Esekeri 23 - Baibuli I Leb Kumam 2013

Amiegu Are kobedo Jodubo

¹ Rwot oko yamo keda.

² En ewaco be, “Wot ka dano, bin tie amiegu mogo are.

³ I kare kame gin oudo pwodi kitie kede apongai, cuo oko cako mito gi di gin kiko doko imalayan i Misiri; cuo omamako tune gi.

⁴ Nyako adwong bin nyinge Okola, en ecungo pi Samaria, do atidi mere oudo nyinge Okoliba, kame cungo pi Yerusalem. Ango bin ako nyomo gin are nogo dedede di gin kiko nywalo na idwe awobe kede anyira.

⁵ Bed bala en oudo mera, Okola oko bedo timo malaya; en oudo mit mere dwong but cuo me Asiria.

⁶ Gin en isirikalen kame ngapo igoen akwakwar, jopug, kede jotel me isirikalen, gin dedede awobe abeco, kame ringo kede asigiran.

⁷ En eko buto kede gin, cuo abeco kame koyero ayera kikom cuo dedede me Asiria, doko eko munaun kede woro caljwogi me jo Asiria.

⁸ En likame eweko tim mere me malaya kame bin ecako timo ki Misiri; pien cuo bin ocako buto kede di pwodi en aponga di kimamako tune mege di gin kiko meede mite kamanono bala malaya.

⁹ Pi mano, ango ako mine i cing cuo me Asiria nogo, kame en oudo cunye mito kitek.

¹⁰ Gin kiko gonye edong nono; kimako awobe kede anyira mege di gin kiko neke kede epima. Gi kotimere ne nono bin oko doko gi me ayama me mon i kare kame bin kotieko ngolo ne kede kop.

¹¹ “Bed bala amin mere Okoliba bin oneno gi kotimere ne, do en eko bedo do kede mit kede tim me malaya kame oko kalamo me amin mere Okola.

¹² Eda eko bedo kede mit atek i kom jopug kede jotel me isirikalen me Asiria, isirikalen kongapo angapito gi me isirikalen, isirikalen kame ringo kede asigiran, gin dedede awobe abeco.

¹³ Ango ako neno be en oudo emunaun; gin anyira are nogo ekite gi acel.

^14-15 “En eko medo dubere ameda i tim mere me malaya nono. Cunye obedo wane i kom cal me cuo me Babilon, kame kogoro i kor apama di oko suto kede erangi akwar, di kotweo ne gi ausin i pier gi kede kododolo negi igoen i wi gi, cal nogo oudo mie eyutuno jodongo me isirikalen me Babilon.

¹⁶ Kakame en eneno kede cal gi nogo, cunye oko mito kitek buto kede gi, di en eko cwano jo but gi Babilon.

¹⁷ Jo me Babilon oko bino buto kede. Gin kibedo kede mit atek me buto kede kitek di cunye oko dagi gi.

¹⁸ Kakame en eko meede timo kede malaya mere kakaler di etalere nono i nyim jo, ango cunya oko dage, bala kame cunya oudo odagi kede amin mere.

¹⁹ Do en pwodi eko meede ameda kede tim mere me malaya nono, bala kame oudo ebedo timo i kare mere me aponga, kare kame en bin etimo kede malaya i Misiri.

²⁰ En cunye oko bedo kede mit atek but ipalon mege me kunono, cuo kame kom gi me cuo rom bala me punda, doko kwir gi me cuo cal bala me asigira.

²¹ Okoliba, in oudo cunyi mito dok i tim me caro me kare ni me aponga, kare kame cuo me Misiri oudo mumulo tune ni di pwodi kiburuno aburun.

Rubanga Ongolo Kop i kom Okoliba

²² “Pi mano, Okoliba, manoni en kop kame ango Rwot Rubanga atie waco ni. Ango ayaro mino cuo kame in oudo imaro nogo cuny gi wang i komi, cuo kame nataman cunyi otieko dagi nogo. Ango abino kelo gin di kiko luki ki bad dedede.

²³ Ango abino kelo jo Babilon kede jo Kaludea, cuo me Pekod, Soa kede Koa, kede jo Asiria dedede; gin dedede awobe abeco, jopug kede jotel me isirikalen dedede, jotic adongo kede isirikalen jo yi, kede jo kame ringo kede asigiran.

²⁴ Gin kibino suri di kiwok ki bad tetu malo; kiyaro bino kede cabalan kede gadigadin kame yeo jamini me yi kede twon ekodet me jo. Gin kibino luki i bad tetu dedede di kimako ibukui kede di kingapo icoron atek me galao wic. Ango abino mini i cing gi di gin kiko bino ngolo ni kop di kilubo iswilia gi.

²⁵ Ango abino lilo ni, tetekeny gin kitim tic i komi kede gero. Gin kibino ngolo umi kede yiti tenge, do jo ni kame bino bwot kobino neko kede epima. Gin kibino mako awobe kede anyira ni di kiko tero, jo ni kame bino bwot kobino wango kede mac.

²⁶ Gin kibino gonyo igoen ki komi di kiko tero mwolere ni.

²⁷ Manono en kite kame ango abino jiko kede caro ni kede tim ni me malaya kame ikelo ki Misiri. Abino mino cunyi yai ki kom gi di likame bobo iko yutuno gi atwal.”

²⁸ Rwot Rubanga waco kaman: “Ango abino mini i cing jo kame cunyi dagi, jo kame in cunyi otieko yai ki kom gi.

²⁹ Gin kibino tic i komi kede wangcuny, di kiko tero gi dedede kame in iudo kede teko ni. Gin kibino weki idong nono abongo gimoro, di komi kodong nono kame ibedo timo kede malaya nono tie kakaler. Caro ni kede tim ni me malaya

³⁰ en kokelo ni manoni, piento in ibedo timo malaya kede atekerin di iko pwokere kede caljwogi gi.

³¹ In ilubo kite ka amini; pi mano, ango abino mini imato lilo na ki ikopo acel nono kame amini da omate kiye.”

³² Rwot Rubanga waco be, “In ibino mato lilo na ki ikopo kame amini omate kiye; en etut di elac. Jo bino cani di kinyeri; pien ikopo nin opong.

³³ Ebino meri di eko kelo ni iturur. En ebedo ikopo kame kelo lworo kede amuducar. Manono en ikopo ka amini Samaria.

³⁴ In ibino mate di iko lungaro en, iko neko ikopo nono, di iko ngongolo kede tune ni pi iturur. “Ango Rwot Rubanga en awaco.”

³⁵ Pi mano, Rwot Rubanga tie waco kaman: “Piento in wi oko wil keda di iko lwoma cen ngei, in ibino udo alola pi tim ni me caro kede me malaya.”

Rubanga Ongolo Kop i kom Amiegu Are nogo

³⁶ Rwot oko penya be, “Wot ka dano, benyo, in itieko iikere pi ngolo kop ne Okola kede Okoliba? Aso, wac negi gikareco kame gin kitimo.

³⁷ Gin kibedo timo adote kede nek; kitimo adote i yore me woro caljwogi, kede kibedo mino idwe gi awobe bala giayala angola but caljwogi nogo, idwe kame gin kinywalo na.

³⁸ Likame manono kenekene en kame gin kitimo na. Gin kipwoko kabedo na kacil i ceng acel nono, kede kimunao Sabato na.

³⁹ Cenge nono kame gin kingongolo kede idwe gi me woro caljwogi, en kame gin kibino kede kabedo na kacil di kiko pwoke. Manoni en gikame gin kibedo timo i oda.

⁴⁰ “Doko da gin kibedo cwano joor pi ot lwongo cuo ki tenge kakabor, di cuo nogo da ko bino. Kakame cuo nogo tuno kede, amiegu nogo oudo bol di kiko cilo abuke wang gi, kede kiko tubuso kom gi kede mwolere.

⁴¹ Di kiko bedo i komini acil, di emesa tie i nyim gi kame koketo odok na angwe kur i wie, kede mo na me olibeti.

⁴² Woo me ekodet me jo kame bedo atatai, jo kalikame paro piny oudo winyere kibut gi kunono, ekodet me jo amera kame kokelo ki wi tim. Gin kiketo mwolere i ngut cing mon nogo di kiko ngapo negi icoron acil i wi gi.

⁴³ Di ango ako waco i cunya be, gin kiol teko gi otiek, do cuo nogi pwodi tie mito buto kede gi kamanono.

⁴⁴ Gin kibedo ruruco buto kede gi bala malaya. Epone nono en kame gin kibedo buto kede Okola kede Okoliba, mon acar.

⁴⁵ Jo kopoore bino ngolo raco i wi gi pi adote kede nek; pien gin kibedo joadote doko cing gi opwokere kede remo me jo.”

⁴⁶ Rwot Rubanga waco kaman: “Ango abino kelo negi ekodet me jo kame bino mino gi kibedo kede lworo atek, doko kibino yako gi.

⁴⁷ Ekodet me jo nono bino didipo gi kede kide di kiko totongo gi kede ipimai gi. Gin kibino neneko awobe kede anyira gi, kede kiko wawango ude gi.

⁴⁸ Epone no en kame ango abino jiko kede tim me caro i lobo noni, tetekeny manono bed gi me ikwenyar but mon di kiko weko timo adote bala kame gin kibedo timo.

⁴⁹ Do wun amiegu are nogi, ibinunu udo alola pi caro wu kede pi dub wu me woro caljwogi; di wun ikounu bino ngeno be ango en Rwot Rubanga.”