Esekeri 18 - Baibuli I Leb Kumam 2013

Ngat Acelacel Yeo Peko me Dub mere

¹ Rwot oko yamo keda.

² En ewaco be, “Dwong kop nyo komio jo bedo nyogao yamo agole noni kame mako lobo me Isirael be, “ ‘Jonywal bin ocamo olok awac, di eko neko lak idwe gi’?

³ “Ango Rwot Rubanga akuo akwongere be likame bobo wun ibinunu tic kede agole noni i Isirael.

⁴ Poore wun ingeunu be kuo me jo dedede obedo mera; kuo me nganywal karacel kede me atin da. Ngat kame timo dub en kame bino to.

⁵ “Ka dano moro opoore di etimo gikame iswil mito,

⁶ ka en likame ecamo giayala i abilan me wi mori arabo eworo caljwogi me jo Isirael, amoto supo dako me dano ocelu arabo buto kede dako di tie kede tuwo me mon,

⁷ ka en likame etero ngatamoro kirac, do edwoko ne ngat kame tie kede banya mere gikame oudo esingao bute pi banya, ka en likame eyako jame me jo, ka emio jo kame kec oneko cam kede di emio jo aoto nono igoen,

⁸ ka en likame ekopao jo sente pi mito ameda, ka edagi timo gikarac kede di engolo kop me ateni i dierediere me jo atie kede piem,

⁹ ka en elubo cik na kede di egwoko iswilia na, di etie kede genere buta, akodi dano nono en dano kopoore; ateteni en ebino bedo kuo.” Rwot Rubanga en owaco.

¹⁰ “Ka dano opoore nono tie kede wode kobedo ngayak kede nganek,

¹¹ ngat kame timo gi acel kikom gi nogi (bed bala papa mere likame timo moro kikom gi), ka wode nono camo giayala i abilan me wi mori, doko di esupo dako me dano ocelu,

¹² ka wode nono tero jocan kede jo kame piny oloo kirac, di eyako jamini me jo, kede di likame edwoko gikame ngabanya mere osingao bute, ka en eoto i abilan kede di eworo caljwogi,

¹³ ka en ekopao sente but jo pi udo ameda; benyo, ebino bedo kuo? Li, en likame ebino bedo kuo. En etieko timo gikareco nogi dedede; en ateteni ebino to. Remo mere bino dong i wie.

¹⁴ “Ka dano arac nono tie kede wode, di wode nono ko neno gikame papa mere obedo timo, di en eko dagi lubo tim ka papa mere nono:

¹⁵ ka en likame ecamo i abilan me wi mori arabo woro caljwogi me jo Isirael, ka likame esupo dako me dano ocelu,

¹⁶ arabo etero ngatamoro kirac, ka en edwoko gikame ngabanya mere osingao bute, ka en emio cam but ngat kame kec oneko kede emio egoe but ngat kame tie nono,

¹⁷ ka en edagi timo gikarac, doko likame ekopao sente but jo pi udo ameda, ka en egwoko iswilia nango doko di elubo cik na, en likame ebino to pi dub ka papa mere; en ateteni ebino bedo kuo.

¹⁸ Do papa mere, piento en ebedo ngamao, eyako jo icegun, kede pi ebedo timo gi kalikame ber but jo mege, en ebino to pi dub mege.

¹⁹ “Do di wun ipenyerenu be, ‘Pinyo bo kamio atin likame poore to pi dub ka papa mere?’ Ka atin obedo timo gikame iswil mito kede gikame poore, di egwoko iswilia na kede elubo cik na dedede, en ateteni ebino kuo.

²⁰ Ngat kame timo dub en kame bino to. Atin likame bino neno can pi dub me nganywal mere, akadi nganywal da likame bino neno can pi dub me atin mere. Ngat katimo gi kopoore kobino mino pwoc pi tim mere kopoore, doko ngat katimo gikarac da bino neno can pi gikarac kame en etimo.

²¹ “Do ka dano atimo gikareco oko jiko timo dub mege dedede di eko donyo gwoko iswilia na, di etimo gikame iswil mito kede gikame opoore, en ateteni ebino bedo kuo; en likame ebino to.

²² Tim areco dedede kame en oudo ebedo timo likame bobo obino yutuno di oko maro i wie; piento en ebino bedo kuo pi tim me poore kame en eko donyo timo.

²³ Benyo, iparunu be ango cunya yom pi to me ngat katimo gikareco? Ango Rwot en apenyo. Li ba, ango amito be koto en elokere tenge ki yote areco me kuo mere di eko bedo kuo.

²⁴ “Do benyo, iparunu be ka dano kopoore oko lokere tenge eweko kuo mere me poore di eko donyo timo gikareco, gikame jo areco timo, benyo, ebino meede bedo kuo? Li! Likame tie tim mere me poore moro kame kobino yutuno. En ebino to pi raco mere me bedo li kede genere kede pi dub kame en etimo.

²⁵ “Do wun iwacunu be, ‘Gikame Rwot timo likame poore.’ Nataman winyunu wun jo me Isirael. Benyo, mam wun iparunu be gikame ango atimo likame poore? Gikame wun itimunu en kalikame poore.

²⁶ Ka dano kopoore oweko timo gikaber di eko donyo timo gikarac, en ebino to pi tim mere nono. En eto pi gikareco kame en etimo.

²⁷ Kamanono da, ka dano katimo gikareco oko lokere di eko weko tim areco kame en oudo ebedo timo di eko donyo timo gikame iswil mito kede kopoore, en elako kuo mere.

²⁸ En ateteni ebino kuo; likame ebino to, piento en eparo i cunye di eko lokere eweko dub mege dedede kame oudo ebedo timo.

²⁹ Aso di wun jo Isirael iwacunu be, ‘Rwot timo gi kalikame poore.’ Okwe wun jo Isirael, benyo, iwacunu be gikame ango atimo likame poore? Gikame wun itimunu en kalikame poore.

³⁰ “Pi mano, ango Rwot Rubanga, atie waco ne wu be abino ngolo kop i kom wun dedede di lubere kede yongayo me kuo me ngat acelacel. Swilarunu ki gikareco wu dedede; ka li, dub wu bino kelo ne wu to.

³¹ Ucunu tenge gikareco dedede kame wun ibedunu timo buta, di ikounu udo tam anyen kede cuny anyen. Okwe wun jo Isirael pinyo kamio imitunu to?

³² Ango Rwot Rubanga, cunya likame yom pi to ka ngatamoro. Lokerenu tenge ki dub wu di ikounu bedo kuo.”