Esekeri 22 - Baibuli I Leb Kumam 2013

Dub me Yerusalem

¹ Rwot oko yamo keda.

² En ewaco be, “Wot ka dano, benyo, in itieko iikere me ngolo kop ne bomba kame nek dwong iye nono? Mito iwac ne gikareco mege dedede.

³ Wac ne gikame ango Rwot Rubanga atie waco be: Yerusalem, in itieko neko jo ni atot, doko itieko pwokere kede woro caljwogi, kare nin otieko tuno.

⁴ In itie kede raco me onyo remo me jo, doko caljwogi kame in itimo otieko mini ipwokere; in itieko mino ceng ni odoko iyapiyapi, kare kame oudo omoko piri otieko tuno. Manono en komio ango ami lewic i nyim atekerin, doko pinye dedede tie kede nyero i komi.

⁵ Jo me pinye kiyapiyapi kedi kede me kakaboco bino nyeri, in ngat kame nyingi otieko dubere, doko idwong kede atotolun.

⁶ Jotel me Isirael dedede, ngat acelacel geno teko mere kene, di eko tic kede me onyo remo me jo.

⁷ Likame tie ngatamoro kame woro jonywal mege. Jokumbor kame tie bedo kede wu kotie kede adiadia but gi, doko da idwe kic kede apuserun kotero kirac.

⁸ Jo ni li kede wor i kom kabedere na kacil, doko likame kigwoko Sabato na.

⁹ Jo ni mogo dubo nying jo icegun pi mito be konek gi, ace camo i abilan me wi mori, kede ace timo caro.

¹⁰ Cuo ace kikom gi buto kede mon ka papi gi, ace dio mon tetek pi buto kede gi di mon tie kede tuwo duwe.

¹¹ Cuo ace buto kede mon me jo icegun, ace buto kede ci wod gi; cuo ace butu kede amiegu gi, anyira ka papi gi kikokome.

¹² Jo ni mogo yei kowilo gi pi neko jo icegun. Jo ace kopo jo Isirael icegun sente pi mito ameda di kiko baro pi sero jo gi. Gin wi gi otieko wil keda.” Rwot Rubanga en owaco.

¹³ “Neningo, ango abino bapo cinga pi wangcuny pi ud kalikame poore kame jo ni otimo, kede pi remo kame koonyo.

¹⁴ Benyo, iparo be ibino bedo kede nwangcuny moro, arabo teko moro i kare kame ango abino tic kede i komi? Ango Rwot en awaco, doko abino time.

¹⁵ Ango abino sasaro jo ni i diere me atekerin dedede, di ikounu sarakin i pinye apapat, di ango ako bino jiko tim ni areco.

¹⁶ Manono bino mino atekerin apat likame bedo kede wor butu, di wun ikounu bino ngeno be ango en Rwot.”

Epipa Aliet ka Rubanga me Jililo Nyonyo kame Kotwako

¹⁷ Rwot oko waco na be,

¹⁸ “Wot ka dano, kony me jo Isirael otieko doko li kibuta bala cete. Gin dedede kical bala cete konyanyalun me nyonyo buronsi, tin, ayon kede led; kical bala cete me nyonyo siliba.

¹⁹ Pi mano, ango Rwot Rubanga atie waco kaman: pien kony gin otieko doko li bala cete, ango abino coko gin Yerusalem karacel.

²⁰ Bala kame kocoko kede nyonyo siliba, buronsi, ayon, led kede tin i epipa me calaro gi, di oko kuto mac i kom gi pi calaro gi, kamanono ada abino coko gi karacel di ako kuto mac me gero na kede me lilo na i kom gi di ako calaro gi.

²¹ Ango abino coko gi karacel Yerusalem, di ako kuto mac me gero na i kom gi ako calaro gi.

²² Bala kame kocalaro kede siliba i epipa, kobino calaro gida kamanono i Yerusalem, di gin kiko bino ngeno be ango Rwot atieko bwoto lilo na i kom gi.”

Dub ka Jotel me Isirael

²³ Rwot bobo oko yamo keda.

²⁴ En ewaco be, “Wot ka dano, wace jo Isirael be lobo gi likame kokwanyo dub mege. Pi mano, en likame ebino bwot ki alola i ceng me lilo na.

²⁵ Jopug mege cal bala engu kame dorano di etie nyinyilo le kame emako. Gin kineko jo di kiko tero sente gi kede jamini gi kabeco. Gin kitieko mino mon atot odoko apuserun.

²⁶ Josaseredoti mege turo iswil na doko kili kede wor i kom jamini na kacil. Likame kingeo poko jamini kacil kede kalikame cil. Doko likame kipwonyo jo pi ngeno poko gi kopwokere kede kalikame opwokere, kede gin likame kiparo Sabato na. Manono omio gin kili kede wor buta.

²⁷ Jotel me Isirael cal bala ipeon kame tie nyinyilo le kame kineko. Gin kionyo remo me jo pi mito udo abar i yore kalikame ber.

²⁸ Inabin me Isirael umo dub nogi bala jo kame puo apama kede erangi atar. Gin kineno gianyuta me angalo di kiko murao kop me angalo di kiwaco be, ‘Rwot Rubanga owaco be,’ do di ango Rwot likame awaco negi kop moro.

²⁹ Jo me lobo nono lung tie kede tim me adie kede yak. Gin kitero kirac jocan kede jo kame piny oloo gi, doko da kidio jokumbor kame tie i piny gi di likame kiparo pirgi akadi acel.

³⁰ Ango ako bedo mono dano moro ki diere gin kame koto temuno apama, dano kame koto cung i nyima i arora pir lobo nono, tetekeny kur ango amuducaro en; do likame ako udo ngatamoro.

³¹ Pi mano, ango abino bwoto lilo na i kom gi, di ako muducaro gi pi gikame gin kitimo.” Rwot Rubanga en owaco.