Esekeri 3 - Baibuli I Leb Kumam 2013

¹ Rubanga oko waco na be, “Wot ka dano, cam gikame komii; cam itabu adola noni, di iko ot yamo kop ne jo me Isirael.”

² Aso, ango ako ngamo doga di en eko mina itabu adola nono pi camo.

³ En ewaco na be, “Wot ka dano, cam itabu adola noni kame ango atie mini di iko yeng kede.” Di ango ako came, ako ude emit bala mokic.

⁴ Rubanga oko bobo waco na be, “Wot ka dano, ot but jo Isirael di iko waco negi kope nango kame atie waco ni.

⁵ Ango likame atie cwani but jo mogo kame yamo leb apat atek, do but jo me Isirael,

⁶ likame twon jo mogo kame leb gi papat di etek, leb kalikame in iniang. Ateteni ka koto oudo ango acwai but jo kame yamo leb akodi manono, koto gin kiwinyo kop nin.

⁷ Do jo Isirael likame bino winyo kop kame in iwaco negi, pien gin likame kiyei winyo kop na. Gin dedede kili kede wor doko wi gi tek.

⁸ Neningo, ango atieko mino wangi odoko tek pi riamo kede mergi, kede wi da atieko mino odoko tek bala mergi.

⁹ Ango atieko mino wi odoko tek bala kidi, amie edoko tek kalamo lela; kur ilwor gi arabo cunyi nyote pi ekite me neeno gi, pien gin kibedo jojemo.”

¹⁰ Rubanga oko medo waco na be, “Wot ka dano, cik yiti winyo kope nango kame awaco ni dedede di iko keto gi i cunyi.

¹¹ Di do in iko ot but jo ni kame tie obukui, di iko waco negi gikame ango Rwot Rubanga atie waco negi, akadi gin kiwinyi arabo kidagi winyo.”

¹² Di do tipo ka Rubanga oko tinga malo, di ango ako winyo dwan moro kame mor i cen ngea waco be, “Pak bed but deyo ka Rwot i kabedo mere!”

¹³ Manono oudo obedo mor kame timere pi wawakun me bwom giakuo, kede mor me namisigan kame oudo tie i nget gi. Gin en kame oudo kitimo twon mor nono.

¹⁴ Twer ka Rwot oko bino i koma kede teko adwong, di tipo mere oko tinga etera tenge, ango ako ot kede kec cuny doko di ager.

¹⁵ Di ako tuno Tel Abib, i nget ecilet me Kebar, kakame oudo jo atie obukui tie bedo iye, di ango ako bedo kede gin kunono pi ceng kanyaare, di gianyuta kame oudo aneno oneko koma.

Rwot Oyero Esekeri pi bedo Ngakino Piny

¹⁶ I ngei ceng kanyaare, Rwot oko yamo keda.

¹⁷ En ewaco be, “Wot ka dano, ango atieko keti pi bedo ngakino piny pi jo me ot ka Isirael. In ibino winyo kop ki buta di in iko bino mino gin ikwenyar kame wok ki buta.

¹⁸ Ka ango awaco ne ngat kame timo gikarac be, ‘Ateteni in ibino to,’ di in likame iko kwenyaro en pi weko yote areco me kuo mere tetekeny elak kuo mere, en ebino to i dub mere; do ango abino maro to mere i wi.

¹⁹ Do ka in ikwenyaro ngat kame timo gikarac, di en eko dagi weko tim mere arac nono, arabo yote areco me kuo mere, en ebino to i dub mere, do udo in itieko lako kuo ni.

²⁰ “Bobo ka ngat kopoore oweko kuo mere me poore di eko lokere timo dub, di ango ako cibo i nyime gikame getero en, en ebino to pien in likame ikwenyaro en. En ebino to pi dub mere, doko ango likame abino yutuno gi kabeco kame en oudo ebedo timo. Do ango abino maro to mere i wi.

²¹ Aso ka in ikwenyaro ngat kopoore be kur etim dub, di en likame eko timo dub, en ateteni ebino bedo kuo, piento en ewinyo ikwenyar; doko ida udo itieko lako kuo ni.”

Esekeri likame bino Karuno Yamo

²² Di twer ka Rwot oko bino i koma i kunono; di ako winyo di Rwot waco na be, “Yai di iko ot i Aditot. Ango abino yamo kedi i kunono.”

²³ Aso, ango ako yai di ako ot i Aditot, di ako neno deyo ka Rwot kunono, deyo kame cal bala kame ango oudo aneno i nget ecilet me Kebar. Ango ako riebere piny.

²⁴ Tipo ka Rubanga oko donyo i koma, di eko kiarao ango ako cungo. Rwot oko waco na be, “Oti di iko cegere i odi.

²⁵ Do in, wot ka dano, kobino tweni kede aunon, di likame iko karuno ot i dier jo.

²⁶ Ango abino mino lebi moko i dani tetekeny likame in ikaruno yamo, di in likame iko bino karuno kwenyaro gin, pien gin kibedo jojemo.

²⁷ Do i kare kame ango abino yamo kedi, ango abino yabo dogi, di in iko bino waco negi gikame ango Rwot Rubanga atie waco. Jo kame bino winyo, wek gi kiwinyi; doko jo kame bino dagi winyo, wek gi kibedi; pien gin kibedo jojemo.”