Esekeri 28 - Baibuli I Leb Kumam 2013

Kop Arac kame Komurao i kom Abaka me Taya

¹ Rwot oko waco na be,

² “Wot ka dano, wac ne ngapug me Taya be ango Rwot Rubanga atie waco kaman: in ipong kede ewaka omio iwaco be in ibedo rubanga. Iwaco be in ibedo i kom me pug ka rubanga, i dier name adongo, do di in ibedo dano adana do likame rubanga, bed bala in itirano tam ni kede me ka rubanga.

³ In iparo be iriek kalamo Danel; be likame tie gimoro komungere ne in.

⁴ Rieko ni kede niang ni omio icoko abar piri; icoko saabu kede siliba i ude ni me kano jame.

⁵ Rieko ni kede diru ni me cat omio abar ni onyai, di do cunyi oko pong kede ewaka pi abar ni nono.

⁶ “Aso, nan ango Rwot Rubanga atie waco kaman: pien in iparo be in iriek bala rubanga,

⁷ ango abino cwano ni jokumbor, jokwor areco kalamo atekerin dedede. Gin kibino dudubo jamini acil kame in iudo kede rieko ni, di kiko bino munao angosibib nin.

⁸ Kibino reti i kabedo me jo oto; ibino to to arac i dier nam.

⁹ Benyo, pwodi ibino waco be in rubanga i nyim jo kame obino pi neki? In ibino bedo dano adana do likame rubanga i cing jo kame bino mini awanon.

¹⁰ Ibino to i cing jokumbor atatai bala dano kalikame kokepo; ango Rwot Rubanga atieko waco.”

Poto me Abaka me Taya ki Ajakanut

¹¹ Rwot bobo oko waco ne be,

¹² “Wot ka dano, poore iwer wer me koko abaka me Taya. Wac ne be ango Rwot Rubanga atie waco kaman: in oudo ibedo anyut me gikaber; oudo iriek di icil adikinicel.

¹³ Oudo itie Eden, en poto ka Rubanga, di iwalo komi kede jamini kame kotimo kede kide ameny me wel, gin en rubis kede dayamon; topas, beril, karenelia, kede jesipa, sapaya, emeradi kede garanet. Oudo itie kede mwolere me saabu. Bin kotimo gi piri i ceng kame konywali kede.

¹⁴ Ako cibo imalaikan me alwora pi gwoki. In oudo ibedo i wi moru nango kacil di ioto ki diere me kide ameny mac.

¹⁵ In oudo ili kede raco moro i kuo ni cako i ceng kame konywali kede tuno i ceng kame idonyo kede i tim karac.

¹⁶ In oudo ikukuno i tic me cato wil, di manono oko mini ibedo kede gero, di iko dubo. Aso, ango ako uci tenge ki moru na bala gi komunaun, di malaika kame oudo dari oko riami tenge ki kide ameny mac.

¹⁷ In oudo iwakere be icil; deyo ni nono oko mini itotolo rieko ni. Manono oko mina akwiti piny di iko doko gikame abakai apat pito kede wang gi.

¹⁸ In itimo twon dub, itimo tic me cato wil i yore kalikame poore, omio iko munao kabedere ni kacil. Aso, ango ako mino mac owokun ki dier bomba di eko wange dopodop. Nan do jo kame nene kineno buru kenekene.

¹⁹ Jo me atekerin apat koudo ngei kom gi oto pi manono. Ajikini ni obedo ajikini arac; itieko ot me atwal.”

Kop Arac kame Komurao i kom Sidon

²⁰ Rwot Owaco na be,

²¹ “Wot ka dano, lok nyimi tetu Sidon di iko murao kop arac i kome.

²² Wac ne be ango Rwot Rubanga atie waco kaman: ango atieko doko ngakwor ni, in Sidon. Jo bino paka pi gikame abino timo ni. Jo bino ngeno be ango abedo Rwot, kakame ango abino mino kede jo ni alola di ako nyuto be ango abedo ngat kacil.

²³ Pien ango abino cwano aumpuli neko jo ni, kede da kobino onyo remo me jo i dier yote ni. Jokwor bino suri ki bad dedede di kiko neneko jo ni, di do in iko bino ngeno be ango en Rwot.”

Isirael bino Bedo tie kede Winyo

²⁴ Rwot Rubanga owaco be, “Isirael likame doko bino bedo tie kede ateker moro me kio mere koudo obedo kede acae bute, kame bobo bino bedo ne bala okuto amoto ocokocok kame cocobo en. Isirael bino ngeno be ango abedo Rwot Rubanga.”

²⁵ Rwot Rubanga owaco be, “Ango abino coko jo me Isirael ki dier atekerin kame kisasarun iye, di manono ko bino nyuto ne jo me atekerin be ango abedo ngat kacil. Gin kibino donyo bedo i lobo gi amako gi, en lobo kame bin ango amio ngatic na Yakobo.

²⁶ Gin kibino bedo iye abongo alola moro, di kiko bino gero ude di kiko puro olok. Ango abino mino atekerin kame kio kede gi alola, gin atekerin koudo obedo kede tim me acae but gi. Isirael bino ngeno be ango en Rwot Rubanga gi.”