Esekeri 30 - Baibuli I Leb Kumam 2013

Rwot bino Mino Misiri Alola

¹ Rwot oko bobo waco na be,

² “Wot ka dano, murao, wac ne jo be ango Rwot Rubanga atie waco kaman: “kokunu pi ceng me neno can.

³ Ceng nono iyapiyapi; ceng kame ango Rwot abino mino iye alola onoko. En ebino bedo ceng me colo, ceng kame atekerin bino beo kede i peko.

⁴ Yi bino poto Misiri, di par alit ko bino bedo tie Abisinia. Kobino neneko jo atot me Misiri; kobino yako abar mere, di oko bino tuturo en.

⁵ “Isirikalen me Abisinia, Lidia, Libiya, Arabia kede Kub, ribo kiton me lobo na da kobino neneko gi i yi nono.”

⁶ Rwot waco be, “Jo dedede kame gango Misiri cako ki Migidol tuno Asuwan kobino neneko gi; teko kame Misiri wakere kede bino tiek; ango Rwot Rubanga en awaco.

⁷ Lobo me Misiri bino dong nono kalamo lobere apat dedede me wi lobo, kede bomban mege ko doko kakame kodudubo kalamo bomban dedede me wi lobo.

⁸ Ango abino cwinyo mac Misiri di oko neneko jo dedede kame gange, di gin kiko bino ngeno be ango en Rwot.

⁹ “Kame ceng nono otuno di oko dudubo Misiri, ango abino cwano jo kede imerin ot Abisinia pi onyo lworo i kom jo kopalaro me kunono. Kibino bedo kede par alit i ceng kame Misiri bino beo kede i peko. Ceng nono tie bino!”

¹⁰ Rwot Rubanga waco be, “Abino tic kede Abaka Nebukadunesa me Babilon pi jiko abar me Misiri.

¹¹ En ebino bino kede jo mege, ateker ager kalamo atekerin dedede, di kiko dudubo lobo me Misiri. Kibino suro Misiri kede ipimai di liele ko bino rade kabedere dedede.

¹² Abino mino ecilet me Nail tuo di ako mino Misiri i cing jo areco. Abino cwano jokumbor kame bino dudubo lobo nono eko doko gikame kony mere li. Ango Rwot en awaco.”

¹³ Rwot Rubanga waco be, “Ango abino dudubo caljwogi kede cal ace kame koworo i Mempi. Likame doko ngapug bino bedo tie Misiri, di ako bino mino jo dedede me lobo nono pong kede lworo.

¹⁴ Abino dudubo Paturos eko doko bomba kame kony mere li, di ako wango bomba me Soan. Abino kelo alola i bomba me Tebes.

¹⁵ Pelusium bino riamo kede twon gero na, en bomba kobedo kateko me Misiri, di ako muducaro alule me isirikalen atie Tebes.

¹⁶ Abino cwinyo mac Misiri; Pelusium bino bedo kede par alit; kobino tuturo apama me Tebes di jokwor ko bino ot ne jo me Mempi iceng.

¹⁷ Kobino neneko awobe me bomba me On kede Pibeset, di oko bino mako jo apat kotero bala mabus.

¹⁸ Colo bino umo Tapankes ka ango atieko teko kame Misiri tie kede di ako jiko ewaka mere. Edou bino umo Misiri di oko bino mamako jo me bomban mege kotero bala mabus.

¹⁹ Ango abino mino Misiri alola iepone noni, di gin kiko bino ngeno be ango en Rwot.”

Kotieko Teko me Abaka me Misiri

²⁰ I ceng me kanyaare me duwe me agege me mwaka me tomon kiwie acel me wan bedo i lobo me obukui, Rwot oko waco na be,

²¹ “Wot ka dano, ango atieko turo bad abaka me Misiri. Likame ngatamoro otweo bade nono akadi bure pi cango, me wek koto ecangi di eko karuno mako epima.

²² Pi manono, ango Rwot Rubanga nan atie waco kaman: ango atieko doko ngakwor me abaka me Misiri. Ango abino tuturo bade, bade aber ribo kiton koudo otur, di epima ko bino poto ki cinge.

²³ Ango abino sarakino jo me Misiri i diere me atekerin i lobere lung.

²⁴ Ango abino mino bad abaka me Babilon doko tek, di ako bino keto epima na i cinge; do abino tuturo bad Parao me Misiri di en eko bino dorano i nyim abaka me Babilon kede idoran me dano kame komio awanon me to.

²⁵ Ango abino mino bad abaka me Babilon doko tek, do bad abaka me Misiri bedo lojolojo. Ango abino keto epima na i cing abaka me Babilon di en eko cime kede Misiri, di jo dedede ko bino ngeno be ango en Rwot.

²⁶ Ango abino sarakino jo me Misiri i diere me atekerin i pinye dedede. Di gin kiko bino ngeno be ango en Rwot.”