Esekeri 10 - Baibuli I Leb Kumam 2013

Deyo ka Rwot Oyai ki tempulo

¹ Ango ako ngoloro gi kopetere kame oudo tie malo me wi cerubim di ako neno gikame oudo cal bala kom me ajakanut kame kotimo kede kidi me wel kame nyinge sapir.

² Rubanga oko waco ne icuo kame oudo tie ngapo igoen ameny apwot be, “Oti idony i dierediere me namisigan kame tie i dud cerubim di iko juko itonge me mac aliel pong cingi. Di do iko sasaro itonge nogo i bomba.” En eko ot di ango anene.

³ Aso, kakame icuo nono oudo tie donyo kede i ot, cerubim oudo tie cungo i bad tetu piny me tempulo, di edou oko bino di eko umo diakal me yie.

⁴ Di do deyo me tie ka Rwot oko yai kikom cerubim di eko ot i dogola me tempulo. Edou oko umo yi ot pukupuk, di deyo me tie ka Rwot oko romo diakal lung.

⁵ Mor me bwom cerubim oudo winyere kiton i diakal me ooko. Mor gi oudo winyere bala dwan Rubanga Won Twer kame etie yamo.

⁶ Kakame Rwot ociko kede icuo koudo ngapo igoen ameny di kipwot pi kwanyo mac ki dierediere me namisigan kame oudo tie i dud cerubim, icuo nono oko ot di eko cungo i nget namisiga acel.

⁷ Cerubim acel bin oko cwano cinge i mac kame oudo tie i diere gin, eko kwanyo itonge mogo di eko keto i cing icuo nono koudo ngapo igoen ameny di kipwot. Icuo nono oko gamo itonge nogo di eko yai eoto.

⁸ Cerubim nogo oudo tie kede gikame ineno bala cing dano i dud bwom gi.

⁹ Ango bobo ako neno namisigan ongwon i nget cerubim nogo, acel i nget cerubim acelacel. Namisigan nogo oudo meny bala kide me wel anyinge beril,

¹⁰ di kicacal, doko oudo acelacel kikom gi tie kede namisiga ace korire i yie.

¹¹ Cerubim nogo oudo twero ot i bad tetu moroni kenekene abongo lokere. Gin dedede oudo ka kiyaro ot, kioto karacel i bad acel, abongo lokere.

¹² Wang oudo oromo kom gi lung, ngei gi, cing gi, bwom gi, kede namisigan gi kede tire me namisigan.

¹³ Ango ako winyo di kolwongo namisigan nogo be, “Namisigan kame wiwirun”.

¹⁴ Cerubim acelacel oudo tie kede nyime ongwon. Nyime me agege oudo obedo me cerubim, me are obedo me dano, me adek obedo me engu, kede me ongwon oudo obedo me ekokom.

¹⁵ Gin en oudo giakuo kame ango aneno i nget ecilet me Kebar. Kame cerubim nogo oudo oyai malo

¹⁶ di kiko cako ot, namisigan da oudo upere kede gi karacel; kame gin oudo kiyaro bwom gi pi por, namisigan da oudo upere karacel kede gi kamanono.

¹⁷ Ka gin kiko cungo, namisigan da oudo cungo; ka gin kipor, namisigan da oudo oto kede gi, pien gin oudo kitie kede twer i kom namisigan nogo.

¹⁸ Di do deyo me tie ka Rwot oko yai ki dogola me tempulo di eko ot cungo malo me wi cerubim.

¹⁹ Di Cerubim oko yaro bwom gi di kiko por malo di ango aneno, kede namisigan i nget gi. Gin kiko cungo i erute me bad tetu kide me tempulo, di rieny me deyo ka Rubanga me Isirael tie malo i wi gi.

²⁰ Magonogi en giakuo kame ango oudo aneno i nget ecilet me Kebar di Rubanga me Isirael tie malo i wi gi.

²¹ Acelacel kikom gi oudo tie kede nyime ongwon, bwome ongwon kame tie kede gimogo kacal bala cing dano i dud gi.

²² Nyim gi oudo cal bala kame ango oudo aneno i nget ecilet me Kebar. Acelacel kikom gi oudo tenaro ot kakame nyime opimo.