Esekeri 29 - Baibuli I Leb Kumam 2013

Kop Arac kame Komurao i kom Misiri

¹ I ceng me tomon kiwie are me duwe me tomon me mwaka me tomon kame oudo wan otie kede i lobo me obukui, Rwot oko waco na be,

² “Wot ka dano, murao kop arac i kom Parao abaka me Misiri kede i kom lobo me Misiri dedede.

³ Wac ne be ango Rwot Rubanga atie waco kaman: ango atieko doko ngakwor ni, in Parao abaka me Misiri, in twol kiyiliyili kame liao lubo ecilet di iwaco be, ‘Nail obedo mera amaka, ango acwee pira.’

⁴ Ango abino kodo golu i itinyo ni di ako mino aporogo atie i ecilet ni momoko i abokoya ni. Di ango ako bino ware kedi ooko me Nail di aporogo dedede omomoko i komi.

⁵ Ango abino kwiti karacel kede aporogo nogo dedede i wi tim. Ibino poto obar di likame ngatamoro ko bino kwanyo komi ot yiko. Abino mine but winy kede leini me obar pi came.

⁶ Di do jo dedede me Misiri ko bino ngeno be ango en Rwot. “In kede jo ni oudo itienu but jo me Isirael bala ebela me magada.

⁷ Kakame gin kikaparo wu kede pi konyo gi, wun ikounu tur di ikounu cobo akirididi gi di ikounu mino ngei gi owilakin.

⁸ “Pi manono, ango Rwot Rubanga atie waco kaman: abino cwano jokwor bino suri kede ipimai. Gin kibino neneko jo kede leini;

⁹ di lobo me Misiri ko bino doko ameje kame ngatamoro li kiye. Di ikounu bino ngeno be ango en Rwot. “Pi kite kame in iwaco kede be Nail obedo meri, kede be in en icwee,

¹⁰ pi manono, nan ango atieko doko ngakwor ni kede ngakwor me Nail. Abino mino Misiri dedede doko ameje kame jo li kiye, cako ki Migidol tuno Asuwan, ape ape tuno i ikor me Abisinia.

¹¹ Likame tie tien dano moro kame bino nyone, doko da likame tie tien le moro kame bino nyone, en ebino bedo kakoling kene pi mwakini ot ongwon.

¹² Abino mino lobo me Misiri dong nono kalamo lobere dedede me wi lobo; doko bomban mege da bino doko amejeko kodong nono kalamo bomban dedede me wi lobo. Abino sarakino jo me Misiri i diere me atekerin; kibino sarakin i pinye apat.

¹³ “Ingei mwakini ot ongwon nogo, ango abino coko jo me Misiri ki diere me atekerin kame kisarakin iye,

¹⁴ di ako bino dwoko gi i bero koudo kitie kede sek, di ako mino gi kidok bedo i lobo gi atie i bad tetu piny me Misiri. Ki kunono, gin kibino bedo ajakanut agoro

¹⁵ kalamo ajakanuto dedede, di likame bobo kiko doko tek kalamo atekerin apat. Abino mino kony gi bedo li atwal atwala, tetekeny likame bobo kiko twero pugo atekerin apat.

¹⁶ Isirael likame doko bino gengere i kom Misiri pi konye; gin kibino niang be ateteni gin oudo kitimo gikarac pi gengere i kom Misiri pi mino gi kony. Di do jo me Isirael ko bino ngeno be ateteni ango en Rwot Rubanga.”

Abaka Nebukadunesa bino Mano Misiri

¹⁷ I ceng me agege me duwe me agege i mwaka me ot are kiwie kanyaare kame oudo wan otie kede i lobo me obukui, Rwot oko waco na be,

¹⁸ “Wot ka dano, Abaka Nebukadunesa me Babilon omio isirikalen mege osuro Taya. En eko mino isirikalen ocane yeno jamini apek, manono oko mino yer wi gi ododoun di epepet gi oko yuyun. Do en abaka akadi kiton isirikalen mege likame kiko udo gimoro kame twero culo kwok gi.

¹⁹ Aso, nan ango Rwot Rubanga atie waco kaman: ango abino mino lobo me Misiri but Abaka Nebukadunesa me Babilon. En ebino yako abar mere di eko tero, di manono ko bino bedo cul but isirikalen mege.

²⁰ Ango atie mine lobo me Misiri bala cul me tic kame en etimo nango. Ango Rwot Rubanga en awaco.

²¹ “Kame manono otimere, ango abino mino jo me Isirael bedo tek, di ako bino mini, in Esekeri, twer me yamo negi kop, di gin kiko bino ngeno be ango en Rwot.”