Esekeri 14 - Baibuli I Leb Kumam 2013

Rubanga Oronkino Tim me Woro Caljwogi

¹ Ceng moro acel jotel mogo me Isirael oko bino buta pi penya gikame Rwot oudo tie waco.

² Di Rwot oko yamo keda.

³ En ewaco be, “Wot ka dano, cuo nogi otieko keto cuny gi woro caljwogi, di gin kiko mino dub orire i nyim gi bala isiki kame getaro gi. Benyo, kom ateteni gin kiparo be ango abino yei negi udo kop kibuta?

⁴ “Pi mano, in wace gi be ango Rwot Rubanga atie waco negi kaman: Dano moroni me Isirael kotieko keto cunye woro caljwogi di eko mino dub mere orire i nyime bala gikame getaro en, di bobo pwodi en ebino penyo tam kibut enabi, ango Rwot kikoma en kame abino dwoko ne kop kame poore kede caljwogi mege atot atota nogo.

⁵ Ango abino timo manono tetekeny adwok cuny gi buta, gin jo dedede kame caljwogi otieko taparo gi tenge kibuta.

⁶ “Aso, nataman in wac ne jo me Isirael be ango Rwot Rubanga atie waco negi kaman: swilarunu di ikounu weko woro caljwogi; doko poore ilokerenu tenge ki tim wu areco dedede.

⁷ “Do jo me Isirael arabo jokumbor kame tie bedo Isirael, kame daga di kiko lokere keto cuny gi woro caljwogi di kiko mino dub gi orire i nyim gi bala gikame getaro gi, do di pwodi bobo kioto but enabi pi penyo tam na kibute, ango Rwot kikoma en kame abino dwoko negi kop.

⁸ Ango abino lokere neno gi kirac. Ango abino mino gi kibedo anyut kame jo bedo yamo nakanaka di ako kwanyo gi tenge kikom jo na. Manono bino mino wun ingeunu be ango en Rwot.

⁹ “Ka kongalo enabi moro di en eko dwoko kop kalikame tie ateni, udo ango Rwot en kame angale. Ango abino mino enabi nono alola, di ako muducaro en ki diere me jo na me Isirael.

¹⁰ Enabi nono kede ngat kobino penyo tam kibute, alola gi bino bedo rorom.

¹¹ Ango abino timo manoni tetekeny jo me Isirael likame bobo bino medo parao tenge kibuta, arabo bobo medo pwokere kede dub gi. Di do gin kiko bino doko jo na, di ada ako bedo Rubanga gi. Ango Rwot Rubanga en awaco.”

Nua, Danieri, kede Yobu

¹² Rwot oko yamo keda.

¹³ En ewaco be, “Ka jo me piny moro likame oko bedo kede genere di gin kiko timo dub buta, ango abino mino cam bedo li negi. Abino cwano negi kec di ako neneko jo kiton leini.

¹⁴ Akadi ka koto di oudo cuo adek nogi, Nua, Danieri, kede Yobu, di oudo tie kunono, kuo gi me bedo jo kopoore koto olako gin kenekene.” Rwot Rubanga en awaco.

¹⁵ “Arabo ka koto ango acwao leini ager i piny moro pi neneko jo, tetekeny piny nono dong nono abongo jo, di likame tie dano moro kame karuno beo iye da pi leini nogo,

¹⁶ akadi di koto oudo cuo adek nogi tie bedo kunono, ango Rwot Rubanga akwongere be, gin likame koto kikaruno lako idwe gin amako gi. Gin kenekene en kame koto kibwot, do lobo koto odong nono.

¹⁷ “Arabo ka ango koto ako cwano yi i piny nono di ako mino koneko jo kede leini pitipit iye;

¹⁸ akadi di oudo cuo adek nogi tie iye, ango Rwot Rubanga akwongere be gin likame koto kikaruno lako akadi idwe gi, do gin kenekene en kame koto kibwot.

¹⁹ “Amoto ka koto ango acwao aumpuli i piny nono, di pi lilo na ako neneko jo kiton leini,

²⁰ akadi di koto Nua, Danieri, kede Yobu di oudo tie iye, ango Rwot Rubanga akwongere be gin likame oudo koto kikaruno lako akadi idwe gin amako gi. Pi poore gi, gin koto kilako kuo gin kenekene.”

²¹ Rwot Rubanga tie waco be, “Ebino bedo rac benyo ka ango acwao i kom jo me Yerusalem alola na ongwon areco, gin en yi, kec, leini ager, kede aumpuli, pi neneko jo kede leini kiye!

²² Aso di jo mogo bino bwot di kiko dong kuo iye, idwe awobe kede idwe anyira kame kobino woto ki Yerusalem; gin kibino bino butu. Ka wun ibinunu neno yote me kuo gi kede tice gi areco, ibinunu yei be can dedede kame ango aketo i kom Yerusalem poore.

²³ Ibinunu yei kede gikame ango atimo ka inenunu yote me kuo gi kede tice gi. Di do wun ikounu bino ngeno be gikame ango oudo atimo i kom Yerusalem atimo pi tien kop.” Rwot Rubanga en owaco.