umo lobo ni; ango Rwot Rubanga en awaco.

⁹ “Abino mino cuny jo me atekerin atot dubere kakame ango abino sarakino kede jo ni kame komako i diere me atekerin apat, i pinye kalikame in ingeo.

¹⁰ Gikame abino timo ni bino neko kom jo me atekerin atot; abakai gi kom gi bino miel kede lworo. I ceng kame in ibino poto kede, gin dedede kom gi bino miel pi kuo gi, kakame ango atie wiwiro kede epima na i nyim gi.”

¹¹ Rwot Rubanga waco ne abaka me Misiri be, “Abaka me Babilon bino yi kedi.

¹² Abino mino isirikalen atek yi kalamo atekerin dedede neneko jo ni. Kibino dudubo jamini dedede kame Misiri wakere pirgi di kiko neneko isirikalen mege dedede.

¹³ Abino neneko leini wu i nget pie adongodongo. Tien jo amoto tien leini likame doko bino guro pie nogo.

¹⁴ Di do ako bino mino pie nogo piei di isamai ko donyo mol mot bala mo amol. Ango Rwot Rubanga en awaco.

¹⁵ Kame ango adudubo Misiri oko doko lobo kame kony mere li, di ako muducaro jo dedede kame tie kunono, gin kibino ngeno be ango en Rwot.

¹⁶ Ikwenyar noni bino doko wer me koko. Mon me atekerin bino were pi koko Misiri kede jo mege. Ango Rwot Rubanga en awaco.”

Piny me Jo Oto

¹⁷ I ceng me tomon kiwie kany me duwe me agege me mwaka me tomon kiwie are me wan bedo i lobo me obukui, Rwot oko waco na be,

¹⁸ “Wot ka dano, kok pi twon jo me Misiri, di iko cwano gi karacel kede jo ace me atekerin atek i kabedo me jo oto, pi ribere kede jo kaoto kunono.

¹⁹ Wac negi kaman: “Iparunu be wun en ikalamunu kede cilo? Ibinunu ot i kabedo me jo oto pi wei karacel kede jo kalikame wora.

²⁰ “Jo me Misiri bino to to me epima kede jo apat; kotieko mino Misiri i cing wegi ipimai pi timo nek; tere karacel kede jo mege i kabedo me jo oto.

²¹ Ijakai kabin tek bino yamo ki dier kabedo me jo oto i kom Misiri kede i kom jo kokodere kede en be, ‘Jo kalikame woro Rubanga kame koneneko i yi nan obino piny kan, ige kibuto kinatakin.’

²² “Asiria tie kunono, di atesin me isirikalen mege oluke, isirikalen kame bin koneneko i yi.

²³ Atesin gi tie i ajikini me bur katut i lobo me jo oto. Isirikalen mege dedede koneneko i yi, nan atesin gi luko mere. Gin oudo kikelo lworo atek twatwal i lobo me jo akuo.

²⁴ “Elam tie kunono, di atesin me isirikalen mege oluke, gin dedede bin koneneko gi i yi. Gin kioto i piny me jo oto di likame kokepo gi. Gin oudo kikelo lworo atek twatwal i lobo me jo akuo, do nan kitie do yeno lewic i wi gi kede jo aoto i piny me jo oto.

²⁵ Elam nan buto piny karacel kede jo kame koneneko i yi, di atesin me isirikalen mege oluke, gin dedede jo kalikame kokepo kame koneneko kede epima. Gin oudo kikelo lworo atek twatwal i lobo me jo akuo, do nan kitie do yeno lewic i wi gi kede jo aoto i piny me jo oto; gin do kitie i kom jo kame koneneko.

²⁶ “Mesek kede Tubal tie kunono, di twon atesin me isirikalen gi oluko gi, gin dedede jo kalikame kokepo kame koneneko kede epima. Gin oudo kikelo lworo atek twatwal i lobo me jo akuo.

²⁷ Gin likame oko yiko gi aika me wor, bala jo yi kariki sek kooto i piny me jo oto kede jamini gi me yi, di kopielo wi gi i kom ipimai gi, kede di ibukui gi buto i kom gi. Jo yi nogi bin okelo lworo atek twatwal i lobo me jo akuo.

²⁸ “Manoni en epone kame kobino muducaro kede Misiri di eko buto piny karacel kede jo kalikame kokepo kame koneneko i yi.

²⁹ “Edom tie kunono kede abakai kede jopug mege. Gin oudo kibedo isirikalen atek do nan kibuto karacel kede jo kame koneneko kede epima; kitie buto i piny me jo oto karacel kede jo kalikame kokepo.

³⁰ “Jopug dedede me bad tetu malo tie kunono karacel kede jo me Sidon. Gin oudo kikelo ne jo lworo pi teko gi, do nan kidonyo piny kede lewic i wi gi karacel kede jo ace kame koneneko; gin jo kalikame kokepo nan kitie buto karacel kede jo kame koneneko kede epima, di kiyeo lewic i wi gi kede jo aoto i piny me jo oto.

³¹ “Abaka me Misiri kede isirikalen mege bino neno atesin me jo kame koneneko i yi di cuny gi ko dwogo, pien udo likame gin ken gi en kame koneneko gi.

³² Pien Parao obedo kelo lworo i lobo me jo akuo, pi manono en kede isirikalen mege kobino neneko gi di kiko ot wei karacel kede jo kalikame kokepo, jo kame koneneko i yi. Ango Rwot Rubanga en awaco.”