Esekeri 15 - Baibuli I Leb Kumam 2013

Agole i kom Bwini

¹ Rwot oko yamo keda.

² En ewaco be, “Wot ka dano, i yore mene en kame yat me olok kato kede yen icegun? Ajange me olok kame tie i diere me yen me abum twero bedo ber kato yen icegun i yore mene?

³ Benyo, itwero tonge di iko timo kede gimoro, arabo itwero gure i kor apama me liero jame?

⁴ En eber me moko mac kenekene. Ka mac otieko camo wie tuni tuni di diere oko doko cukumac, benyo, udo pwodi iromo timo kede gimoro?

⁵ En oudo kony mere li akadi di pwodi likame kowange. Nataman do di mac otieko came eko doko cukumac, kony mere do udo li atwal atwala.”

⁶ Pi mano, Rwot Rubanga tie waco be, “Bala kame kotongo kede yat me olok i diere me yen me abum di oko wange i mac, ada abino timo ne jo kame tie bedo Yerusalem kamanono.

⁷ Ango abino ngoi kede gi. Bed bala gin kibwot ki mac acel, do pwodi mac bino wango gi kamanono. Ka ango ako ngoi negi, gin kibino ngeno be ango en Rwot.

⁸ Ango abino mino lobo dong nono, pien gin likame kibedo kede genere buta.” Rwot Rubanga en awaco.