Epirimoni 1 - Baibuli I Leb Kumam 2013

Amot

¹ Baluwa kowok kibut Paulo, ngat kame obedo mabus pi Kirisito Yesu, kede kibut omin wa Temeseo. But Epirimoni ngatic ngawot wa kame omaro,

² kede amin wa Apia, kede Arakipu kame obedo sirikale wad wa, karacel kede ekodet me jokirisito kame cokere i odi.

³ Okwao ne wu kisa kede mulem ka Rubanga Papa wa kede Rwot wa Yesu Kirisito.

Amara kede Yei kame Epirimoni Tie kede

⁴ Ango apwoyo Rubanga na i kare dedede kame atamo kede piri i ilega na.

⁵ Pien ango awinyo kop i kom amara kame in itie kede but jokacil dedede kede yei ni i kom Rwot Yesu.

⁶ Ango akwao be nywak wa pi yei nin dok tek di eko kelo ne wa niang i kom gikabeco dedede kame wan otimo ne Kirisito.

⁷ Omina, ateteni ango atieko udo kilel kede nwangcuny pi amara ni, pien in itieko kweno cuny jokacil.

Kwac ka Paulo pi Onesimo

⁸ Pi mano, bed bala ango atie kede tekcuny i Kirisito pi waco ni timo gikame mitere,

⁹ do pi amara na piri, ango akwai akwa, ango Paulo ngat kame acungo ne Kirisito Yesu doko nan atie da i otkol pire.

¹⁰ Ango akwai pi atin na Onesimo, kame ango adoko papa mere i kare kame ango oudo atie kede i otkol.

¹¹ Pien i kare okato en oudo kony mere li kibuti, do ateteni nan do etie kede kony buti kede but ada.

¹² Ango atie cwane dwogo buti, en ebedo cunya me diere.

¹³ Oudo amito be koto edong keda kan, tetekeny koto ekonya akaka in i kare kame kotwea kede i otkol pi kop me ejiri.

¹⁴ Do ako paro be miero kur atim gimoro abongo in yei, tetekeny tic ni aber kur bed pi adiadia, do wek ebed mit nin.

¹⁵ Amotoko kop noni en komio bin kopoke kede in pi kare moro, me wek edwog buti me atwal,

¹⁶ do likame bobo bala epasoit, do di do pire dwong kalamo epasoit, bala omin wa kame omaro i Kirisito, kame pire tek singo twatwal buta, do akalamo mere buti, i kom karacel kede i Rwot.

¹⁷ Aso ka in itero bala ango abedo ngatic ngawoti, game bala kite kame oudo koto igamango kede.

¹⁸ Doko ka oudo etimo ni raco moro, amotoko etie kede banya ni moro, in do mar gi i wi ango.

¹⁹ Ango Paulo awandiko kop noni kede cinga kikoma be, ango abino culo banya no. Likame tie gimoro kame doko awaco i kom kop kame mako kiton ida kikomi bedo bala banya nango.

²⁰ Ebo, omina, akwai itim na bero noni i Rwot. Kwei cunya i Kirisito.

²¹ Pi kite kame ango ageni kede pien itie kede wor, omio atie wandiko ni kop noni di angeo be in ibino timo gikame kalamo kame ango awaco ni.

²² Doko medo i wi mano, mito itemuno na agola me wele, pien atie kede gen be Rubanga bino winyo ilega wu di eko dwoka butu.

Amot me Ajikini

²³ Epapura kame obedo mabus wad wa pi Kirisito Yesu, cwao ni amot.

²⁴ Marako da, Arisitaku, Dema kede Luka kame obedo jotic jowota moti.

²⁵ Akwao kisa ka Rwot wa Yesu Kirisito bed kede wu.