Danieri 6 - Baibuli I Leb Kumam 2013

Danieri i Bur kame Inguon tie iye

¹ Darias oko yero jopug tol acel kede ot are (120) kame pugo adulion apapat, di eko poko negi tic i ajakanut mere dedede.

² Medo i wi magonogo, en bobo eko yero Danieri kede jo are ace pi ngingico tice me jopug me adulion, tetekeny gi dedede timere bala kame abaka mito.

³ Ingei kare acecek, Danieri oko nyuto tic aber kalamo jowote ace kame etimo kede gi tic me ngingico jopug, doko da tic mere oudo ber kalamo me jopug dedede me adulion; manono oko mino abaka oko bedo kede tam me kete bedo ngat atelo wi jotic dedede i ajakanut mere.

⁴ Di jo ace kame ngingico tic me jopug me adulion, karacel kede gin jopug me adulion oko mono kop moro arac kame kitwero pido iye Danieri, kame makere kede apugan arac i ajakanut. Do gin likame kiko twero udo tien kop moro kame kitwero cungo iye pi pide, akadi kop moro amakere kede kuwo me lim amoto ajajalun i dog tic, piento en oudo egenere.

⁵ Gin kiko poro kop ken gi ken gi be, “Wan likame obinunu udo tien kop moro kame otwerunu pido iye Danieri, kwanyo kenekene i kop amakere kede edini mere.”

⁶ Aso gin kiko ot but abaka di kiko waco ne be, “Abaka Darias, okwao be koto ibed kuo nakanaka!

⁷ Wan dedede jo kame opugo ajakanut noni, manoni riribo jo kame ngingico tice me jopug me adulion, jo kame lubo tien gi, kede jotic ace, wan oyei be abaka in ipoore keto iswil di iko ridakino en di etek. Poore imi cik be ngatamoroni kame bino lego but dano moro amoto but rubanga moro pi ceng ot adek, kwanyo kenekene buti, kobino uce i bur kame inguon tie iye.

⁸ Aso, adwong abaka, wot cik noni di in iko keto iye cingi, tetekeny likame doko kokaruno loke; ebino bedo iswil kalikame lokere me jo me Mede kede me Pasia.”

⁹ Aso Abaka Darias oko keto cinge i cik nono.

¹⁰ Bed bala Danieri oudo ngeo be abaka oudo otieko keto cinge i iswil nono, en pwodi eko gire meede donyo ot ilega i ode, kame oudo dirisan mege me agola me malo oudo yabere pimere kede Yerusalem. En oudo eoto kunono di eko riondiko piny di dirisan twolo, di eko donyo lego but Rubanga mere di epake; oudo etimo kamanono tien adek buli ceng.

¹¹ Jokwor ka Danieri nogo oko ot di kiko ude di etie lego di ekwao kisa kibut Rubanga mere.

¹² Gin kiko ot but abaka di kiko waco ne kop amako iswil kame oudo koketo; gin kiwaco be, “Abaka, mam in oudo iketo cingi i iswil kame waco be, ngatamoro kame bino lego but dano amoto rubanga moroni, pi kare me ceng ot adek alubo, kwanyo ka elego buti, kobino uce i bur kame inguon tie iye?” Abaka oko dwoko be, “Ebo, manono obedo iswil atek me jo Mede kede Pasia, iswil kalikame kotwero loko.”

¹³ Gin kiko waco ne abaka be, “Danieri, dano acel kikom jo me Yuda atie obukui kan, likame winyo kop nin, doko da edagi lubo iswil kame in iketo iye cingi, do en gire elego tien adek buli ceng.”

¹⁴ Kakame abaka owinyo kede pido gi nono, en eko bedo kede par alit. En eko moko tam mere pi koto lako Danieri, di eko cane pi koto lake tuno ceng donyo.

¹⁵ Di jokwor ka Danieri oko dok but abaka di kiko waco ne be, “Adwong abaka, ngei be di lubere kede iswilia me jo Mede kede Pasia, cik kame abaka otieko cibo likame kotwero loko.”

¹⁶ Di abaka oko golo cik di oko mako Danieri di oko uce i bur kame inguon opong iye. Abaka oko waco ne Danieri be, “Akwao be Rubanga ni kame in ibedo woro di itie kede genere bute laki.”

¹⁷ Bin oko tero kidi ati di oko gasakino en i dog bur nono, di abaka oko mwono iye alama mere kede alama me jopug mege, tetekeny kur ngatamoro tim gimoro amakere kede lako Danieri.

¹⁸ Abaka oko dok i paco mere di eko bedo iwor kiakia abongo camo gimoro, doko da likame oko tero ne gimoroni kame sobolo yomo cunye, kede da abongo nino i wange.

¹⁹ Di do kakame piny tie ru kede, abaka oko yai di eko onyaro ot i bur kame inguon tie iye.

²⁰ Kakame en etuno kede i bur nono kame Danieri oudo tie iye, en eko lwongere kitek kede dwan me lito be, “Danieri ngatic ka Rubanga akuo, benyo, Rubanga ni kame in itio ne kede genere otwero laki kibut inguon?”

²¹ Danieri oko dwoko be, “Adwong abaka, bed kuo nakanaka!

²² Rubanga na ocwao malaika mere di eko umo dog inguon tetekeny kur kitim na can moro. En etimo manoni piento en eudo be ango ali kede raco moro i nyime, kede i nyimi da, in abaka.”

²³ Abaka cunye oko doko yom adikinicel di eko mino cik be wot Danieri ki bur me inguon nono. Gin kiko wote ooko di likame kiko udo akadi apore moro i kome, piento en oudo eketo gen mere but Rubanga.

²⁴ Abaka oko mino cik di oko mamako jo dedede koudo orupao Danieri, di koko lwolwomo gi i bur me inguon nono, gin karacel kede mon gi kede idwe gi. Di pwodi likame kipopoto kituno i dud bur nono, inguon oko bwono gi di oko ngingido cogere gi.

²⁵ Di Abaka Darias oko wandiko baluwa but jo me atekerin dedede, kede but jo me leb dedede i wi lobo lung be: “Akwao ibedunu kede mulem adwong.

²⁶ Ango atie mino cik be, i ajakanut na dedede kame ango apugo jo poore bedo kede lworo kede wor but Rubanga ka Danieri.” En eko meede kede yamo be, “Piento ebedo Rubanga akuo, doko da epugo nakanaka. Likame kobino twero dudubo ajakanut mere, doko apugan mere likame tie kede ajikini.

²⁷ En elako, doko emio dano bwot; en etimo giaura kede gianena i malo kede i wi lobo. Piento en elako Danieri ki lak inguon.”

²⁸ Danieri oko meede ameda dongo i wang tic i kare me apugan ka Darias kede me ka Sairas me Pasia.