Esekeri 12 - Baibuli I Leb Kumam 2013

Enabi Esekeri Oporo Ngaring Ayela

¹ Rwot oko yamo keda.

² En ewaco be, “Wot ka dano, in itie bedo i diere me jo kame jojemo. Gin kitie kede wang gi do likame kineno piny, kitie kede yit gi do likame kiwinyo kop,

³ pien gin kibedo jojemo. Pi manono, wot ka dano, iikere di iko tweno yec ni bala ngaring ayela, di iko yai ot obukui iceng di pwodi piny ler di gin kineno. In ibino yai ot kabedo apat bala ngaring ayela di gin kineno. Manono amoto bino mino gi kiniang, bed bala gin kijojemo.

⁴ In ibino woto yec ni ooko di pwodi piny ler di gin kineno, yec bala me ngaring ayela; di otieno in iko yai ot bala ngat atie ot obukui di gin kineno.

⁵ Tuc kor apama me odi di gin kineno di in iko beo kede yec ni kiye.

⁶ In ibino tingo yec ni di iko cibo i epepet ni di gin kineno, di iko yene idonyo kede ooko i piny acol. Ibino bono wangi tetekeny likame ineno kakame itie ot iye. Gikame in ibino timo nono bino bedo gianena me ikwenyar but jo Isirael.”

⁷ Ango ako timo bala kame oudo Rwot ociko na. Ango akwanyo yec na di ako kelo ooko i dier i ceng bala ngaring ayela, di otieno ako tuco kor apama kede cinga. Ango ako cibo yec na i epepet di jo dedede neno, di ako donyo ooko cako ot.

⁸ Oru mere odiko Rwot bobo oko yamo keda.

⁹ En ewaco be, “Wot ka dano, nataman bala kame jojemo me Isirael go tie penyi kede gikame in itie timo,

¹⁰ wace gi gikame ango Rwot Rubanga atie waco. Kop noni mako ngapug me Yerusalem kede jo me Isirael dedede kame tie bedo iye.

¹¹ Wac negi be gikame in itimo nono nyuto gikame bino timere negi; gin kobino mako gi bala mabus di oko tero gi obukui.

¹² Ngapug gi bino tingo yec mere i epepet i dier iwor di eko lwi edonyo i kakame etuco i kor apama. En ebino bono wange tetekeny likame eneno kakame etie ot iye.

¹³ Do ango abino rieno bwoi na cike di ako make; di ako tere Babilon, kakame en ebino to iye abongo neno lobo nono.

¹⁴ Ango abino sasaro i bad tetu dedede jo dedede kame oluke, jo kame konye kede isirikalen mege dedede; abino mino jokwor gi wapo gi kede epima.

¹⁵ “Gin kibino ngeno be ango en Rwot, i kare kame ango abino sasaro gi kede i diere me atekerin apat kede i pinye me kumbor.

¹⁶ Do ango abino weko jo mogo kikom gi bwot ki yi, kec kede tuwo, tetekeny gin kibino tatamo ne atekerin kame gin kioto but gi, kite kame gikareco kame gin kibedo timo rac kede; di do gin kiko bino ngeno be ango en Rwot.”

Gianena me Enabi Akome Miel

¹⁷ Rwot oko yamo keda.

¹⁸ En ewaco be, “Wot ka dano, cami di komi miel, doko mat pii di komi keto teltel pi lworo.

¹⁹ Wac ne jo me lobo nono dedede be Rwot Rubanga tie waco ne jo me Yerusalem kame pwodi tie bedo i lobo me Isirael kaman: ceng moro acel gin kibino cam di kitie kede lworo atek, doko kibino mato pii di kom gi oto pi lworo, pien kobino weno lobo gi dong nono, pi tim me gero me jo dedede kame bedo iye.

²⁰ Bomban kame nataman jo opong iye kobino tuturo, di oko mino lobo dong nono. Di do wun ikounu bino ngeno be ango en Rwot.”

Kop kame Cuny Jo Maro kede kame Cuny gi Dagi

²¹ Rwot bobo oko yamo keda.

²² En ewaco be, “Wot ka dano, pinyo komio jo me Isirael onare yamo kop noni be, ‘Kare otieko kato akata, di gikame kowaco be bino timere likame cabo ocobere akadi acel?’

²³ Aso, nataman in wac negi be ango Rwot Rubanga atie waco kaman: ango abino jiko yamo nono ki dog gi, di gin likame bobo kiko tic kede yamo nono i Isirael. Wac negi be kare otieko tuno me cobere me gikame kowaco.

²⁴ “Likame bobo gianyuta moro me abe arabo imurai kame kongalo kede jo bino bedo tie i diere me jo Isirael.

²⁵ Do ango Rwot abino waco kop na, di eko bino cobere. Likame bobo ebino gal. Di pwodi wun ikuonu, wun jojemo nogi, ango abino waco kop na di ako mine ecobere.” Rwot Rubanga en owaco.

²⁶ Rwot oko bobo waco na be,

²⁷ “Wot ka dano, jo me Isirael tie waco be gianyuta kame in ineno tie pi kare me waru, kare mere pwodi bor twatwal.

²⁸ Aso, in wace gi be ango Rwot Rubanga atie waco kaman: gikame ango awaco likame bobo bino gal cobere, do ebino timere awakawaka. Ango Rwot Rubanga en awaco.”