Esekeri 21 - Baibuli I Leb Kumam 2013

Epima ka Rwot

¹ Rwot oko yamo keda.

² En ewaco be, “Wot ka dano, lok nyimi nen tetu Yerusalem di iko ronkino kabedere mege kacil. Kwenyaro jo kame tie i lobo me Isirael

³ be ango Rwot Rubanga atie waco kaman: ango atie bino yi kede wu. Abino woto epima na i akularu mere di ako totongo wun dedede, jo kopoore kede jo areco.

⁴ Abino tic kede epima na i kom jo dedede cako ki bad tetu piny tuno i bad tetu malo;

⁵ di jo dedede ko bino ngeno be ango Rwot atieko woto epima na ki akularu mere; likame abino dwoke bobo iye.

⁶ “Wot ka dano, cur bala cunyi mito cot pi cwercuny atek, di gin dedede kitie neni.

⁷ Di ka gin kiko penyi pinyo komio in itie cur, in wac negi be pi rwonge kobino. Pi ka kare me timere me gikame kowaco nono otuno, cuny jo dedede bino nyote, doko teko me jo dedede bino tiek pi lworo atek, likame tie dano moro kame bino bedo kede nwangcuny, cong jo bino bedo miel amiela teltel. Neningo, kare nono kom otieko tuno doko etie cobere.” Rwot Rubanga en owaco.

⁸ Rwot oko waco na be,

⁹ “Wot ka dano, murao. Wac ne jo kop kame ango Rwot atie waco: “epima, kotie peno epima di osute.

¹⁰ Kotie pene pi timo nek kede, kosute komito emeny bala meny me kot. Benyo benyo kame wan okarununu ilel kede? Wun itiekunu bedo kede acae i kom adao me pwonyo wu kede i kom ikwenyar dedede.

¹¹ Kotie suto epima, pi cako tic kede. Kopene di oko sute, tetekeny komie i cing nganek.

¹² Okwe wot ka dano, dwilao kede koko, pien epima nono koiko pi jo na kede pi jotel dedede me Isirael. Kobino neko gin karacel kede jo na. Bap kori pi paro can!

¹³ Ango atie tamo jo na, ka gin kiko dagi swilaro, gi nogi dedede bino timere negi.

¹⁴ “Aso in, wot ka dano, murao; bap cingi; epima na bino ruruco cob. En epima kame neko jo, epima kame jo lworo doko eneko jo nek atek.

¹⁵ Manono mio jo na cuny gi nyote di kiko donyo gete pi lworo. Ango atieko ciko epima na i irutei gin dedede. En emeny bala meny me kot, doko kotieko peno lebe pi nek.

¹⁶ In epima, cak cocobo jo kame tie i badi tetu cam kede i badi tetu ngodal. Cocobo jo me bad tetu moroni kenekene kame lebi lokere iye.

¹⁷ Ada abino bapo cinga, di ako mino gero na tiek. Ango Rwot en awaco.”

Epima me Abaka me Babilon

¹⁸ Rwot bobo oko yamo keda.

¹⁹ En ewaco be, “Wot ka dano, gir yote are kame abaka me Babilon karuno lubo di ebino kede epima mere. Gin are nogo dedede poore di kicakere ki piny acel. Di iko sipo apande kakame yongayo kaoto i bomba okakarun iye.

²⁰ Gir yongayo acel kame abaka bino lubo me ot Raba, bomba me jo Amon, do yongayo ocelu ot Yuda, i Yerusalem, bomba kame kocelo.

²¹ Abaka me Babilon cungo i akara me yongayo pi timo ilamus pi ngeno gikame bino timere; en eyayango imalia di eko onyo gi piny, epenyo tam kibut caljwogi mere, engio emany me le. Mago nogo dedede en etimo pi mito ngeno bad kame poore eot iye.

²² Alulu me Yerusalem oko poto i bade tetu cam. Manono cimo ne be epoore temuno gi me tiatiao bomba piny, elwong jo bin cak nek, ecak cocobo erute kede gi me tiatiao en, etor kayito i wi apama me bomba, di eko kunyo pulejun.

²³ Jo me Yerusalem likame bino yei be manono karuno timere, pien gin kitieko timo cikere gi kede abaka me Babilon. Do abaka nono bino yutuno negi raco gi di eko kwenyaro gi be kobino mako gi bala mabus.

²⁴ Manoni en gikame ango Rwot Rubanga atie waco be: dub wu kotieko nyuto kakaler, omio kongeo raco wu. Dub wu nyutere i tim wu dedede. Pien kotieko yutuno raco wu, ango abino mino komako wu di oko tero wu bala mabus.

²⁵ “Aso in, ngat kame ikiteso ni reco, ngapug karac me Isirael, ceng nin otieko tuno, ceng me alola ni me ajikini.

²⁶ Ango Rwot Rubanga atie waco kaman: kwany tenge egoe kame iboo kede wi, kwany da tenge ocoro ni me ajakanut. Likame tie gimoro kame bino dong i kite kame oudo etie kede sek. Kiarao jo kame oudo tie i ruom apiny kikob i ruom amalo! Dwok i ruom apiny jo kame oudo tie i ruom amalo!

²⁷ Abino dudubo, abino dudubo! Do manoni likame bino timere tuno di ngat kame ango ayero pi mine alola otuno. Di do ango ako bino mine i cinge.

Epima kede Jo Amon

²⁸ “Do in, wot ka dano, murao. Wac gikame ango Rwot Rubanga atie waco ne jo Amon, jo kame tie nyero jo Isirael. Wac negi kaman: “kotieko woto epima pi cako nek kede; kopeno lebe pi nek, pi mine meny bala meny me kot.

²⁹ “Wun jo Amon, gianyuta kame wun inenunu obedo me angalo, doko imurai wu da obedo me angalo. Wun ikiteso wu reco, doko itimunu gikareco. Ceng wu tie bino, ceng me mino wu alola me ajikini. Kobino ngongolo ngut wu kede epima.

³⁰ “Dwokunu ipimai wu i akularu gi! Ango abino ngolo kop i komu i kakame bin kocweo wu iye, i lobo kame konywalo wu iye.

³¹ Ango abino bwoto lilo na i komu, abino beo kede lilo na i komu bala mac. Di ako mino wu i cing jo ager, jo ipirana i nek.

³² Mac bino wango wu. Kobino onyo remo wu i lobo wu, di likame ngatamoro ko bino yutuno wu bobo.” Rwot en owaco.